Wat Da Bible Say Bout Being Mahu an Homosexuality?
Wat Da Bible Tell
God wen make us fo have sex ony wen one male an one female stay married to each odda. (Da Start 1:27, 28; Da Prieses 18:22; Smart Guys 5:18, 19) Da Bible tell dat if you not married, sex iz kapu no matta wat kine. (1 Fo Da Corint Peopo 6:18) Dat can be regula kine sex, usin da mout an okole fo sex, or even jus playing wit each oddas private parts.
Even tho da Bible tell dat mahu kine sex iz pilau, az not tellin us fo hate da peopo who do dose tings. Guys dat follow Christ iz supposed to “get respeck fo evrybody.”—1 From Peter 2:17.
Homosexual an Mahu peopo, dey born lidat or wat?
Da Bible no talk bout bein born wit mahu kine feelings, but it do tell dat we all born wit da pull fo do stuffs dat God no like. (Fo Da Rome Peopo 7:21-25) Instead of getting hung up on wea da feelings come from, da Bible tell dat iz wrong fo ack on dose feelings.
How fo make God happy even if you get mahu kine feelings.
Da Bible tell: “Trow way all dese tings inside you dat come from dis world…No do pilau kine stuff…No tink plenny bout da bad kine stuff...” (Fo Da Colosse Peopo 3:5). Fo hemo da feelings dat make you like do pilau kine stuff, you gotta watch wat you tink bout. If you tinking bout good an clean kine tings, goin be mo easy fo hemo da feelings dat pull you fo do wass pilau. (Fo Da Philippi Peopo 4:8; From James 1:14, 15) Can be rough wen you firs start but goin get betta. Cuz God wen promise he goin help you wen you “go all out fo come all new kine inside, how you feel an how you tink.”—Fo Da Efesus Peopo 4:22-24.
Even fo peopo who not mahu, can still be hahd fo lissen to wat God say in da Bible bout having sex. Try tink bout da single peopo who prolly not goin get married, or somebody who stay married but dea odda half no can have sex. Dem too gotta control dea thoughts an feelings so dey no go outside of wat God says iz pono. An wen dey do dat, dey still yet can be happy. Can be same same fo dose who get mahu kine feelings if dey really like make God happy.—Da Rules Secon Time 30:19.