Why Ask Fo Advice?

1. How we can make smart choices dat goin turn out good? (Smart Guys 13:10; 15:22)

ALL us like make smart choices dat goin turn out good. Fo dat happen, da Bible tell us we gotta ask fo advice.​—Read um Smart Guys 13:10; 15:22.

2. Wat Jehovah promise fo do fo us?

² Da bes One we can go to fo advice iz oua Faddah Jehovah cuz he promise us, “I goin tell you wass da bestes ting fo you fo do, cuz I stay watch out fo you.” (Songs 32:8) Dis show dat Jehovah goin give us da advice dat each of us need an he goin help us fo follow um.

3. Wat we goin talk about in dis lesson?

³ In dis lesson we goin use da Bible fo help us ansa four questions, (1) Fo da advice help me, wat quality I gotta have? (2) Who can give me good advice? (3) How I can show I really like da advice? (4) How come no good ask oddas tell me wat fo do?

WAT QUALITY I GOTTA HAVE?

4. Wat quality we gotta have if we like good advice help us?

⁴ We gotta be humbo if we like good advice help us. We gotta realize we donno eryting an maybe we neva go tru dat kine stuff befoa fo make one good choice. So we goin need help wen we make choices. If we not humbo, Jehovah no can help us. Wen we read da Bible we not goin tink we gotta follow His advice. (Mic 6:8, New World Translation; 1 Pet 5:5) On da odda hand, if we humbo we goin be fas fo follow wateva advice we get from da Bible.

5. Wat tings King David wen do dat coulda made him come big head?

⁵ Try look at King David, he wen do unreal kine tings dat coulda made him come big head. Way befoa he wen come king, he wuz one famous musician. He even wen play music fo da king. (1 Sam 16:18, 19) Wen David had get pick fo be da nex king, Jehovah wen make him powaful wit his spesho spirit. (1 Sam 16:11-13) Da peopo wen really like him cuz he wen wack all da enemies, even da Filisha giant Goliat. (1 Sam 17:37, 50; 18:7) Would be easy fo one guy who wen do all dis kine stuff fo get big head an tink he no need lissen to da advice from oddas. But David no wuz lidat, he wuz humbo.

6. How we kno David wanted advice? (Go look da cova picha.)

⁶ Afta David had come king, he wen hang out wit guys who wen give him good advice. (1 Rec 27:32-34) Make sense cuz befoa he wen come king he wen do dat. He wen lissen to da advice from guys an even from one wahine Abigail. She wuz married to one stupid head loser named Nabal. David wuz humbo an wen lissen to her advice. An cuz of dat, he neva make one big mistake.​—1 Sam 25:2, 3, 21-25, 32-34.

7. Wat we can learn from David? (Da Teacha 4:13) (Go look da pichas.)

⁷ We can learn plenny stuff from David. Like we might get plenny talent or some kuleana ova oddas. But still yet we shouldn’t tink dat we kno eryting an we no need advice from peopo. We like copy David an be humbo an lissen to advice no matta who come from. (Read um Da Teacha 4:13.) If we do dat, we not goin make mayjah mistakes dat goin make um hahd fo us or fo odda peopo.

WHO CAN GIVE ME GOOD ADVICE?

8. Why Jonathan could give good advice to David?

⁸ Try look one moa ting we can learn from David. He wen lissen to da advice from guys who wuz frenz wit Jehovah an who wen undastan wat he wuz goin tru. Like wen David wanted fo come good wit King Saul again, he wen lissen to Saul’s boy, Jonathan. How come Jonathan could give him good advice? Cuz he wuz tight wit Jehovah an wen kno how fo deal wit his faddah too. (1 Sam 20:9-13) Wat dat can teach us?

9. Who we should ask fo advice? (Smart Guys 13:20)

⁹ Wen we need advice, iz good fo go ask somebody who stay tight wit Jehovah an who been tru da same kine stuff dat we need help wit.a (Read um Smart Guys 13:20.) Like maybe one young braddah like find somebody good fo marry. Who would be da bes fo give him good advice? One fren dat no stay married can give him advice dat can help if da ting come from da Bible. But da braddah can get moa betta advice if he get um from one coupo who love Jehovah, been married long time, an kno him real good. Cuz dey can help him fo kno how fo follow da advice dat stay in da Bible an can share wit him wat dey wen learn from doin dat in dea own marriage.

10. Wat we goin check out now?

¹⁰ We jus wen talk about one quality we gotta have an who can give us good advice. Now we goin check out how we can show we really like advice an why iz no good ask oddas fo tell us wat fo do.

HOW I CAN SHOW I REALLY LIKE DA ADVICE?

11-12. (a) Wat iz no good fo do? (b) Wen King Rehoboam had one importan choice fo make, wat he wen do?

¹¹ Sometimes get guys who look like dey trying fo get advice, but dey not. Dey ony trying fo find peopo back up wat dey awready wen choose. Dose kine guys should learn from wat wen happen to King Rehoboam.

¹² Rehoboam wen come da rula of Israel afta King Solomon wen mahke. Wen Rehoboam wen come king, da peopo had plenny good tings, but dey wen feel dat Solomon wen make dem work too hahd. So dey wen ask Rehoboam fo make dea work moa easy. He wen ask dem fo give him some time fo tink about um. An den he wen go ask da olda guys dat wen help Solomon wat dey tink. (1 Ki 12:2-7) Dat wuz one good ting fo do but he neva lissen to wat dey wen tell. How come? Maybe Rehoboam awready wen make up his mind wat he wuz goin do an wuz jus looking fo somebody agree wit him. So probly dass why he wen go see his younga frenz fo advice. Wen dose guys wen agree wit him, he wen like dat. (1 Ki 12:8-14) So Rehoboam wen tell da peopo he wuzn’t goin make um moa easy fo dem. He wen lissen to his younga frenz. Cuz of dat, da nation wen split up an Rehoboam had notting but problems afta dat.​—1 Ki 12:16-19.

13. How we kno if we really like odda peopos advice?

¹³ Wat we can learn from Rehoboam? Wen we ask fo advice from oddas, no good we awready wen make up oua mind wat we goin do. We like lissen to wat dey say firs. So we can ask ouaselfs, “I ask fo advice but ignore um if az not wat I like hea?” Try look dis exampo.

14. Wen we get advice, wat we gotta rememba? Try tell one exampo. (Go look da picha.)

¹⁴ Try picha dis, one braddah get offered one good job. But befoa he take um, he go ask one elda fo his advice. Da braddah tell da elda dat he gotta be away from da family fo long time. So da elda tell him dat he gotta take kea his ohana spiritually, dass his kuleana. (Efe 6:4; 1 Tim 5:8) But maybe da braddah no like wat da elda wen tell him. So he keep asking odda braddahs wat dey tink til he find somebody dat tell him wat he like hea. Da braddah really trying fo find advice, or he awready wen make up his mind an he jus trying fo find somebody agree wit him? We gotta rememba dat da heart iz one sly buggah. (Jer 17:9) Sometimes da advice we need da mos iz da one we no like hea.

SHOULD I ASK ODDAS FO TELL ME WAT FO DO?

15. Wat we gotta be keaful not fo do, an why?

¹⁵ Jehovah expeck us fo make oua own choices. (Gal 6:4, 5, NWT.) One akamai guy goin get advice from da Bible or solid Christians befoa he choose wat fo do. But we gotta be keaful fo no ask oddas fo tell us wat fo do. Some guys might jus strait up ask somebody dey trus, “Wat you would do if you wuz me?” Oddas might jus copy somebody else witout tinking fo demselfs wat dey should do.

16. Wat wen happen in Corint wen came to da meat dat wuz sacrificed to idols, an who had fo figga out wedda or not fo eat da meat? (1 Fo Da Corint Peopo 8:7; 10:25, 26)

¹⁶ We go look wat wen happen to da local hui in Corint wen came to da choice of wedda or not fo eat da meat dat wuz sacrificed to idol kine gods. Paul wen tell dem, “Ony get one God dass fo real, an all da odda gods no mean notting.” (1 Cor 8:4) Cuz of wat Paul wen say, some in da hui wen figga dey could eat da meat dat dey wen buy in da meat market, even tho wuz sacrificed to idols. Oddas wen choose fo not eat da meat cuz would bodda how dey feel. (Read um 1 Fo Da Corint Peopo 8:7; 10:25, 26.) Dis wuz one choice erybody had fo make fo demself. Paul neva wen tell da Corint peopo fo make decisions fo oddas. He neva tell dem fo copy wat odda peopo wen do eidda. Erybody “gotta tell God how come we wen do da tings dat we wen do.”​—Rome 14:10-12.

17. Wat could happen if we jus copy wat oddas do, an wat iz one exampo? (Go look da pichas.)

¹⁷ How someting lidat can happen today? Try tink about wen come to blood fractions. Ery Christian gotta make up his own mind wedda fo take or no take dese fractions.b Maybe iz hahd fo undastan all dis stuff, but still yet dass oua kuleana fo choose wat fo do. (Rome 14:4) But if we jus copy wat odda peopo do, we neva goin be akamai. We gotta learn how fo use Bible truts fo make good choices wen come to dis kine stuff. (Heb 5:14) If we wen do da research an still yet need help undastan how Bible truts can help us make one choice, den we can ask one solid Christian fo advice.

KEEP TRYING FO GET ADVICE

18. Wat Jehovah give us?

¹⁸ Jehovah show he trus us by letting us make oua own choices. Like one good faddah, he kea about us an give us wat we need fo do dat. He give us da Bible an akamai frenz dat help us use Bible truts fo make good choices. (Smart Guys 3:21-23) How we can show we tankful fo his help?

19. How we can keep making Jehovah happy?

¹⁹ Parents iz happy fo see dea kids grow up, serve Jehovah, an help oddas serve him too. Same lidat, Jehovah iz happy wen we come solid Christians an look fo good advice dat help us make choices dat show we love him.