How Fo Give Advice

1. Who gotta give advice, an why.

HOW you feel about giving advice? Fo some guys iz easy, but odda guys feel funny kine. But no matta how we feel, all us sometimes gotta give advice. How come? Cuz dass how we show love to oua braddahs an sistahs. Jesus wen tell dat if we like be his followa, we gotta show love to each odda. (John 13:35) An da Bible say wen we give good advice we make oua frenships come moa strong.​—Smart Guys 27:9.

2. Wat eldas gotta do, an why? (Go look da box “Counsel At Da Middo Of Da Week Meeting.”)

² Eldas need fo kno how fo give good advice. Jehovah an Jesus wen give dese guys da kuleana fo kea fo da hui. (1 Pet 5:2, 3, NWT.) One of da ways dey do dat iz by giving talks dat give advice from da Bible. Dey also give counsel wen we need um. An dey even help da guys who wen leave da hui fo come back. How can eldas an all us give good advice?

3. (a) How we can learn fo give good advice to oddas? (Isaiah 9:6, NWT; go look da box “Copy Jesus Wen We Give Advice.”) (b) Wat we goin talk about in dis lesson?

³ We can learn plenny about how fo give good advice by studying how da guys in da Bible wen do um, speshly Jesus. One of da tings Jesus stay called iz “Awesome Counsela.” (Read um Isaiah 9:6, NWT.) In dis lesson we goin talk about wat fo do wen somebody ask us fo advice an wat we can do wen we gotta give counsel even tho dey neva ask fo um. Anodda ting we goin talk about iz why iz importan fo give advice in da right way an at da right time.

WEN SOMEBODY ASK US FO ADVICE

4-5. Wen somebody ask us fo advice, wat we should do firs? Try give one exampo.

⁴ Wen somebody ask us fo advice, dat might make us feel good cuz dey trus us an dey like us help dem. Even tho we like help dem right away, firs we gotta stop an tink, “I kno enuff about da exack ting dey asking about fo give dem good advice?” Fo help dem, sometimes iz moa betta fo no give dem advice an sen um to somebody who kno moa about wat dey asking.

⁵ Try tink about if someting lidis wen happen. Maybe yoa close fren wen come supa sick. An he tell you he had do research on wat kine treatment fo get. But he like kno wat you tink would be da bes one. You might tink dat one treatment iz betta den da odda but you not one docta an you no moa da training fo deal wit dis kine sickness. Maybe da bes way fo help yoa fren iz fo help dem find somebody who trained fo deal wit dat kine sickness.

6. Why iz good fo wait befoa we give advice?

⁶ Even if we feel like we kno plenny about da exack ting dat oua fren iz asking about, maybe iz good fo wait befoa we say anyting. How come? Cuz Smart Guys 15:28 say fo “tink firs fo long time bout wat dey suppose to tell back.” Even if we tink we awready kno wat fo say, would be good fo firs take da time fo do research, pray, an tink hahd about da advice we goin give. Dat way wat we tell um goin match up wit wat Jehovah say. Try look wat wen happen to da prophet Nathan.

7. Wat you learn from wat had happen to Nathan?

⁷ Wen King David had tell Nathan he wanted fo build da tempo, fas Nathan wen tell him fo go do um. But dass not wat Jehovah wanted. (1 Rec 17:1-4) So befoa Nathan wen give advice, he shoulda firs ask Jehovah wat He wanted David fo do. Dis show dat wen somebody ask us fo advice, would be smart fo no open oua mout too fas.​—Jam 1:19.

8. Wass anodda reason why we gotta be keaful wen we give advice?

⁸ Anodda reason why we gotta be keaful wen we give advice iz dat if we give somebody da wrong advice an dey make da wrong choice an tings go bad, paht of it could be oua fault. Dass why would be good fo tink real hahd befoa we give advice.

GIVING COUNSEL EVEN IF DEY NEVA ASK

9. Wat da eldas gotta make shua befoa dey give counsel? (Fo Da Galatia Peopo 6:1, NWT.)

⁹ Sometimes da eldas gotta step in fo give one braddah or sistah counsel wen dey stay “goin da wrong way.” (Read um Fo Da Galatia Peopo 6:1, NWT.) Da guy maybe making some not so smart choices dat layta on can make him do someting real bad. Da eldas like help him fo keep serving Jehovah an live foeva. (Jam 5:19, 20) Befoa da eldas give da counsel, dey gotta make shua da guy really stay goin da wrong way. Jehovah let erybody make dea own choices. Jus cuz he choose fo do someting dass diffren from us, dat no mean iz wrong. (Rome 14:1-4) But if da eldas realize dat somebody wen do someting dat can jam up his relationship wit Jehovah, how dey can give him good counsel?

10-12. Wat da eldas can do wen dey gotta give counsel to somebody who neva ask fo um? Try give one exampo. (Go look da pichas.)

¹⁰ Iz hahd fo da eldas give counsel to somebody who neva ask fo um. Paul wen say dat somebody might not even kno he stay goin da wrong way. So befoa da eldas give da counsel, get some stuff dey should do fo make um moa easy fo da person lissen to da counsel.

¹¹ Giving counsel to somebody who neva ask fo um iz like trying fo grow one plant wea da groun stay hahd. Befoa da farma start fo plant da seed, he gotta loosen up da dirt fo make um moa easy fo da seed grow. Afta he do dat, he plant da seed an den watta um. Same lidat, get some tings dat one elda can do fo make um moa easy fo somebody lissen to counsel. Like da elda can wait fo da right time an tell da braddah he kea about um an dat get someting he like talk to him about. If peopo kno da braddah giving da counsel az one guy who always loving an nice to erybody, goin be moa easy fo take da counsel from him.

¹² Da eldas can make um moa easy fo da braddah take da counsel by letting um kno dat erybody make mistakes an gotta get counsel sometimes. (Rome 3:23) One elda gotta stay calm an show respeck wen he show from da scripchas dat da braddah stay goin da wrong way. Once da braddah undastan dat he wen make one mistake, da elda can make um clear wat da braddah gotta do fo change. Dass jus like planting da seed. An den, da elda can make um moa easy fo da braddah lissen to da counsel by telling um da good tings he doin an by praying wit him. Dass jus like he wattaring da seed.​—Jam 5:15.

13. How da eldas can make shua da person undastan da counsel?

¹³ Sometimes, da braddah getting da counsel might have hahd time undastanding um. Wat da eldas can do fo make shua he undastan wat dey saying? In one nice way, dey can ask him questions. (Teacha 12:11) Da ansas he give goin show if he really undastan an if he kno wat he gotta do fo change.

GIVING ADVICE DA RIGHT WAY AN AT DA RIGHT TIME

14. Why no good give advice wen we mad?

¹⁴ We all not perfeck so of course we goin do or say tings dat make odda peopo mad. (Col 3:13) Da Bible even say goin get times wea odda peopo make us mad. (Efe 4:26) But no good give advice wen we angry cuz “wen you come all huhu, dat no help you fo do da right kine stuff God tell you suppose to do.” (Jam 1:20) If we give advice wen we mad, we probly goin make tings moa worse. Dat no mean we neva goin tell da guy who made us mad how we feel. But we goin wait til we calm befoa we say anyting. We go learn from Elihu, da guy who wen counsel Job.

15. Wat we learn from Elihu’s exampo? (Go look da picha.)

¹⁵ Fo days Elihu wen lissen to Job defend himself from da tings his fake frenz wen say about him. Elihu wen feel bad fo Job but he wuz still mad wit him. He wuz mad cuz Job wen spen too much time trying fo prove dat he wuz innocent an wen say stuff about Jehovah dat wuzn’t tru. Elihu wen wait fo counsel Job, an wen he did, he wuz calm an wen show respeck. (Job 32:2; 33:1-7) Elihu’s exampo teach us dat da bes way fo give advice iz wit love an respeck an at da right time.​—Teacha 3:1, 7.

NO STOP GIVING AN LISSENING TO ADVICE

16. Wat you learn from Songs Fo God 32:8?

¹⁶ Da main scripcha fo dis lesson talk about how Jehovah give advice an watch out fo us (Read um Songs Fo God 32:8.) Dis mean dat he goin keep giving us advice an he goin help us fo follow um. Wen we give advice to oddas, we like copy Jehovah. We can do dat by watching out fo oua braddahs an sistahs an doin wateva we can fo help dem make good choices.

17. How we feel wen eldas give us advice from da Bible? (Isaiah 32:1, 2)

¹⁷ Now moa den eva we gotta learn fo give an lissen to advice. (2 Tim 3:1) Wen da eldas give advice dat come from da Bible, dey “jalike one watta ditch inside one dry place.” (Read um Isaiah 32:1, 2.) We tankful fo oua frenz who no hold back from telling us wat we gotta hea. Dea words iz one spesho gif. (Smart Guys 25:11) So all us, we go keep trying fo give an lissen to good advice.