Eight Guys Make Um To One New World

Noah, an his ohana wit da animals wen go inside da big boat. Jehovah wen close da door an wen start fo rain. Had rain so much da big boat started fo float. Pretty soon da whole eart wuz unda watta. All da bad peopo outside da big boat wen mahke. But Noah an his ohana wen live. Try tink how happy dey wuz cuz dey wen lissen to Jehovah.

Wen rain fo 40 days day time an night time, an den wen stop. Real slow da watta wen start fo go down an da big boat wen end up on top da mountains. Still yet, had choke watta erywea, so Noah an his ohana no could go outside.

Litto by litto da watta had dry up. Fo moa den one year, Noah an his ohana wuz inside da big boat. Den Jehovah wen tell dem dey could go outside. To dem wen look like one brand new world. Dey wuz so happy Jehovah wen save dem, dey wen make one sacrifice fo show dea mahaloz.

Jehovah wuz happy wit dea sacrifice. He wen promise fo no eva wipe out da eart by one flood no moa. Az one sign of dat promise, he wen make da firs rainbow inside da sky. You eva wen see one rainbow?

Den Jehovah wen tell Noah an his ohana fo have choke bebes an fill up da eart.