Had one guy name Job who worshiped Jehovah in da Uz land. He had plenny money an had one big ohana. He wuz one nice guy who wen help da pooa, wahines whose husbans wen mahke, an kids who no moa parents. Jus cuz he wen do wat wuz right, dat mean he neva get any kine pilikia?

Job neva kno Satan da Devil wuz watching him. Jehovah wen tell Satan ‘Wat, you checking out my guy Job? No moa nobody like him. Erytime he lissen me an do da right ting.’ Satan tell ‘Fo shua he like lissen you cuz you malama him, an bless him wit plenny stuffs like land an animals. But try take um all away an see if still yet he like lissen you.’ Jehovah sed ‘Go den, tes um, do wat you like wit all his stuff, jus no let um mahke.’ How come Jehovah wen let Satan tes Job? Cuz Jehovah knew Job would pass da tes.

So, Satan started fo tes Job. Firs, he wen sen some guys fo steal all his cows an donkeys. Den fiyah from da sky wen burn up all his sheeps. An den da Kaldea guys wen steal his camels an kill all da guys dat wen take kea of um. Wat wen happen next wuz da worstes ting eva. Wen all his kids wuz eating togedda, da house dey wuz in wen fall down on top dem an dey all had mahke. Even tho dis wen broke Job’s heart, he neva stop worshipping Jehovah.

Satan wasn’t pau wit Job. He wanted him fo suffa moa, so he wen give Job soas all ova his body. Job wuz hurting real bad. He neva kno why all dis stuff wuz happening to him. But, still yet, he neva stop worshipping Jehovah. God wen see all dis an wuz supa happy.

Den Satan wen sen three guys fo tes Job. Dey wen tell him ‘You must’ve wen do someting wrong an try fo hide um. God stay punish you.’ Job wen tell ‘I neva do notting wrong.’ But den Job started fo tink wuz Jehovah makin all dis happen, an He no wuz bein fair.

One young guy, Elihu, who wuz lissening da whole time wen start fo tell ‘Eryting you guys sed iz all wrong. We no can undastan how good Jehovah stay. He no can do notting wrong. He see eryting an like help peopo wit wat dey goin tru.’

Den Jehovah wen tell Job ‘Wea you wuz wen I wen make da sky an da eart? How come you tell dat I not fair? You like talk, but you dunno wat stay goin on.’ Job knew he wen screw up an tell ‘I no wuz right. I wen hea about you, but now I see you fo real kine. No moa anyting you no can do. I sorry fo eryting I had say.’

Wen da tes wuz pau, Jehovah wen make Job all good again an wen give him way moa den he had befoa. Job wuz happy an wen live long time. Cuz Job wen lissen even tho wuz hahd, Jehovah wen bless him. So, you like copy Job an no stop worshipping Jehovah no matta wat?

Ova dea Egypt side, Jacob’s ohana wuz known az da Israel peopo. Afta Jacob an Joseph wen mahke, one new Pharaoh wen start fo rule. He wuz sked dat da Israel guys wuz coming moa strong den da Egypt guys. So dis Pharaoh wen make da Israel guys slaves. He wen force dem fo make bricks an fo work supa hahd in da fields. Da moa hahd dey wen make da Israel guys work, da moa guys Israel wen get. Cuz Pharaoh neva like dat, he wen tell fo kill all da Israel boys dat wuz jus born. How sked you tink da Israel peopo wuz?

One Israel wahine name Jokebed had born one good looking bebe boy. She wen put him in one basket an hide um in da reed plants inside da Nile Riva fo proteck him. Da bebe’s sistah, Miriam, wen stay close by fo see wat wuz goin happen.

Pharaoh’s daughtah wen go da riva fo take one bath, an den she had see da basket. Inside dea she had find one bebe crying, an she wen feel bad fo him. Miriam wen ask, ‘Eh, you like me find one Israel lady fo feed da bebe fo you?’ Wen Pharaoh’s daughtah told her yeah, Miriam had bring back her own maddah, Jokebed. Pharaoh’s daughtah told her, ‘Hea, take dis bebe an feed um. I pay you.’

Wen da kid wen come moa ol, Jokebed wen bring um to Pharaoh’s daughtah. She wen name um Moses, hanai um, an raise um. Moses wen grow up az one prince an coulda had anyting he like. But Moses neva forget Jehovah. He wen know he wuz really one Israel guy, not one Egypt guy. An he wen choose fo serve Jehovah.

Wen Moses wuz 40, he wen choose fo help his peopo. Wen he had see one Egypt guy bussing up one Israel slave guy, Moses wen crack da guy so hahd dat da Egypt guy mahke. Moses wen hide da body in da sand. Wen da Pharaoh had find out, he wen try fo kill Moses. But Moses wen run away to Midian. Jehovah wen take kea him ova dea.