Wen da Israel spies wen go Jericho town, dey wen stay at one wahine’s house. Her name wuz Rahab. Da Jericho king wen find out about da spies so he sen soldiers ova dea. Real fas, she hide da two spies on top da roof. Den she give da soldiers da wrong scoops fo throw dem off. Afta dey gone, she tell da spies: ‘I goin help you cuz I kno dat Jehovah stay on yoa side an dat you goin take ova da land. Promise me you goin save my ohana, k?’

Da spies tell Rahab: ‘K, we promise dat nobody inside yoa house goin get hurt.’ Den dey tell: ‘Tie one red rope outside yoa window, den yoa family goin be okay.’

Rahab take one rope an let da spies drop down from her window. Dey bag to da mountains an hide dea fo three days. Den dey go back by Joshua. Afta dat, da Israel peopo wen go across da Jordan Riva an had get ready fo take ova da land. Jericho wuz da firs town dey wen take ova. Jehovah wen tell dem fo march aroun da town one time ery day fo six days. On day numba seven, dey wen march aroun da town seven times. Den da prieses wen blow dea trumpets, an da soldiers had yell az loud az can. Den boom, da walls wen fall down! But Rahab’s house neva get wipe out, even tho wuz part of da wall. Rahab an her ohana wen get save cuz she wen trus Jehovah.

Da peopo in Canaan wen hea wat had happen in Jericho. So da Canaan kings had hui up togedda fo fight da Israel peopo. But da Gibeon peopo wen come up wit one diffren kine plan. Dey wen put on dea mos boro boro clothes an go see Joshua an tell: ‘Us guys come from one far place. We wen hea bout Jehovah an all he wen do fo you in Egypt an Moab. Make one deal fo let us live, an we promise fo be yoa worka guys.’

Joshua wen believe dem an tell he not goin attack dem. Three days layta, he wen find out dat dey live right dea in Canaan, ony close by. Joshua ask da Gibeon peopo: ‘Why you bulai us?’ Dey ansa: ‘We wuz sked! We kno dat yoa god Jehovah stay fight fo you. Please no kill us.’ Joshua had stick to da deal an let dem live.

Right afta dat, five kings from Canaan wen go afta da Gibeon peopo. Joshua an his army guys wen march all night fo save dem. Da fighting wen start early da nex morning. Da Canaan guys wen dig out an run all ova da place. No matta wea dey run, Jehovah wen throw bombucha hailstones on dem. Den Joshua ask Jehovah fo make da sun no move. Dat neva eva wen happen befoa. So how come he ask Jehovah fo do dat? Cuz Joshua had full on trus Jehovah. Da sun neva go down one whole day until da Israel guys wen come out da winnahs ova da Canaan kings an dea army guys.