Da Israel guys had bag from Jehovah again an wen worship fake kine gods. Dese bogus gods neva do notting fo help da Israel guys wen da Ammon army had attack dem. Da Israel peopo wen suffa fo plenny years. Dey no could hando um awready, so dey tell Jehovah: ‘We had screw up big time! Please get us outa trouble.’ Da Israel guys had smash dea fake kine idols an had start fo worship Jehovah one moa time. Jehovah neva like see dem suffa no moa.

One warrior named Jeftah wuz picked fo lead da peopo fo fight agains da Ammon guys. Jeftah wen make one promise to Jehovah: ‘If you help us win dis fight, wen I go home, whoeva da firs person dat come out fo meet me I goin give dem to you.’ Jehovah had hea wat Jeftah wen pray an had help him win da fight.

Wen Jeftah had come back home, da firs one fo come out his house wuz his ony kid, his bebe girl. She come out dancing an playing her tammorine. Wat Jeftah goin do now? He rememba wat he had promise to Jehovah an tell: ‘Shucks, bebe girl, I no can believe dis! I had make one promise to Jehovah. Fo keep um, now I gotta sen you away fo work fo Jehovah in Shiloh town.’ But his girl tell him: ‘Dad, you gotta keep um if you wen make dis promise to Jehovah. But befoa I go, I can go up mauka wit my frenz fo two months?’ Afta dat, Jeftah’s girl had go work at da tent in Shiloh fo da res of her life. Her frenz wen go visit her ova dea ery year.

Da Main Pries Eli had two boys, Hophni an Phineas. Dem guys wuz prieses at Da Tent for Jehovah, but dey wuz real pilau. Dey no wuz lissening to wat Jehovah had like dem fo do an wuz treating erybody bad. Wen da peopo bring dea sacrifices to Jehovah, dose guys wuz cockaroaching da bes pieces of meat fo demself. Eli wen kno about all dat but he neva do notting about um. So wat, Jehovah wuz goin keep letting um go lidat?

Even tho Samuel wuz way moa young den Hophni an Phinehas, he neva copy dem. Cuz he wuz diffren, Jehovah wuz supa happy wit him. Samuel wuz sleeping one night an he hea somebody call his name. So he run to Eli an say: ‘You wen call me? I stay hea!’ But Eli tell him: ‘I neva call you, go back sleep.’ So Samuel go back moemoe. Dis wen happen again. Wen Samuel hea da voice one third time, Eli figga dat Jehovah wuz da one talking to Samuel. So he tell Samuel: ‘If you hea da voice again, you gotta tell: ‘Talk Jehovah. I stay lissen you.’’

Samuel go back sleep. Den he hea da voice one moa time tell: ‘Samuel! Samuel!’ So he ansa: ‘Talk, cuz I stay lissen you.’ Jehovah tell him: ‘Tell Eli dat him an his ohana goin get it! He kno da bad tings his boys stay doin in my Tent fo worship an he no stay doin notting bout um!’ Da nex morning, Samuel open da doors fo Da Tent like he always do. But he wuz sked fo tell Eli wat Jehovah had say. But Eli wen call an tell him: ‘My boy! So wat wen happen? Wat Jehovah had say? I like kno eryting!’ So Samuel tell Eli eryting.

Jehovah wen stick wit Samuel da whole time he wuz growing up. Da Israel peopo from all ova da place had kno dat Jehovah wen pick Samuel fo talk fo Him an be one local leada.