Look At Jehovah Fo Help You Feel Betta

1. How tings wuz fo da Jew guys who had fo live Babylon side?

FO LONG time, da Jew guys neva lissen to Jehovah. Cuz of dat, Jehovah wen let da Babylon guys wipe out dea land an take dem az prisonas. Wat wuz like fo dem live dea? (2 Rec 36:15, 16, 20, 21) Yeah, dey could go weaeva dey like ova dea in Babylon. (Jer 29:4-7) But life no wuz easy, an dass not wea dey wanted fo live. How dey wen feel about dat? Try look wat one of dem wen tell, “Us wen sit down by da rivas Babylon side an cry plenny, cuz we tink plenny bout how Jerusalem town stay all bus up.” (Songs 137:1) Da Jew guys needed fo hea good kine words, but wea dey wuz goin get um from?

2-3. (a) Wat Jehovah wen do fo da Jew guys who had fo live Babylon side? (b) Wat we goin talk about in dis lesson?

² Jehovah “da God dat erytime give us good kine words.” (2 Cor 1:3) Cuz he love his peopo, he like give dem good kine words. Jehovah wen kno dat wen dey wuz in Babylon, some of da Jews would feel sorry cuz dey neva lissen him an would start fo serve him da right way again. (Isa 59:20) So moa den 100 years befoa dey had fo go Babylon, Jehovah wen give one message to Isaiah fo write. An dass da book of Isaiah. How dis wuz goin help dem? Isaiah tell, “Dis wat yoa God tell you guys: “Make my peopo come so notting bodda dem! Help um feel good inside!”” (Isa 40:1) Wit wat Isaiah wen write, Jehovah wen give wat da Jew guys needed fo feel good inside.

³ Jalike da Jew guys, sometimes we need dose good kine words too. In dis lesson, we goin talk about three ways dat Jehovah wen help da Jew guys in Babylon: (1) He wen promise fo let dem go if dey wuz sorry fo wat dey wen do, (2) he wen give his peopo hope, an (3) he wen help dem fo no be sked. Az we talk story about dese tings, try look how dat can help us guys today.

JEHOVAH LET US GO

4. How Jehovah show dat he one God dat like let us go? (Isaiah 55:7)

⁴ Jehovah iz “da Faddah dat pity us an give us plenny chance.” (2 Cor 1:3) He had show dat wen he had promise fo let go da Jew guys who wuz Babylon side. (Read um Isaiah 55:7.) He tell, “But I get love an pity fo you guys, an I goin stay tight wit you foeva.” (Isa 54:8) How Jehovah wuz goin show his pity? Even tho da Jews had fo live Babylon long time cuz dey neva lissen, Jehovah wen promise dem dey no wuz goin stay dea foeva. (Isa 40:2) Dese words wen make da Jews who wuz sorry fo wat dey wen do an wanted fo make Jehovah happy, feel real good inside!

5. How come we can be even moa shua den da Jew guys, dat Jehovah like let us go fo da bad stuff we wen do?

⁵ Wat us can learn? Jehovah stay ready fo full on let us go fo da bad stuff we wen do. Today we can be even moa shua den da Jew guys, dat Jehovah like let us go. How we kno dat? Cuz we awready kno wat Jehovah had do so dat he could let us go. Hundreds of years befoa wen happen, Isaiah wen tell dat Jehovah wuz goin sen his Boy to da eart fo give up his life fo all da guys dat wuz sorry fo wat dey wen do. Cuz Jesus wen mahke fo all us, Jehovah can hemo all da bad kine stuff we wen do. (Jesus Guys 3:19; Isa 1:18; Efe 1:7) Jehovah fo shua one God who give us plenny chance!

6. How come we can feel good inside wen we tink about how Jehovah let us go? (Go look da picha.)

⁶ Wat Jehovah wen tell da Jews at Isaiah 55:7 can also help us if we still feel guilty about da bad kine stuff we wen do befoa, even tho we awready wen show we sorry. Speshly if we still feel guilty an get hahd time cuz of oua mistake. But we can be shua dat Jehovah let us go if we wen tell dat we sorry an no goin do da bad kine stuff anymoa. An wen Jehovah let us go, he choose fo no rememba da bad kine stuff we wen do. (Go look Jeremiah 31:34.) So if Jehovah no keep tinking about da bad kine stuff we wen do, den we shouldn’t eidda. Wat matta to Jehovah iz wat we stay doin now, not da bad kine stuff we wen do befoa. (Eze 33:14-16) An pretty soon, oua Faddah dat pity us goin cut us loose foeva from any suffaring we go tru cuz of oua mistakes.

7. Wat can make us like talk to da eldas if we wen do someting real bad an stay hiding um?

⁷ Wat we gotta do if we stay feeling guilty cuz we stay hiding someting real bad dat we wen do? Da Bible tell us fo ask da eldas fo help. (Jam 5:14, 15) Eh, might be hahd fo tell dem wat wen happen. But if we real sorry an rememba dat Jehovah an dese braddahs like help us an give us chance, dat goin make um moa easy fo go talk to dem. Try look how Jehovah wen use da eldas fo help Arthur,a one braddah who wuz feeling real guilty cuz of someting he wen do. “I wuz watching porn fo about one year,” Arthur tell. “But afta I wen hea one talk about knowing wass ok an not ok, I wen tell my wife an da eldas wat I wuz doin. I wen feel way betta afta I wen talk to dem, but still yet wuz all bum out cuz of wat I wen do. Da eldas wen remind me dat Jehovah still like be my fren. He correck us cuz he love us. Dea good kine words wen touch my heart an help me look myself da way Jehovah look me.” Now, Arthur one pionea preacha an one helpa guy. Make us feel good fo kno dat if we sorry fo real kine fo wat we wen do, Jehovah stay ready fo let us go!

JEHOVAH GIVE US HOPE

8. (a) Wat kine hope Jehovah wen give da Jew guys who had fo live Babylon? (b) From wat Isaiah 40:29-31 tell, how da Jews who wuz sorry wuz goin feel cuz of da hope Jehovah wen give dem?

⁸ From da way dey wen look at um, da Jews wen tink no ways dey wuz goin home. Da Babylon guys usually no let go da guys dey wen capcha. (Isa 14:17) But Jehovah wen give his peopo hope. He wen promise fo free his peopo so dey could go home, an notting wuz goin stop him from making um come tru. (Isa 44:26; 55:12) Da way Jehovah wen see um, Babylon wuz notting, jalike dus. (Isa 40:15) Wen you blow on dus, da buggah gone. Dass how easy would be fo Jehovah let his peopo go from Babylon. How dis hope wuz goin help da Jews? Dat wuz goin make dem feel betta. But can do moa den dat. Isaiah wen write, “But da peopo dat wait fo Da One In Charge help dem, dey goin change fo dem come mo strong still yet.” (Read um Isaiah 40:29-31.) Dey wuz goin fly up jalike da eagles cuz dea hope wuz goin make dem strong again.

9. Wat kine proof da Jews had dat Jehovah’s promise wuz goin come tru?

⁹ Jehovah wen give da Jew guys proof dat wat he wen promise wuz goin come tru. How? Try tink about da prophecies dat awready wen come tru. Like, Assyria wen take ova da north side kingdom of Israel an wen take da peopo back Assyria. (Isa 8:4) Dey wen see da Babylon guys wipe out Jerusalem an take da peopo back Babylon. (Isa 39:5-7) Dey wuz alive wen King Zedekiah had come blind an take him back Babylon. (Jer 39:7; Eze 12:12, 13) Eryting Jehovah wen tell wuz goin happen, wen happen. (Isa 42:9; 46:10) All dis wen make dea fait moa strong dat Jehovah’s promise fo free dem wuz goin come tru!

10. Wat can help us keep oua fait strong befoa dis world come pau?

¹⁰ Wat we learn? Wen we stay bum out, oua hope fo da future can make us feel betta an help us fo come strong again. Tings in da world today stay getting moa worse, an get plenny guys wit powa who go agains us. But we no can lose fight. Jehovah wen give us one unreal hope dat we goin live foeva in Paradise. Ova dea, we goin be safe an notting goin bodda us. We gotta keep looking at dat hope an make um clear in oua mind an heart. Oddawise, oua hope goin be jalike looking someting beautiful outside, but stay blurry cuz we looking tru one dirty window. How we can “clean da window,” keep oua hope strong? No stop tinking about how awesome oua life goin be in Paradise. We can do dat by reading articles, watching videos, an lissening songs about oua hope. An we can talk to Jehovah about all da tings we no can wait fo in praya.

11. Wat wen help one sistah who get mayjah healt problems fo come strong again?

¹¹ Try look how hope wen help one sistah name Joy, who get mayjah healt problems, fo feel betta an come strong again. She tell, “Wen I feel I no can hando, I tell Jehovah eryting how I stay feeling, cuz I kno he goin undastan. An den Jehovah give me “da unreal powa.””(2 Cor 4:7) Joy also picha herself ova dea in da new world, wea “nobody . . . goin tell, “I stay sick!”” (Isa 33:24) Same ting wit us, if we tell Jehovah how we feel an keep looking at oua hope, we can come strong again.

12. Wat kine reasons we get fo trus Jehovah’s promises? (Go look da picha.)

¹² Jalike he wen do fo da Jew guys in Babylon, Jehovah give us plenny reasons fo trus wat he promise. Try tink about da prophecies we see coming tru. Fo exampo, we see one govament wit plenny powa dat “stay one part iron an one part clay.” (Dan 2:42, 43, NWT) We also hea about “plenny diffren places, da groun goin shake hard plenny,” an we preach to “all da diffren kine peopos.” (Mat 24:7, 14) Dese prophecies an plenny oddas make oua fait moa strong dat all da odda promises Jehovah wen make, goin come tru.

JEHOVAH HELP US NO BE SKED

13. (a) Wat kine hahd times da Jew guys wuz goin get wen da time came fo dem be set free? (b) From wat tell at Isaiah 41:10-13, how Jehovah wen help da Jew guys feel betta?

¹³ Even tho Jehovah wen help da Jews feel betta cuz he wen promise dey wuz goin be set free, he knew dey wuz goin get hahd time wen dat wuz goin happen. He wen tell jus befoa da Jews wuz goin go free, one supa strong king wuz goin attack an take ova all da countries aroun Babylon, den attack Babylon too. (Isa 41:2-5) Da Jews had fo worry, o wat? Long time befoa dis wen happen, Jehovah wen give good kine words to his peopo. He tell, “So no sked, cuz you guys da one I stay wit. No come bum out, cuz I yoa God.” (Read um Isaiah 41:10-13.) Wat he mean, “I yoa God”? He no wuz telling da Jews fo worship him, cuz dey awready wen kno dat. But radda, he wuz telling dem dat he wuz still on dea side fo help dem.​—Songs 118:6.

14. Wat else Jehovah wen do fo help da Jews no be sked?

¹⁴ Jehovah wen help da Jews fo no be sked wen he had remind dem of his awesome powa an all da stuff he kno. He wen ask dem fo look up at da stars. He wen tell dem he neva ony wen make da stars, but he also kno all da stars names. (Isa 40:25-28) Moa so den, fo shua he kno da names of each of da guys dat serve him! An if Jehovah get da powa fo make da stars, garanz he get da powa fo help his peopo. Yessah, da Jew guys who had fo live Babylon neva have anyting fo be sked or worry about.

15. How God wen help da Jew guys make ready fo da time dey wuz goin get set free?

¹⁵ Jehovah also wen help his peopo make ready fo da time dey wuz goin get set free. Earlia, in da book of Isaiah, God wen tell his peopo, “Go inside yoa room an shut da door. Hide inside dea fo litto bit till Da One In Charge pau come huhu.” (Isa 26:20) Da Jews probly wen do dis wen King Cyrus wen attack Babylon. One old Greek history guy had tell wen Cyrus wen go inside Babylon, he “wen tell his [army guys] fo kill anybody who no wuz inside dea house.” All da peopo living in Babylon must have been sked! But da Jew guys living inside Babylon probly neva mahke cuz dey wen lissen wat Jehovah had tell dem.

16. Why we no need be sked about wat goin happen during da big trouble? (Go look da picha.)

¹⁶ Wat we learn? Pretty soon, da big trouble goin start. Wen dat happen, peopo in da world goin be all sked an jam up. But not Jehovah’s peopo. We kno dat Jehovah stay oua God. We goin stan strait up, cuz we kno “da time stay nea fo God cut [us] guys loose.” (Luk 21:28) Even wen one hui of nations attack us we goin keep oua trus in Jehovah. Jehovah goin use da angels fo proteck us, an he goin tell us wat we gotta do fo save oua life. How he goin tell us dat? We jus gotta wait an see. But, mos likely we goin get um tru da local huis. Dese might be da “rooms” wea we goin be safe. How we can make ready fo dat time? We gotta come moa close to oua braddahs an sistahs, be ready fo lissen da instrucktions from Jehovah’s hui, an be shua dat Jehovah da one stay lead oua hui.​—Heb 10:24, 25; 13:17, NWT.

17. How you can look to Jehovah fo feel betta?

¹⁷ Life no wuz easy fo da Jew guys living in Babylon, but Jehovah wen give dem da good kine words dey wen need fo feel betta. He goin do da same ting fo us. So no matta wat happen tomorrow, no stop looking to Jehovah fo good kine words fo help you feel betta. Have fait dat he let go da bad stuff we do an dat he kea fo you. Keep yoa hope strong. Rememba, cuz Jehovah yoa God, you no need be sked notting.