Եհովայի Վկաները հաստատապես համոզված առաջ են ընթանում.

Տարեկան հանդիպման մասին հաղորդագրություն

Թերահավատությամբ և կասկածանքով լի այս աշխարհում Եհովայի վկաները՝ որպես քրիստոնյաներ, աչքի են ընկնում իրենց հաստատ համոզվածությամբ։ Այդ մասին խոսվեց Փենսիլվանիայի «Աստվածաշնչի և գրքույկի Դիտարան ընկերության» տարեկան հանդիպման ընթացքում, որը կայացավ 2000 թ. հոկտեմբերի 7–ին՝ շաբաթ օրը, Ջերսի Սիթիում (Նյու Ջերսի) գտնվող Եհովայի վկաների Համաժողովների սրահում։a

Իր բացման խոսքում նախագահող Ջոն Բարը, որը Եհովայի վկաների Կառավարիչ մարմնի անդամներից է, ասաց. «Երկրագնդի վրա ապրող միլիարդավոր մարդկանցից միայն մենք գիտենք և հավատում ենք, որ Եհովայի սիրելի Որդին՝ Հիսուս Քրիստոսը, երկնքում այժմ գահակալված Թագավոր է և իշխում է իր թշնամիների մեջ»։ Այսպիսի ամուր համոզվածությունը հաստատեցին աշխարհի տարբեր մասերից հասած վեց ցնցող հաղորդագրությունները։

Հայիթիում Աստվածաշնչի ճշմարտությունը հաղթում է ոգեհարցությանը

Ոգեհարցությունը Հայիթիում լայն տարածում ունի։ «Սովորաբար մարդիկ կախարդությամբ են զբաղվում իրենց պաշտպանելու նպատակով,— պատմեց մասնաճյուղի Կոմիտեի կոորդինատոր Ջոն Նորմանը»։ Կախարդությամբ բուժումներ անող մի մարդ սկսել էր դրանում կասկածել, երբ վթարի էր ենթարկվել և, արդյունքում, մի ոտքը կորցրել։ «Ինչպե՞ս կարող էր սա ինձ հետ պատահել։ Չէ՞ որ ոգիներն ինձ պիտի պաշտպանեին»,— զարմացել էր նա։ Ուրիշ շատերի նման, այս մարդուն ևս Եհովայի վկաները օգնեցին սովորել Աստվածաշնչի ճշմարտությունը, որն էլ ազատեց նրան ոգեհարցությունից։ Հայիթիում Վկաների պոտենցիալ աճը երևում է այն փաստից, որ 2000 թ. ապրիլի 19–ին քարոզիչների թվից չորս անգամ ավել մարդ է ներկա գտնվել Քրիստոսի մահվան Հիշատակի երեկոյին։

Մեծ եռանդը Կորեայի լայնարձակ տերիտորիայում

Կորեայում Եհովայի վկաների 40 տոկոսը լիաժամ ծառայողներ են։ «Ռահվիրաների այս մեծաքանակ բանակը,— նշեց մասնաճյուղի Կոմիտեի կոորդինատոր Միլթոն Համիլթոնը,— 47 միլիոնից ավել բնակչություն ունեցող երկրի ամբողջ տարածքը անցնում է մոտավորապես մեկ ամսվա ընթացքում»։ Աճը հատկապես նկատվում է ժեստերի լեզվով անցկացվող ժողովներում։ Այդ ժողովներից մեկի տարածքում Աստվածաշնչի 800 տնային ուսումնասիրություն է անցկացվում։ Միջին հաշվարկով՝ յուրաքանչյուր քարոզչին մեկ ուսումնասիրություն է ընկնում։ Բայց ցավալին այն է, որ մինչև այժմ երիտասարդ եղբայրներին կալանքի տակ են վերցնում քաղաքականության հարցերում իրենց բռնած չեզոք դիրքի պատճառով։ Այս հավատարիմ քրիստոնյաների հետ, սակայն, բանտում բարյացակամորեն են վերաբերվում և հաճախ նրանց պատասխանատու աշխատանքներ են վստահում։

Մեքսիկայում քարոզիչների աճի հետ կապված կարիքները

2000 թ. օգոստոսին Մեքսիկայում քարոզչական ծառայության հաշվետվության մեջ գրանցվեց Թագավորության քարոզիչների բարձրագույն թիվը՝ 533 665։ Այս թիվը երեք անգամ գերազանցել են Հիշատակի երեկոյին ներկա գտնվողները։ «Այս տարի մենք նպատակ ունենք կառուցել ևս 240 Թագավորության սրահ,— ասաց մասնաճյուղի Կոմիտեի կոորդինատոր Ռոբերտ Թրեյսին։— Թեպետ դրանից ավելիի կարիքն ունենք»։

Մեքսիկայում ընդօրինակման արժանի են Եհովայի երիտասարդ վկաները։ Այդպիսի մի երիտասարդի նկատի ունենալով՝ կաթոլիկ քահանաներից մեկը հետևյալ կերպ արտահայտվեց. «Ես շատ կուզեի, որ իմ հետևորդներից գոնե մեկը նրա նման լիներ։ Ես հիանում եմ այս մարդկանցով՝ իրենց ամուր կամքի և Աստվածաշունչը իմաստնորեն գործածելու համար։ Նույնիսկ իրենց կյանքը վտանգի ենթարկելով՝ նրանք պաշտպանել են Աստծուն»։

Հավատարմությունը անհանգիստ Սիեռա Լեոնեում

1991 թ. ապրիլից սկսած, երբ Սիեռա Լեոնեում բռնկվեց քաղաքացիական պատերազմը, հազարավոր մարդիկ են սպանվել, վիրավորվել կամ՝ հաշմանդամ դարձել։ «Պատերազմն ու նեղությունը մարդկանց վրա խոր ազդեցություն է թողել,— պատմեց մասնաճյուղի Կոմիտեի կոորդինատոր Բիլլ Քաուանը։— Շատերը, ովքեր ժամանակին անտարբեր են եղել մեր քարոզած լուրին, այժմ հետաքրքրությամբ լսում են։ Սովորական երևույթ է դարձել, երբ մարդիկ, առանց նախօրոք հրավիրվելու, ուղիղ Թագավորության սրահ են գալիս՝ ներկա գտնվելու ժողովի հանդիպումներին։ Եղբայրներին հաճախ կանգնեցնում են փողոցում և խնդրում, որ իրենց հետ Աստվածաշնչի ուսումնասիրություն սկսեն»։ Չնայած նրան, որ երկրում դեռևս անկայուն վիճակ է տիրում, Թագավորության հռչակման ուղղությամբ կատարվող աշխատանքները Սիեռա Լեոնեում պտուղներ են բերում։

Լայնածավալ շինարարական ծրագիր՝ Հարավային Աֆրիկայում

Ներկայումս, Հարավային Աֆրիկայի մասնաճյուղի հոգածության տակ գտնվող տերիտորիայում մի քանի հազար Թագավորության սրահների կարիք կա։ Արդեն հարյուրավոր սրահներ են կառուցվել։ «Խրճիթներում կամ ծառերի տակ հավաքվելու փոխարեն, ինչպես անում էին նախկինում, մեր եղբայրները կարող են հավաքվել հարմարավետ նստատեղերով պատշաճ վայրերում,— նշեց մասնաճյուղի Կոմիտեի անդամ Ջոն Կիկոտը։— Թեև Թագավորության սրահների մեծ մասը համեստ կառույցներ են, շրջապատում նրանք սովորաբար աչքի են ընկնում իրենց արտաքին տեսքով։ Որոշ վայրերում նկատվել է, որ Թագավորության սրահը կառուցելուց հետո տարվա ընթացքում ժողովի անդամների թիվը աճել է երկու և ավել անգամներ»։

Վկաների նոր սերունդը Ուկրաինայում

2000 թ. ծառայողական տարվա ընթացքում Ուկրաինայում քարոզիչների բարձրագույն թիվը հասել է 112 720–ի։ Նրանցից ավելի քան 50 000–ը Աստվածաշնչի ճշմարտությունն իմացել են վերջին հինգ տարիների ընթացքում։ «Իրոք որ Եհովան Վկաների նոր, երիտասարդ սերունդ է առաջ բերել՝ որը հռչակում է իր անունը,— հայտարարեց Ջոն Դիդըրը՝ մասնաճյուղի Կոմիտեի կոորդինատորը։— Վերջին երկու տարիների ընթացքում ավելի քան 50 միլիոն պարբերագիր ենք տարածել, որը հավասար է երկրի բնակչության թվին։ Ամեն ամիս միջին հաշվով հազար նամակ ենք ստանում այն հետաքրքրվող անհատներից, ովքեր ուզում են ավելին իմանալ»։

Ծրագրի այլ հուզիչ կետերը

Ուշագրավ էր Կառավարիչ մարմնի անդամ Դենիել Սիդլիկի ելույթը։ Սույն համարում տպագրված «Կառավարիչ մարմինը իրավաբանական ա՞նձ է» հոդվածը հիմնված է տեղեկություններով հարուստ այդ ելույթի վրա։

Թեոդոր Յարաչը, որը նույնպես Կառավարիչ մարմնի անդամ է, մտածելու տեղիք տվող մի դասախոսություն կարդաց՝ «Վերակացուներն ու ծառայողական օգնականները աստվածապետական կարգով են նշանակված» վերնագրով։ Այս պարբերագրում տպագրված հոդվածներից մեկը այդ թեման է շոշափում։

Տարեկան հանդիպման ծրագրի մեջ տեղ էր գտել նաև Կառավարիչ մարմնի անդամ Դեյվիդ Սփլեյնի սրտաշարժ ելույթը՝ հիմնված 2001 թ. տարվա խոսքի վրա։ Դա Պողոս առաքյալի գրած հետևյալ խոսքերն են. «Կանգուն [եղեք]՝ որպես հասուններ և Աստծո ողջ կամքում՝ հաստատապես համոզվածներ» (Կողոսացիս 4։12, ՆԱ)։ Համայն աշխարհի Եհովայի վկաները լի՛ են այս խոսքերը կատարելու վճռականությամբ՝ Աստծո Թագավորության բարի լուրը հավատարմորեն քարոզելով աշխարհով մեկ (Մատթէոս 24։14)։

[ծանոթագրություն]