Սովորեցնենք այն, ինչ Աստվածաշունչը սովորեցնում է իրականում

«Բոլոր ազգերը աշակերտեցէք [«աշակերտնե՛ր դարձրեք», ՆԱ] .... նորանց սովորեցնելով» (ՄԱՏԹԷՈՍ 28։19, 20)։

1. Որքանո՞վ է մատչելի Աստվածաշունչը։

ԵՀՈՎԱՅԻ Խոսքը՝ սուրբ Աստվածաշունչը, աշխարհի ամենահին և ամենատարածված գրքերից մեկն է։ Այն մասամբ կամ ամբողջությամբ թարգմանվել է ավելի քան 2 300 լեզուներով։ Երկրագնդի բնակչության ավելի քան 90 տոկոսը կարող է կարդալ այն իր մայրենի լեզվով։

2, 3. ա) Ինչո՞ւ է խառնաշփոթ տիրում Աստվածաշնչի ուսուցումների հետ կապված։ բ) Ի՞նչ հարցեր կքննարկենք։

² Միլիոնավոր մարդիկ ամեն օր կարդում են Աստվածաշունչը։ Ոմանք ծայրից ծայր կարդացել են այն մի քանի անգամ։ Հազարավոր կրոնական խմբեր պնդում են, թե իրենց ուսուցումները հիմնված են Աստվածաշնչի վրա, սակայն նրանք համաձայն չեն մյուս կրոնական խմբերի սովորեցրածի հետ, որոնք նույնպես ասում են, թե իրենց ուսմունքները հիմնված են Աստծու Խոսքի վրա։ Խառնաշփոթն ավելի է մեծանում, երբ միևնույն կրոնի անդամների միջև լուրջ տարաձայնություններ են առաջ գալիս։ Ոմանք կասկածներ ունեն Աստվածաշնչի, նրա ծագման և արժեքավոր լինելու վերաբերյալ։ Շատերն այն սուրբ գիրք են համարում պարզապես այնպիսի արարողությունների համար, ինչպիսիք են՝ երդումներ տալը կամ դատարանում միայն ճշմարտությունն ասելու խոստում տալը։

³ Իրականում, Աստվածաշունչը պարունակում է Աստծու զորավոր խոսքը, կամ՝ պատգամը՝ ուղղված մարդկությանը (Եբրայեցիս 4։12)։ Ուստի մենք՝ Եհովայի վկաներս, ցանկանում ենք, որ մարդիկ իմանան, թե ինչ է սովորեցնում Աստվածաշունչը։ Մենք ուրախ ենք, որ կարող ենք կատարել Հիսուս Քրիստոսի պատվերը, որը նա տվեց իր հետևորդներին՝ ասելով. «Գնացէք .... բոլոր ազգերը աշակերտեցէք [«աշակերտնե՛ր դարձրեք», ՆԱ] .... նորանց սովորեցնելով» (Մատթէոս 28։19, 20)։ Քարոզչական ծառայության ժամանակ մենք հանդիպում ենք ազնվասիրտ մարդկանց, որոնց մտահոգում է այսօրվա աշխարհում տիրող կրոնական խառնաշփոթը։ Նրանք ուզում են իմանալ ճշմարտությունը մեր Արարչի մասին, նաև այն, թե ինչ է ասում Աստվածաշունչը կյանքի իմաստի վերաբերյալ։ Եկեք քննարկենք երեք հարց, որոնք հետաքրքրում են շատերին։ Յուրաքանչյուր հարց քննարկելիս մենք ուշադրություն կդարձնենք նրան, թե ինչ սխալ բաներ են սովորեցնում կրոնական առաջնորդները, այնուհետև կքննարկենք, թե ինչ է սովորեցնում Աստվածաշունչը իրականում։ Այդ հարցերն են. 1) արդյոք Աստված հոգ տանո՞ւմ է մեր մասին։ 2) Ինչո՞ւ ենք մենք այստեղ։ 3) Ի՞նչ է տեղի ունենում մահվան ժամանակ։

Աստված հոգ տանո՞ւմ է մեր մասին

4, 5. Ինչո՞ւ են մարդիկ կարծում, որ Աստված հոգ չի տանում մեր մասին։

⁴ Եկեք սկսենք այն հարցից, թե արդյոք Աստված հոգ տանո՞ւմ է մեր մասին։ Ցավոք, շատերն այն կարծիքին են, որ՝ ոչ։ Ինչո՞ւ են այդպես կարծում։ Պատճառներից մեկն այն է, որ նրանք ապրում են ատելությամբ, պատերազմներով և տառապանքով լի աշխարհում։ Նրանք մտածում են. «Եթե իսկապես Աստված հոգ տաներ մեր մասին, ապա թույլ չէր տա, որ նման ողբերգություններ տեղի ունենային»։

⁵ Մեկ այլ պատճառն էլ, թե ինչու են մարդիկ կարծում, որ Աստված հոգ չի տանում մեր մասին, այն է, որ կրոնական առաջնորդներն են այդպես սովորեցնում։ Ի՞նչ են հաճախ ասում հոգևորականները, երբ ողբերգություն է պատահում։ Երբ մի կին ավտովթարի ժամանակ կորցրեց իր երկու փոքր երեխաներին, եկեղեցու ծառայողն ասաց. «Դա Աստծու կամքն էր։ Աստծուն պետք էր երկու հրեշտակ ևս»։ Երբ հոգևորականներն այդպիսի մտքեր են արտահայտում, փաստորեն, նրանք Աստծուն են մեղադրում այն ողբերգությունների համար, որ տեղի են ունենում։ Սակայն Հակոբոս աշակերտը գրել է. «Ոչ ով, որ փորձութեան մէջ է, չ’ասէ թէ Աստուածանից եմ փորձվում. որովհետեւ Աստուած չար բաներով չէ փորձվում. ինքն էլ ոչ մէկին չէ փորձում» (Յակոբոս 1։13)։ Եհովա Աստված երբեք չար բաների պատճառ չի լինում։ Իրոք, «քաւ լիցի որ Աստուած չարութիւն անէ» (Յոբ 34։10)։

6. Ո՞վ է կանգնած աշխարհում տիրող չարության և տառապանքի ետևում։

⁶ Այդ դեպքում ինչո՞ւ այսքան շատ չարություն և տառապանք գոյություն ունի։ Պատճառներից մեկն այն է, որ մարդկությունն ընդհանուր առմամբ մերժել է Աստծուն՝ որպես Կառավարչի, և չի ցանկանում ենթարկվել նրա արդար օրենքներին ու սկզբունքներին։ Մարդիկ անգիտակցորեն ենթարկվում են Աստծու Հակառակորդին՝ Սատանային, քանի որ «բոլոր աշխարհքը չարութեան մէջ է կենում [«Չարի իշխանության տակ է», ՆԱ]» (Ա Յովհաննէս 5։19)։ Այս փաստն իմանալը մեզ կօգնի, որ ավելի հեշտությամբ հասկանանք, թե ինչու են վատ իրավիճակներ տիրում։ Սատանան չար է, լցված է ատելությամբ, խաբեբա է և դաժան։ Ուստի մենք պետք է ակնկալենք, որ աշխարհը կարտացոլի իր ղեկավարի էությունն ու հատկությունները։ Զարմանալի չէ, որ այսքան շատ չարություն գոյություն ունի։

7. Որո՞նք են տառապանքի պատճառներից մի քանիսը։

⁷ Մեր կրած տառապանքների մյուս պատճառը մարդկային անկատարությունն է։ Անկատար մարդիկ ձգտում են իշխանության, ինչը հաճախ հանգեցնում է պատերազմների, ճնշումների և տառապանքի։ Ինչպես ասվում է Ժողովող 8։9–ում, «մարդ մարդի վերայ իշխում է իր վնասի համար»։ Տառապանքի մեկ այլ պատճառն էլ այն է, որ «ժամանակ եւ դիպուած է պատահում» (Ժողովող 9։11)։ Հաճախ մարդկանց դժբախտություն է պատահում, քանի որ նրանք հայտնվում են սխալ ժամանակ սխալ տեղում։

8, 9. Որտեղի՞ց գիտենք, որ Աստված իրականում հոգ է տանում մեր մասին։

⁸ Մխիթարական է իմանալ, որ Եհովան չէ տառապանքի պատճառը։ Սակայն իրո՞ք Աստծուն մտահոգում է այն, ինչ տեղի է ունենում մեր կյանքում։ Այո՛, և դա սիրտ է ջերմացնում։ Մենք գիտենք, որ Եհովան անտարբեր չէ մեր հանդեպ, քանի որ նրա ներշնչյալ Խոսքն ասում է, թե ինչու է նա թույլ տվել, որ մարդիկ վատ ընթացք բռնեն։ Դրա համար նա երկու պատճառ ունի՝ իր գերիշխանության և մարդկանց անարատության հարցը։ Քանի որ Եհովան ամենակարող Արարիչն է, նա պարտավոր չէ մեզ ասել, թե ինչու է թույլ տալիս տառապանքը։ Այնուհանդերձ, նա հայտնում է մեզ այդ մասին, քանի որ հոգ է տանում մեր մասին։

⁹ Քննենք մեկ այլ փաստ, որը ցույց է տալիս, որ Աստված հոգ է տանում մեր մասին։ Երբ Նոյի օրերում չարությունը լցրեց աշխարհը, Աստված «իր սրտի մէջ տրտմեց» (Ծննդոց 6։5, 6)։ Մի՞թե նրա զգացումները փոխվել են այսօր։ Ո՛չ, որովհետև նա չի փոխվում (Մաղաքիա 3։6)։ Աստված ատում է անարդարությունը, և նրան բոլորովին դուր չի գալիս այն, որ մարդիկ տառապում են։ Աստվածաշունչը մեզ սովորեցնում է, որ նա շուտով վերացնելու է այն վնասը, որը մարդկային իշխանության և Բանսարկուի ազդեցության հետևանքն է։ Արդյոք սա համոզիչ փաստ չէ՞, որ Աստված հոգ է տանում մեր մասին։

10. Ինչպե՞ս է Եհովան վերաբերվում մարդկանց տառապանքներին։

¹⁰ Կրոնական առաջնորդները սխալ լույսի տակ են ներկայացնում Աստծուն, երբ ասում են, որ մեզ պատահած ողբերգությունները նրա կամքով են տեղի ունենում։ Մինչդեռ իրականում Եհովան ցանկանում է վերջ տալ մարդկանց տառապանքին։ «Նա հոգս է անում ձեզ համար»,— ասվում է Ա Պետրոս 5։7–ում։ Ահա՛ թե ինչ է իրականում սովորեցնում Աստվածաշունչը։

Ինչո՞ւ ենք մենք այստեղ

11. Ի՞նչ են հաճախ սովորեցնում աշխարհի կրոնները երկրի վրա մարդու կյանքի վերաբերյալ։

¹¹ Եկեք այժմ քննարկենք երկրորդ հարցը, որը շատերին է մտահոգում. ինչո՞ւ ենք մենք այստեղ։ Աշխարհի կրոնները հաճախ սովորեցնում են, որ մարդը ժամանակավոր է երկրի վրա։ Նրանց կարծիքով՝ մեր երկրագունդը պարզապես միջանկյալ մի վայր է, կամ՝ «սանդուղք», դեպի մեկ ուրիշ վայր, որտեղ կյանքը շարունակվում է։ Որոշ հոգևորականներ սովորեցնում են, թե Աստված մի օր վերացնելու է մեր մոլորակը։ Այս ամենի հետևանքով շատերը եկել են այն եզրակացության, որ իրենց համար ավելի լավ է կյանքից լավագույնը վերցնել, քանի դեռ ի վիճակի են, որովհետև վերջիվերջո նրանց մահ է սպասում։ Իրականում ի՞նչ է սովորեցնում Աստվածաշունչը այն մասին, թե ինչու ենք մենք այստեղ։

12–14. Ի՞նչ է Աստվածաշունչը սովորեցնում երկրի և մարդկության առնչությամբ Աստծու նպատակի մասին։

¹² Աստված հրաշալի նպատակ ունի երկրի և մարդկության առնչությամբ։ Նա երկիրը «չ’ստեղծեց դարտակ, այլ բնակուելու համար ստեղծեց նորան» (Եսայիա 45։18)։ Ավելին, Եհովան «հաստատեց երկիրն իր հիմունքի վերայ, որ տեղիցը չ’շարժուի բնաւ եւ յաւիտեան» (Սաղմոս 104։5)։ Երկրի և մարդկության առնչությամբ Աստծու նպատակն իմանալը կօգնի մեզ հասկանալ, թե ինչու ենք մենք ապրում երկրի վրա։

¹³ «Ծննդոց» գրքի 1–ին և 2–րդ գլուխները ցույց են տալիս, որ Եհովան մեծ հոգատարությամբ էր պատրաստել երկիրը մարդկանց համար։ Արարչագործության շրջանի վերջում, որի ժամանակ ստեղծվել էր նաև մեր մոլորակը, ամեն ինչ «շատ բարի էր» (Ծննդոց 1։31)։ Աստված առաջին տղամարդուն և կնոջը՝ Ադամին ու Եվային, բնակեցրեց գեղեցիկ Եդեմի պարտեզում և նրանց առատ ու համեղ ուտելիքով ապահովեց։ Առաջին զույգին նա ասաց. «Աճեցէք եւ շատացէք, եւ լցրէք երկիրը, եւ տիրեցէք նորան»։ Նրանք պետք է կատարյալ երեխաներ ունենային, ընդարձակեին իրենց պարտեզի սահմանները մինչև երկրի ծայրերը և սիրով իշխեին կենդանիների վրա (Ծննդոց 1։26–28)։

¹⁴ Եհովայի նպատակն է, որ մարդկային կատարյալ ընտանիքը հավիտյան բնակվի երկրի վրա։ Աստծու Խոսքում ասվում է. «Արդարները երկիրը կ’ժառանգեն, եւ յաւիտեան կ’բնակուին նորանում» (Սաղմոս 37։29)։ Այո՛, մարդկությունը պետք է հավիտենական կյանք վայելեր երկրային Դրախտում։ Սա է Աստծու նպատակը, և հենց սա է իրականում սովորեցնում Աստվածաշունչը։

Ի՞նչ է տեղի ունենում մահվան ժամանակ

15. Ի՞նչ են սովորեցնում աշխարհի կրոնների մեծ մասն այն մասին, թե ինչ է տեղի ունենում մահվան ժամանակ։

¹⁵ Այժմ եկեք քննենք երրորդ հարցը, որը նույնպես մտահոգում է շատերին. ի՞նչ է տեղի ունենում մահվան ժամանակ։ Աշխարհի կրոնների մեծ մասը սովորեցնում է, որ մարդու մեջ եղող ինչ–որ բան շարունակում է ապրել մարմնի մահից հետո։ Որոշ կրոնական խմբեր հավատում են, թե Աստված պատժում է չարերին՝ հավիտյան տանջելով նրանց կրակե դժոխքում։ Արդյոք դա ճի՞շտ է։ Ի՞նչ է իրականում սովորեցնում Աստվածաշունչը մահվան մասին։

16, 17. Ըստ Աստվածաշնչի՝ ի՞նչ վիճակում են գտնվում մահացածները։

¹⁶ Աստծու Խոսքում ասվում է. «Կենդանիները գիտեն որ մեռնելու են, բայց մեռելները մի բան չ’գիտեն եւ վարձք էլ չ’ունին»։ Քանի որ մահացածները «մի բան չ’գիտեն», նրանք չեն կարող լսել, տեսնել, խոսել, զգալ և մտածել։ Նրանք «վարձք էլ չ’ունին»։ Ինչպե՞ս կարող են ունենալ։ Չէ՞ որ նրանք որևէ գործ անելու կարողություն չունեն։ Բացի այդ, «նորանց սէրն էլ, նորանց ատելութիւնն էլ, նորանց նախանձն էլ վաղուց է փչացել», քանի որ նրանք ոչ մի զգացում չեն կարող արտահայտել (Ժողովող 9։5, 6, 10)։

¹⁷ Այս հարցի վերաբերյալ Աստվածաշնչի տեսակետը պարզ է ու հստակ. մահացածները չեն շարունակում ապրել մեկ այլ վայրում։ Մահվան ժամանակ ոչինչ դուրս չի գալիս մարդու մարմնից և չի շարունակում ապրել՝ փոխադրվելով ուրիշ մարմին, ինչպես սովորեցնում են վերամարմնավորման գաղափարի կողմնակիցները։ Դա կարելի է պարզաբանել հետևյալ օրինակով. մեր կյանքը նման է վառվող մոմի կրակին։ Երբ կրակը հանգչում է, այն ոչ մի տեղ չի գնում։ Այն պարզապես դադարում է գոյություն ունենալուց։

18. Ի՞նչ եզրակացություններ կարող է անել Աստվածաշունչ ուսումնասիրողը, երբ սովորի, որ մահացածներն անգիտակից վիճակում են գտնվում։

¹⁸ Մտածիր, թե ինչ է նշանակում այդ պարզ, բայց զորավոր ճշմարտությունը։ Երբ Աստվածաշունչ ուսումնասիրողը սովորի, որ մահացածներն անգիտակից վիճակում են գտնվում, նա կարող է հեշտությամբ եզրակացնել, որ անկախ նրանից, թե որքան զայրացկոտ կամ վիրավորված են եղել իր նախնիները կենդանի ժամանակ, նրանք չեն կարող անհանգստացնել իրեն։ Նա նաև արագորեն կհասկանա, որ իր մահացած սիրելիները այլևս չեն կարող լսել, տեսնել, խոսել, զգալ կամ մտածել։ Հետևաբար այդ մահացածները չեն տառապում քավարանում միայնության ծանր զգացումից և ոչ էլ տանջվում են կրակե դժոխքում։ Սակայն Աստվածաշունչը սովորեցնում է, որ Աստծու հիշողության մեջ գտնվող մահացածները հարություն են առնելու։ Ի՜նչ հրաշալի հույս (Յովհաննէս 5։28, 29)։

Նոր գիրք մեզ համար

19, 20. Ի՞նչ պատասխանատվություն ունենք մենք՝ քրիստոնյաներս, և Աստվածաշնչի ուսումնասիրության ի՞նչ ձեռնարկ է լույս տեսել մեր ծառայության համար։

¹⁹ Մենք քննարկեցինք ընդամենը երեք հարց, որոնք մտահոգում են մարդկանց։ Յուրաքանչյուր հարցի վերաբերյալ Աստվածաշնչի տեսակետը պարզ է և ճշգրիտ։ Որքա՜ն մեծ ուրախություն ենք ստանում, երբ այս ճշմարտությունները պատմում ենք նրանց, ովքեր ցանկանում են իմանալ, թե ինչ է սովորեցնում Աստվածաշունչը։ Ուրիշ կարևոր հարցեր էլ կան, որոնց պատասխաններն անկեղծ սիրտ ունեցող մարդիկ ուզում են ստանալ։ Մեր՝ քրիստոնյաներիս, պատասխանատվությունն է օգնել նրանց գտնելու այդ հարցերի պատասխանները։

²⁰ Հեշտ չէ աստվածաշնչյան ճշմարտությունը մարդկանց սովորեցնել այնպես, որ այն պարզ լինի և հասնի նրանց սրտերին։ Ուստի «հաւատարիմ եւ իմաստուն ծառան» մեզ համար պատրաստել է մի գիրք, որը նախատեսված է ծառայության մեջ օգտագործելու համար (Մատթէոս 24։45–47)։ Այդ 224 էջանոց գրքի վերնագիրն է՝ «Ի՞նչ է սովորեցնում Աստվածաշունչը իրականում»։

21, 22. Որո՞նք են «Ի՞նչ է սովորեցնում Աստվածաշունչը իրականում» գրքի առանձնահատկություններից մի քանիսը, որ ուշադրության են արժանի։

²¹ Այս գրքի թողարկման մասին հայտարարվեց Եհովայի վկաների՝ 2005–2006 թթ. «Աստվածահաճո հնազանդություն» մարզային համաժողովի ժամանակ։ Այն ունի ուշադրության արժանի տարբեր առանձնահատկություններ։ Օրինակ՝ նախաբանը կազմված է հինգ էջից, և նրա օգնությամբ կարելի է Աստվածաշնչի տնային ուսումնասիրություններ սկսել։ Հավանաբար ձեզ համար հեշտ կլինի քննարկել նախաբանի նկարները և սուրբգրային համարները։ Դուք կարող եք նաև օգտագործել այս հատվածում եղած տեղեկությունները՝ Աստվածաշունչ ուսումնասիրողներին ցույց տալու համար, թե ինչպես կարելի է գտնել Աստվածաշնչի գլուխներն ու համարները։

²² Այս գիրքը գրվել է պարզ և մատչելի լեզվով։ Ջանքեր են գործադրվել, որ հնարավոր լինի ուսումնասիրողին քննարկման մեջ ներգրավել և այդպիսով հասնել նրա սրտին։ Յուրաքանչյուր գլուխ սկսվում է մի քանի ներածական հարցերով և վերջանում մի շրջանակով, որի վերնագիրն է՝ «Ահա թե ինչ է սովորեցնում Աստվածաշունչը»։ Այդ շրջանակում տրվում են ներածական հարցերի սուրբգրային պատասխանները։ Գրքում զետեղված հիանալի նկարները և դրանց վերաբերյալ մակագրությունները, ինչպես նաև տեքստում բերված օրինակները կօգնեն Աստվածաշունչ ուսումնասիրողին հասկանալ նոր մտքերը։ Թեև տեքստը բավականին պարզ է շարադրված, սակայն գրքում կա նաև հավելված, որը կօգնի ձեզ մանրամասնորեն քննարկել 14 կարևոր հարցեր, եթե, իհարկե, ուսումնասիրողը հավելյալ տեղեկությունների կարիք ունի։

23. Ի՞նչ խորհուրդներ են տրվում «Աստվածաշունչը սովորեցնում է» գրքի օգնությամբ ուսումնասիրություն անցկացնելու վերաբերյալ։

²³ «Աստվածաշունչը սովորեցնում է» գիրքը նախատեսված է այն բանի համար, որ մենք կարողանանք ուսուցանել տարբեր կրթություն ունեցող և տարբեր կրոնների պատկանող մարդկանց։ Եթե անհատն ընդհանրապես ծանոթ չէ Աստվածաշնչին, գուցե հարկ լինի մեկ գլուխը ուսումնասիրել մի քանի հանդիպումների ընթացքում։ Մի շտապիր պարզապես անցնել նյութը, այլ աշխատիր հասնել ուսումնասիրողի սրտին։ Եթե նա չի հասկանում գրքում բերված օրինակը, ապա բացատրիր այն կամ մեկ ուրիշ օրինակ բեր։ Լավ նախապատրաստվիր, հնարավոր ամեն բան արա, որ գիրքն արդյունավետորեն օգտագործես, և աղոթիր Աստծուն օգնության համար, որ կարողանաս «ճշմարտութեան խօսքն ուղիղ մատակարարե[լ]» (Բ Տիմոթէոս 2։15)։

Երախտապարտ եղիր քո անգին առանձնաշնորհումների համար

24, 25. Ի՞նչ անգին առանձնաշնորհումներ է Եհովան տվել իր ժողովրդին։

²⁴ Եհովան իր ժողովրդին անգին առանձնաշնորհումներ է տվել։ Նա օգնել է մեզ սովորել ճշմարտությունն իր մասին։ Մենք երբեք չպետք է դա սովորական բան համարենք։ Աստված թաքցրել է իր նպատակները հպարտ մարդկանցից և դրանք հայտնի է դարձրել հեզ անհատներին։ Այդ մասին Հիսուսն ասաց. «Գոհանում եմ քեզանից, ով Հայր՝ երկնքի եւ երկրի Տէր, որ իմաստուններիցն եւ գիտուններիցն այս բաները ծածկեցիր եւ երեխաներին յայտնեցիր» (Մատթէոս 11։25)։ Մեզ համար առանձնահատուկ պատիվ է լինել հեզ անհատների թվում, որոնք ծառայում են Տիեզերքի Գերիշխանին՝ Եհովային։

²⁵ Աստված նաև մեզ տվել է ուրիշներին իր մասին սովորեցնելու առանձնաշնորհումը։ Հիշիր, որ Աստծուն սխալ լույսի ներքո են ներկայացրել նրանք, ովքեր սուտ բաներ են սովորեցրել նրա մասին։ Դա է պատճառը, որ շատ մարդիկ բոլորովին սխալ կարծիք ունեն Եհովայի մասին՝ մտածելով, թե նա անտարբեր է մարդկանց նկատմամբ և անգութ է։ Ունե՞ս արդյոք մեծ ցանկություն օգնելու մարդկանց ուղղել իրենց այդ սխալ տեսակետը։ Ցանկանո՞ւմ ես, որ բոլոր անկեղծ սիրտ ունեցող մարդիկ իմանան Աստծու մասին ճշմարտությունը։ Եթե այո, ապա ջանք մի խնայիր ցույց տալու քո աստվածահաճո հնազանդությունը՝ եռանդորեն քարոզելով և ուրիշներին ուսուցանելով այն, ինչ սովորեցնում են Գրությունները այս կարևոր հարցերի վերաբերյալ։ Ճշմարտությունը փնտրող անհատները կարիք ունեն իմանալու, թե ինչ է իրականում սովորեցնում Աստվածաշունչը։

Ինչպե՞ս կպատասխանեիք

• Որտեղի՞ց գիտենք, որ Աստված հոգ է տանում մեր մասին։

• Ինչո՞ւ ենք մենք այստեղ՝ երկրի վրա։

• Ի՞նչ է տեղի ունենում մահվան ժամանակ։

• «Աստվածաշունչը սովորեցնում է» գրքի ո՞ր առանձնահատկություններն են քեզ հատկապես դուր գալիս։

[նկարներ 22–րդ էջի վրա]

Աստվածաշունչը սովորեցնում է, որ տառապանքին վերջ է տրվելու

[թույլտվությամբ]

Top right, girl: © Bruno Morandi/age fotostock; left, woman: AP Photo/Gemunu Amarasinghe; bottom right, refugees: © Sven Torfinn/Panos Pictures

[նկար 23–րդ էջի վրա]

Արդարները հավիտյան ապրելու են Դրախտում