Օգնենք մարդկանց հնազանդվելու այն ամենին, ինչ սովորեցնում է Աստվածաշունչը

«Այն պարարտ երկրի միջինը, նորանք են, որ բարի եւ յոժար սրտով խօսքը լսում եւ ընդունում են, եւ համբերութիւնով պտուղ են տալիս» (ՂՈՒԿԱՍ 8։15)։

1, 2. ա) Ի՞նչ նպատակով է լույս տեսել «Ի՞նչ է սովորեցնում Աստվածաշունչը իրականում» գիրքը։ բ) Ինչպե՞ս է Եհովան վերջին տարիներին օրհնել իր ժողովրդի ջանքերը աշակերտներ պատրաստելու գործում։

«ՍԱ ԻՍԿԱՊԵՍ հրաշալի գիրք է։ Այն շատ է դուր գալիս նրանց, ում հետ ուսումնասիրում եմ Աստվածաշունչը։ Ինձ նույնպես դուր է գալիս այդ գիրքը։ Այն հնարավորություն է տալիս Աստվածաշնչի ուսումնասիրություն սկսել մարդկանց հետ հենց դռան շեմին»։ Այսպիսի խոսքեր ասաց Եհովայի վկաների մի լիաժամ ծառայող «Ի՞նչ է սովորեցնում Աստվածաշունչը իրականում»a գրքի վերաբերյալ։ Նույն գրքի մասին մի տարեց քարոզիչ ասաց. «50 տարիների իմ ծառայության ընթացքում ես առանձնաշնորհում եմ ունեցել օգնելու շատերին ճանաչել Եհովային։ Եվ պետք է ասեմ, որ ուսումնասիրության այս ձեռնարկը բացառիկ է։ Տպավորիչ են հատկապես հիանալի օրինակներն ու նկարները»։ Իսկ քեզ դո՞ւր է գալիս «Աստվածաշունչը սովորեցնում է» գիրքը։ Աստվածաշնչի ուսումնասիրության այս ձեռնարկը նախատեսված է այն բանի համար, որ մենք կարողանանք կատարել Հիսուսի հետևյալ պատվերը. «Գնացէք բոլոր ազգերը աշակերտեցէք [«աշակերտնե՛ր դարձրեք», ՆԱ] .... նորանց սովորեցնելով, որ ամեն ինչ որ ձեզ պատուիրեցի՝ պահեն» (Մատթէոս 28։19, 20)։

² Անշուշտ, Եհովայի սիրտը լցվում է ուրախությամբ, երբ նա տեսնում է, թե ինչպես են իր Վկաները, որոնց թիվը հասնում է մոտ 6,6 միլիոնի, սիրահոժար կերպով հնազանդվում աշակերտներ պատրաստելու վերաբերյալ Հիսուսի պատվերին (Առակաց 27։11)։ Ակնհայտ է, որ Եհովան օրհնում է նրանց ջանքերը։ Օրինակ՝ 2005 թ. ծառայողական տարվա ընթացքում բարի լուրը քարոզվել է 235 երկրներում, և ավելի քան 6 061 500 Աստվածաշնչի ուսումնասիրություն է անցկացվել։ Արդյունքում՝ շատ մարդիկ լսել և ընդունել են Աստծու խոսքը «ոչ թէ իբր մարդկանց խօսք, այլ ինչպէս որ ճշմարիտ է՝ Աստուծոյ խօսք» (Ա Թեսաղոնիկեցիս 2։13)։ Վերջին երկու տարիներին ավելի քան կես միլիոն նոր աշակերտներ իրենց կյանքը ներդաշնակեցրել են Եհովայի չափանիշներին և նվիրվել Աստծուն։

3. «Աստվածաշունչը սովորեցնում է» գիրքն օգտագործելու վերաբերյալ ի՞նչ հարցեր կքննարկենք այս հոդվածում։

³ Վերջերս որևէ մեկի հետ Աստվածաշնչի ուսումնասիրություն անցկացրե՞լ ես։ Ամբողջ աշխարհում դեռ կան «բարի եւ յոժար սրտով» անհատներ, ովքեր, լսելով Աստծու խոսքը, ‘կընդունեն այն և համբերությունով պտուղ կտան’ (Ղուկաս 8։11–15)։ Եկեք տեսնենք, թե ինչպես կարող ենք օգտագործել «Աստվածաշունչը սովորեցնում է» գիրքը աշակերտներ պատրաստելու գործում։ Մենք կքննարկենք երեք հարց. 1) ինչպե՞ս կարող ես Աստվածաշնչի ուսումնասիրություն սկսել։ 2) Որո՞նք են ուսուցանելու ամենաարդյունավետ մեթոդները։ 3) Ինչպե՞ս կարող ես օգնել անհատին ոչ միայն ուսումնասիրել Աստվածաշունչը, այլև դառնալ Աստծու գրավոր Խոսքի ուսուցիչ։

Ինչպես Աստվածաշնչի ուսումնասիրություն սկսել

4. Ինչո՞ւ ոմանք գուցե վարանեն Աստվածաշնչի ուսումնասիրություն սկսել, և ինչպե՞ս կարող ես օգնել նրանց։

⁴ Եթե քեզ առաջարկեին ընդամենը մեկ ցատկով անցնել մի լայն գետակ, գուցե մերժեիր այդ առաջարկը։ Սակայն եթե գետակի լայնքով իրարից հավասար հեռավորության վրա անցաքարեր դրվեին, թերևս համաձայնվեիր։ Նմանապես, զբաղված անհատը կարող է վարանել Աստվածաշնչի ուսումնասիրություն սկսել։ Նա կարող է մտածել, թե Աստվածաշունչ ուսումնասիրելու համար շատ ժամանակ և ջանք է պահանջվում։ Ինչպե՞ս կարող ես օգնել նրան։ «Աստվածաշունչը սովորեցնում է» գրքի օգնությամբ մի շարք կարճ և բովանդակալից քննարկումներ անցկացնելով՝ դու կկարողանաս նրա հետ կանոնավորաբար ուսումնասիրել Աստվածաշունչը։ Եթե լավ նախապատրաստվես, ապա անհատին կատարած ամեն մի այցելություն կծառայի նրա համար որպես «անցաքար» Եհովայի հետ մտերմություն հաստատելու ճանապարհին։

5. Ինչո՞ւ լավ կլինի, որ ինքդ կարդաս «Աստվածաշունչը սովորեցնում է» գիրքը։

⁵ Սակայն որևէ մեկին «Աստվածաշունչը սովորեցնում է» գրքով օգնելուց առաջ դու ինքդ պետք է լավ ծանոթ լինես այդ ձեռնարկին։ Կարդացե՞լ ես արդյոք այն սկզբից մինչև վերջ։ Մի ամուսնական զույգ արձակուրդ մեկնելիս իր հետ վերցրեց այս գիրքը։ Նրանք սկսեցին կարդալ այն ծովափին հանգստանալիս։ Երբ նրանց մոտեցավ մի կին, որը տարբեր իրեր էր վաճառում զբոսաշրջիկներին, նկատեց «Ի՞նչ է սովորեցնում Աստվածաշունչը իրականում» գրքի վերնագիրը։ Նա ասաց ամուսիններին, որ ընդամենը մի քանի ժամ առաջ աղոթում էր Աստծուն՝ խնդրելով նրանից հենց այդ հարցի պատասխանը։ Ամուսիններն ուրախությամբ տվեցին այդ կնոջը իրենց գիրքը։ Իսկ դու ‘գնե՞լ ես ժամանակը’ գիրքն ընթերցելու համար, թերևս նույնիսկ երկրորդ անգամ։ Դա կարող ես անել ինչ–որ մեկին սպասելիս կամ աշխատավայրում ու դպրոցում ընդմիջումների ժամանակ (Եփեսացիս 5։15, 16)։ Եթե ծանոթ լինես գրքին, ապա կկարողանաս ուրիշներին էլ ծանոթացնել նրա բովանդակությանը։

6, 7. Ինչպե՞ս կարող ես օգտագործել «Աստվածաշունչը սովորեցնում է» գիրքը ուսումնասիրություն սկսելու համար։

⁶ Քարոզչական ծառայության ժամանակ գիրքն առաջարկելիս արդյունավետորեն օգտագործիր 4–րդ, 5–րդ և 6–րդ էջերում տեղ գտած նկարները, սուրբգրային համարներն ու հարցերը։ Օրինակ՝ կարող ես զրույցն այսպես սկսել. «Այսօր մարդկությունը բազմաթիվ խնդիրների է բախվում։ Ձեր կարծիքով՝ կա՞ արդյոք առաջնորդության վստահելի աղբյուր»։ Ուշադրությամբ լսիր անհատի պատասխանը, ապա կարդա Բ Տիմոթէոս 3։16, 17 համարները և բացատրիր, որ Աստվածաշունչը մարդկանց խնդիրները լուծելու գործնական միջոց է առաջարկում։ Այնուհետև նրա ուշադրությունը հրավիրիր 4–րդ և 5–րդ էջերի վրա և հարցրու. «Այս էջերում պատկերված իրավիճակներից ո՞րն է ավելի շատ մտահոգում ձեզ»։ Երբ անհատը ցույց տա, թե որ իրավիճակն է իրեն մտահոգում, խնդրիր նրան պահել գիրքը, իսկ դու քո Աստվածաշնչից կարդա համապատասխան սուրբգրային համարը։ Ապա կարդա 6–րդ էջում գրվածը և հարցրու. «Այստեղ նշված վեց հարցերից որի՞ պատասխանը կուզեիք իմանալ»։ Երբ նա ընտրի հարցերից որևէ մեկը, ցույց տուր այն գլուխը, որում տրվում է հարցի պատասխանը, առաջարկիր նրան վերցնել գիրքը և պայմանավորվիր վերայցելել ու քննարկել այդ հարցը։

⁷ Վերոհիշյալ մատուցումը կարելի է ներկայացնել ընդամենը հինգ րոպեում։ Սակայն այդ մի քանի րոպեների ընթացքում դու կիմանաս, թե ինչն է մտահոգում անհատին, կկարողանաս կարդալ երկու սուրբգրային համար և ցույց տալ դրանց կիրառությունը, ինչպես նաև վերայցելության համար հիմք նախապատրաստել։ Այդ կարճ զրույցը տանտիրոջ համար կարող է շատ քաջալերական ու մխիթարական լինել։ Նման զրույց նա թերևս վաղուց չի ունեցել։ Արդյունքում՝ շատ հավանական է, որ նույնիսկ զբաղված անհատը հաճույքով ցանկանա մի քանի րոպե տրամադրել քեզ, և դու կկարողանաս օգնել նրան կատարելու իր հաջորդ քայլը դեպի այն «ճանապարհը, որ տանում է կեանքը» (Մատթէոս 7։14)։ Ժամանակի ընթացքում, երբ տանտիրոջ հետաքրքրությունը մեծանա, կարելի է ավելի երկար ուսումնասիրել։ Դա կարող ես անել՝ առաջարկելով անհատին միասին նստել և ուսումնասիրությանը ավելի շատ ժամանակ տրամադրել՝ նշելով, թե կոնկրետ որքան։

Ուսուցանելու ամենաարդյունավետ մեթոդները

8, 9. ա) Ինչպե՞ս կարող ես օգնել Աստվածաշունչ ուսումնասիրողին, որ հաստատուն մնա դժվարությունների ու փորձությունների բախվելիս։ բ) Որտե՞ղ կարելի է հրակայուն նյութեր գտնել ամուր հավատ կառուցելու համար։

⁸ Երբ անհատը սկսի հնազանդվել այն ամենին, ինչ սովորեցնում է Աստվածաշունչը, նա, հավանաբար, կբախվի դժվարությունների, որոնք կարող են խոչընդոտել նրա հոգևոր առաջադիմությանը։ Պողոս առաքյալն ասաց. «Ամենը որ կամենում են աստուածպաշտութեամբ ապրիլ Քրիստոս Յիսուսումը, հալածանք պիտի կրեն» (Բ Տիմոթէոս 3։12)։ Պողոսը փորձությունները համեմատեց կրակի հետ, որը կարող է ոչնչացնել ցածրորակ շինանյութերը, սակայն չի կարող վնասել ոսկին, արծաթը և թանկարժեք քարերը (Ա Կորնթացիս 3։10–13; Ա Պետրոս 1։6, 7)։ Որպեսզի Աստվածաշունչ ուսումնասիրողը զարգացնի այնպիսի հատկություններ, որոնք անհրաժեշտ են դիմակայելու փորձություններին, որոնց նա գուցե բախվի, դու պետք է օգնես նրան՝ կառուցելիս օգտագործելով հրակայուն նյութեր։

⁹ Սաղմոսերգուն Եհովայի խոսքերը նմանեցնում է «արծաթ[ի] որ բովի մէջ երկրի վերայ սրբուած եւ եօթն անգամ պարզուած է» (Սաղմոս 12։6)։ Այո, Աստվածաշնչում կարելի է գտնել բոլոր թանկարժեք «նյութերը», որոնք անհրաժեշտ են ամուր հավատ կառուցելու համար (Սաղմոս 19։7–11; Առակաց 2։1–6)։ Իսկ Աստվածաշունչն արդյունավետորեն օգտագործելու հարցում մեզ կօգնի «Աստվածաշունչը սովորեցնում է» գիրքը։

10. Ինչպե՞ս կարող ես ուսումնասիրողի ուշադրությունը կենտրոնացնել Աստվածաշնչի վրա։

¹⁰ Ուսումնասիրության ընթացքում անհատի ուշադրությունը կենտրոնացրու յուրաքանչյուր գլխում բերված սուրբգրային համարների վրա։ Հարցերի միջոցով օգնիր նրան հասկանալ գլխավոր համարները, նաև այն, թե ինչպես կարող է անձամբ կիրառել դրանք։ Պետք չէ ուղղակի կերպով ասել անհատին, թե ինչ փոփոխություններ նա պետք է կատարի իր կյանքում։ Փոխարենը՝ ընդօրինակիր Հիսուսին։ Երբ Օրենքին լավատեղյակ մի մարդ հարց տվեց նրան, նա ասաց. «Օրէնքումն ի՞նչ է գրուած, ի՞նչպէս ես կարդում»։ Երբ այդ մարդը պատասխանեց՝ հիմնվելով Գրությունների վրա, Հիսուսն օգնեց նրան տեսնել, թե ինչպես կարող է անձամբ կիրառել այդ սկզբունքը։ Նաև նա մի առակ պատմեց, որն օգնեց այդ մարդուն հասկանալ, թե ինչպես պետք է այդ սկզբունքը անդրադառնա իր կյանքի վրա (Ղուկաս 10։25–37)։ «Աստվածաշունչը սովորեցնում է» գիրքը պարունակում է բազմաթիվ պարզ օրինակներ, որոնք կարող ես գործածել օգնելու համար ուսումնասիրողին անձամբ կիրառել սուրբգրային սկզբունքները։

11. Ի՞նչ ծավալի նյութ պետք է քննարկել յուրաքանչյուր ուսումնասիրության ժամանակ։

¹¹ «Աստվածաշունչը սովորեցնում է» գիրքն Աստծու Խոսքը ներկայացնում է պարզ և մատչելի լեզվով, ճիշտ ինչպես որ Հիսուսն էր բարդ մտքերը բացատրում պարզ բառերով (Մատթէոս 7։28, 29)։ Դու էլ կարող ես հետևել Հիսուսի օրինակին։ Նյութը ներկայացրու պարզ, հստակ և ճշգրիտ ձևով։ Մի շտապիր արագորեն անցնել այն։ Փոխարենը՝ հաշվի առնելով ուսումնասիրողի հանգամանքներն ու կարողությունները՝ որոշիր, թե քանի պարբերություն կարելի է քննարկել յուրաքանչյուր ուսումնասիրության ժամանակ։ Հիսուսը գիտեր իր աշակերտների կարողությունները, ուստի չէր ծանրաբեռնում նրանց շատ տեղեկություններով, այլ տալիս էր այնքան, որքան նրանց անհրաժեշտ էր այդ ժամանակ (Յովհաննէս 16։12)։

12. Ինչպե՞ս կարելի է օգտվել հավելվածից։

¹² «Աստվածաշունչը սովորեցնում է» գրքում կա հավելված, որում քննարկվում են 14 թեմաներ։ Հաշվի առնելով ուսումնասիրողի կարիքները՝ կարող ես որոշել, թե ինչպես լավագույնս օգտագործել հավելվածը։ Օրինակ՝ եթե ուսումնասիրողը դժվարանում է հասկանալ ինչ–որ թեմա, կամ եթե նա հարցեր ունի նախկինում ունեցած իր հավատալիքների հետ կապված, թերևս բավական լինի նրա ուշադրությունը հրավիրել հավելվածի համապատասխան բաժնի վրա և առաջարկել նրան անձամբ քննել այդ թեման։ Սակայն գուցե նրա կարիքներից ելնելով՝ որոշես նրա հետ միասին քննարկել նյութը։ Հավելվածում կան կարևոր սուրբգրային թեմաներ, ինչպիսիք են՝ ««Հոգի» և «ոգի». ի՞նչ են նշանակում այս բառերն իրականում» և «Բնորոշել «Մեծ Բաբելոնը»»։ Գուցե ցանկանաս այս թեմաները քննարկել ուսումնասիրողի հետ միասին։ Քանի որ հավելվածում տրված նյութերը քննարկելու համար հարցեր չկան, դու պետք է ծանոթ լինես այդ նյութին, որպեսզի իմաստալից հարցեր կազմես։

13. Ի՞նչ դեր է խաղում աղոթքը հավատն ամրացնելու հարցում։

¹³ «Եթէ Տէրը չ’շինէ տունը՝ զուր են աշխատում նորա շինողները»,— ասվում է Սաղմոս 127։1–ում։ Ուստի երբ պատրաստվում ես Աստվածաշնչի ուսումնասիրություն անցկացնել, աղոթիր Եհովայից օգնություն ստանալու համար։ Թող որ յուրաքանչյուր ուսումնասիրության սկզբում և վերջում ասված քո աղոթքները արտացոլեն Եհովայի հետ ունեցած քո ջերմ փոխհարաբերությունները։ Հորդորիր ուսումնասիրողին աղոթքով Եհովայից իմաստություն խնդրել նրա Խոսքը հասկանալու համար, ինչպես նաև զորություն այնտեղ տրված խորհուրդները կիրառելու համար (Յակոբոս 1։5)։ Այդպես վարվելով՝ ուսումնասիրողը կկարողանա տոկալ փորձություններին և կշարունակի ամրացնել իր հավատը։

Օգնիր ուսումնասիրողին դառնալ Աստծու Խոսքի ուսուցիչ

14. Ինչպիսի՞ առաջադիմություն պետք է անի Աստվածաշունչ ուսումնասիրողը։

¹⁴ Եթե ուսումնասիրողը հնազանդվում է Հիսուսի բոլոր պատվերներին, ապա ակնկալվում է, որ ժամանակի ընթացքում նա կդառնա Աստծու Խոսքի ուսուցիչ (Մատթէոս 28։19, 20; Գործք 1։6–8)։ Ինչպե՞ս կարող ես օգնել ուսումնասիրողին, որ այդպիսի հոգևոր առաջադիմություն անի։

15. Ինչո՞ւ է անհրաժեշտ խրախուսել ուսումնասիրողին հաճախել քրիստոնեական հանդիպումներին։

¹⁵ Առաջին իսկ ուսումնասիրությունից հրավիրիր անհատին քեզ հետ միասին հաճախել ժողովի հանդիպումներին։ Բացատրիր նրան, որ դու այդ հանդիպումների ժամանակ ես անհրաժեշտ կրթություն ստանում Աստծու Խոսքի ուսուցիչ լինելու համար։ Մի քանի անգամ յուրաքանչյուր ուսումնասիրության վերջում ժամանակ տրամադրիր պատմելու հոգևոր ծրագրի մասին, որը ներկայացվում է ժողովի տարբեր հանդիպումներին և համաժողովներին։ Ոգևորվածությամբ պատմիր այն օգուտների մասին, որ ստանում ես այդ հանդիպումներից (Եբրայեցիս 10։24, 25)։ Երբ ուսումնասիրողը սկսի կանոնավորաբար հաճախել ժողովի հանդիպումներին, հավանաբար ժամանակի ընթացքում նա կդառնա Աստծու Խոսքի ուսուցիչ։

16, 17. Որո՞նք են այն նպատակներից մի քանիսը, որ ուսումնասիրողը կարող է դնել իր առջև և ձգտել դրանց։

¹⁶ Օգնիր ուսումնասիրողին իր առջև հասանելի նպատակներ դնել։ Օրինակ՝ հորդորիր նրան, որ իր սովորածների մասին պատմի իր ընկերներին կամ բարեկամներին։ Նաև առաջարկիր նրան նպատակ դնել ամբողջությամբ կարդալու Աստվածաշունչը։ Եթե օգնես նրան Աստվածաշնչի ընթերցանության կանոնավոր գրաֆիկ ունենալ և հետևել այդ գրաֆիկին, ապա այդպիսի սովորություն ունենալը մկրտությունից հետո երկար ժամանակ կօգնի նրան։ Բացի այդ, կարելի է առաջարկել նրան նպատակ ունենալ «Աստվածաշունչը սովորեցնում է» գրքի յուրաքանչյուր գլխից անգիր սովորել առնվազն մեկ աստվածաշնչյան համար, որը պատասխանում է այնտեղ տրված գլխավոր հարցերից որևէ մեկին։ Այդպես վարվելով՝ ուսումնասիրողը կդառնա «մի մշակ առանց ամօթի, որ ճշմարտութեան խօսքն ուղիղ [է] մատակարար[ում]» (Բ Տիմոթէոս 2։15)։

¹⁷ Ուսումնասիրողին բացատրիր, որ երբ իր հավատի մասին հարցեր տան իրեն, նա չպետք է պարզապես անգիր ասի սուրբգրային համարները կամ պատմի դրանց բովանդակությունը։ Փոխարենը՝ նա պետք է ցույց տա, թե ինչպես են դրանք կապվում տվյալ հարցի հետ։ Օգտակար կլինի ուսումնասիրողի հետ միասին մի քանի անգամ փորձել զրույց վարել, որի ժամանակ դու բարեկամի կամ աշխատակցի դերն ես տանում և հարցնում ես նրան իր հավատալիքների մասին։ Երբ ուսումնասիրողը պատասխանում է իրեն տրված հարցին, ցույց տուր նրան, թե ինչպես կարող է դա անել «հեզութեամբ եւ երկիւղածութեամբ» (Ա Պետրոս 3։15)։

18. Երբ ուսումնասիրողը դառնա չմկրտված քարոզիչ, ինչպե՞ս կարող ես շարունակել օգնել նրան։

¹⁸ Ժամանակի ընթացքում հնարավոր է ուսումնասիրողը պատրաստ լինի քարոզչական ծառայությանը մասնակցելու։ Ընդգծիր, որ այդ գործը կատարելու հնարավորություն ունենալը առանձնաշնորհում է (Բ Կորնթացիս 4։1, 7)։ Եթե երեցները որոշեն, որ նա համապատասխանում է չմկրտված քարոզիչ լինելու պահանջներին, օգնիր նրան մի պարզ մատուցում պատրաստել, և միասին գնացեք քարոզչական ծառայության։ Շարունակիր օգնել նրան ծառայության տարբեր բնագավառներում և սովորեցրու, թե ինչպես կարելի է նախապատրաստվել և արդյունավետ վերայցելություններ անել։ Քո լավ օրինակը դրական ազդեցություն կթողնի նրա վրա (Ղուկաս 6։40)։

«Քո անձն էլ կ’ապրեցնես, եւ քեզ լսողներին էլ»

19, 20. Ի՞նչ նպատակ պետք է դնենք մեր առջև և ինչո՞ւ։

¹⁹ Ինչ խոսք, մեծ ջանքեր են գործադրվում, որպեսզի անհատը «ճշմարտութեան գիտութեանը» գա (Ա Տիմոթէոս 2։4)։ Սակայն մենք մեծ ուրախություն ենք ստանում՝ օգնելով ինչ–որ մեկին հնազանդվել այն ամենին, ինչ սովորեցնում է Աստվածաշունչը, և կյանքում քիչ բաներ կան, որ կարող են այդպիսի ուրախություն են պատճառել (Ա Թեսաղոնիկեցիս 2։19, 20)։ Ի՜նչ մեծ առանձնաշնորհում է մեզ համար լինել «Աստուծոյ գործակիցներ[ը]» այս աշխարհածավալ կրթական գործում (Ա Կորնթացիս 3։9)։

²⁰ Եհովան շուտով Հիսուս Քրիստոսի և զորավոր հրեշտակների միջոցով կդատի բոլոր նրանց, «որ Աստուծուն չեն ճանաչում, եւ չեն հնազանդում մեր Տէր Յիսուսի աւետարանին» (Բ Թեսաղոնիկեցիս 1։6–8)։ Մարդկանց կյանքերը վտանգի տակ են։ Կարո՞ղ ես նպատակ դնել քո առջև Աստվածաշնչի առնվազն մեկ տնային ուսումնասիրություն անցկացնել «Ի՞նչ է սովորեցնում Աստվածաշունչը իրականում» գրքով։ Մասնակցելով այս գործին՝ դու «քո անձն էլ կ’ապրեցնես, եւ քեզ լսողներին էլ» (Ա Տիմոթէոս 4։16)։ Այժմ ավելի, քան երբևէ, մենք պետք է օգնենք մարդկանց հնազանդվել այն ամենին, ինչ սովորեցնում է Աստվածաշունչը։

[ծանոթագրություն]

Ի՞նչ սովորեցիք

• Ի՞նչ նպատակով է թողարկվել «Աստվածաշունչը սովորեցնում է» գիրքը։

• Ինչպե՞ս կարող ես Աստվածաշնչի ուսումնասիրություններ սկսել «Աստվածաշունչը սովորեցնում է» գրքով։

• Որո՞նք են ուսուցանելու ամենաարդյունավետ մեթոդները։

• Ինչպե՞ս կարող ես օգնել ուսումնասիրողին դառնալ Աստծու Խոսքի ուսուցիչ։

[նկար 26–րդ էջի վրա]

Արդյունավետորե՞ն ես օգտագործում այս գիրքը

[նկար 27–րդ էջի վրա]

Հակիրճ քննարկումը կարող է անհատի մեջ հետաքրքրություն առաջացնել Աստվածաշնչի հանդեպ

[նկար 29–րդ էջի վրա]

Ինչպե՞ս կարող ես ուսումնասիրողի ուշադրությունը կենտրոնացնել Աստվածաշնչի վրա

[նկար 30–րդ էջի վրա]

Օգնիր Աստվածաշունչ ուսումնասիրողին առաջադիմել