Դիտունակությունը հրաշալի արդյունքներ է բերում
ԴԻՏՈՒՆԱ՞Կ ես, նկատո՞ւմ ես քո տարածքում վկայություն տալու հնարավորությունները։ Տուրկուում՝ Ֆինլանդիայի պատմական նավահանգստային քաղաքում ապրող մեր հավատակիցները դիտունակ էին, և դա լավ արդյունքներ բերեց։
Տուրկուի եղբայրները նկատում են, որ Ասիայից մի խումբ տղամարդիկ են ժամանել իրենց քաղաք, որ ավարտեն աշխատանքը տեղի նավաշինական գործարանում կառուցվող մի հսկայական զբոսանավի վրա։ Ավելի ուշ եղբայրներից մեկն իմանում է, որ նրանք հյուրանոցներում են ապրում, ինչպես նաև, որ առավոտ կանուխ բանվորներին ավտոբուսով տանում են նավահանգիստ։ Նա անմիջապես հայտնում է այդ մասին Տուրկուի անգլիախոս ժողովի եղբայրներին։
Այդ ժողովի երեցները օտարերկրացիների այցը համարեցին իրենց առաջ բացված մի հրաշալի հնարավորություն՝ հայտնելու Թագավորության բարի լուրը։ Ուստի անմիջապես միջոցներ ձեռնարկեցին հատուկ քարոզարշավ կազմակերպելու նպատակով։ Հենց այդ շաբաթ՝ կիրակի օրը՝ առավոտյան ժամը յոթին, տասը քարոզիչներ եկան ավտոբուսի կանգառ, բայց ոչ մի բանվորի չտեսան։ «Միգուցե շատ ո՞ւշ ենք եկել,— մտածեցին եղբայրները։— Իսկ գուցե նրանք արդեն մեկնե՞լ են Տուրկուից»։ Բայց քիչ անց բանվորական հագուստով մի աշխատող դուրս եկավ անկյունից։ Նրա հետևից՝ մեկ ուրիշը, իսկ հետո՝ մյուսները։ Շուտով կանգառում մի խումբ բանվորներ հավաքվեցին։ Քարոզիչները գործի անցան. սկսեցին անգլերեն լեզվով գրականություն առաջարկել բանվորներին։ Մեկ ժամ անցավ մինչև բոլոր աշխատողները զբաղեցրին իրենց տեղերը ավտոբուսներում, ուստի եղբայրները բավականին ժամանակ ունեցան զրուցելու նրանցից շատերի հետ։ Ավտոբուսները շարժվեցին, իսկ բանվորներն իրենց հետ տարան 126 գրքույկ և 329 պարբերագիր։
Այս հրաշալի արդյունքները քաջալերեցին եղբայրներին, և նրանք որոշեցին հաջորդ շաբաթ՝ շրջագայող վերակացուի այցելության ընթացքում, նորից քարոզարշավի դուրս գալ։ Անձրևոտ մի օր՝ առավոտյան ժամը վեց անց կեսին, շրջագայող վերակացուն քարոզչական հանդիպում անցկացրեց, և 24 քարոզիչ գնացին ուղիղ ավտոբուսի կանգառ։ Այս անգամ նրանք իրենց հետ վերցրին նաև տագալոգ լեզվով գրականություն, քանի որ իմացել էին, որ օտարերկրացիներից շատերը Ֆիլիպիններից են։ Երբ այդ առավոտ ավտոբուսները շարժվեցին, քարոզիչները հասցրել էին բաժանել 7 գիրք, 69 գրքույկ և 479 պարբերագիր։ Պատկերացրու, թե որքա՜ն ուրախ և ոգևորված էին քարոզարշավին մասնակցող քույրերն ու եղբայրները։
Քանի դեռ բանվորները չէին վերադարձել հայրենիք, եղբայրները հանդիպեցին նրանցից ոմանց հյուրանոցներում և ավելի մանրամասնորեն պատմեցին Թագավորության լուրի մասին։ Բանվորներից մի քանիսն ասացին, որ նախկինում Վկաների հանդիպել են աշխարհի այլ մասերում։ Նրանք շնորհակալություն հայտնեցին եղբայրներին, որ նախաձեռնություն էին վերցրել այցելելու իրենց։
Դիտունա՞կ ես, նկատո՞ւմ ես քո տարածքում վկայություն տալու հնարավորությունները։ Նախաձեռնություն վերցնո՞ւմ ես օտարերկրացիներին քարոզելու համար։ Եթե այո, ապա թերևս քեզ հետ էլ այսպիսի հրաշալի դեպքեր պատահեն։
[Քարտեզ/Նկար 32–րդ էջի վրա]
(Ամբողջական տեսքի համար տե՛ս հրատարակությունը)
ՖԻՆԼԱՆԴԻԱ
ՀԵԼՍԻՆԿԻ
Տուրկու