Իսկապես գնահատո՞ւմ ես ամուսնությունը՝ Աստծու պարգևը

«Թող Եհովան ձեզ պարգև տա, և ձեզանից ամեն մեկը հանգստություն գտնի իր ամուսնու տանը» (ՀՌՈՒԹ 1։9)։

ՓՆՏՐԻՐ ԱՅՍ ՀԱՐՑԵՐԻ ՊԱՏԱՍԽԱՆՆԵՐԸ

Ինչո՞ւ կարող ենք ասել, որ Աստծու վաղեմի ծառաները գնահատում էին ամուսնությունը՝ նրա տված պարգևը։

Որտեղի՞ց գիտենք, որ Եհովայի համար կարևոր է, թե ինչպիսի կողակից կընտրենք։

Ամուսնության վերաբերյալ աստվածաշնչյան ո՞ր խորհուրդն ես պատրաստվում կիրառել քո կյանքում։

1. Ինչպե՞ս արձագանքեց Ադամը, երբ Աստված նրան կին պարգևեց։

«ՎԵՐՋԱՊԵ՜Ս. սա ոսկոր է իմ ոսկորներից և մարմին՝ իմ մարմնից։ Սա Կին կկոչվի, որովհետև մարդուց վերցվեց» (Ծննդ. 2։23)։ Որքա՜ն երջանիկ էր առաջին մարդը՝ Ադամը, երբ Աստված նրան կին պարգևեց։ Եվ զարմանալի չէ, որ նա բանաստեղծական ոճով արտահայտեց իր զգացմունքները։ Եհովան, խոր քուն բերելով Ադամի վրա, նրա կողոսկրից մի գեղեցիկ կին ստեղծեց։ Ադամը նրան Եվա անվանեց։ Աստված նրանց միավորեց ամուսնական երջանիկ կապով։ Քանի որ Եհովան Ադամի կողոսկրից էր ստեղծել կնոջը, Ադամն ու Եվան շատ ավելի մտերիմ էին, քան ներկայումս ցանկացած այլ ամուսին ու կին։

2. Ի՞նչն է ձգում տղամարդուն ու կնոջը։

² Իր անզուգական իմաստությամբ Եհովան մարդկանց մեջ դրել է ռոմանտիկ սեր տածելու ունակություն. այդ սերը ձգում է տղամարդուն ու կնոջը։ «Ուորլդ բուք» հանրագիտարանում նշվում է. «Ամուսնացող տղամարդն ու կինը ակնկալում են սեռական հարաբերություն ունենալ իրար հետ և հարատև ռոմանտիկ սեր տածել իրար նկատմամբ»։ Այս հարցում բացառություն չէ Եհովայի ժողովուրդը (The World Book Encyclopedia)։

ՆՐԱՆՔ ԵՐԱԽՏԱՊԱՐՏ ԷԻՆ ԱՄՈՒՍՆՈՒԹՅԱՆ ՊԱՐԳԵՎԻ ՀԱՄԱՐ

3. Իսահակն ինչպե՞ս կին գտավ։

³ Հավատարիմ Աբրահամը խոր հարգանք ուներ ամուսնության հանդեպ։ Այդ պատճառով իր ամենամեծ ծառային ուղարկեց Միջագետք, որ Իսահակի համար կին գտնի։ Ծառայի աղոթքը լավ արդյունքներ բերեց։ Աստվածավախ Ռեբեկան դարձավ Իսահակի սիրելի կինը և նպաստեց Աբրահամի սերունդը պահպանելու վերաբերյալ Եհովայի նպատակի կատարմանը (Ծննդ. 22։18; 24։12–14, 67)։ Այստեղից չի կարելի եզրակացնել, որ անհատը, լավ մղումներից ելնելով, կարող է ամուսնության մեջ միջնորդ դառնալ, եթե իրեն չեն խնդրել։ Այսօրվա հասարակության մեջ շատերն իրենք են ընտրում իրենց կողակցին։ Անշուշտ, ամուսնությունները նախապես չեն հաստատվում երկնքում, բայց Աստված կարող է ուղղություն տալ քրիստոնյային այս և այլ հարցերում, եթե նա աղոթում է առաջնորդության համար ու առաջնորդվում է նրա ոգով (Գաղ. 5։18, 25)։

4, 5. Ի՞նչն է վստահեցնում քեզ, որ սունամացի աղջիկն ու հովիվը սիրում էին իրար։

⁴ Հին Իսրայելում ապրող գեղեցիկ սունամացի աղջիկը չէր ուզում, որ իր ընկերուհիները ճնշում բանեցնեն իր վրա, որ դառնա Սողոմոն թագավորի բազում կանանցից մեկը։ Նա ասաց. «Ո՜վ Երուսաղեմի դուստրեր, երդվեք, որ չեք փորձի սեր արթնացնել կամ բորբոքել իմ մեջ, մինչև որ այն ինքը չարթնանա» (Երգ 8։4)։ Սունամացին ու մի հովիվ ռոմանտիկ զգացմունքներ ունեին իրար հանդեպ։ Աղջիկը խոնարհաբար ասաց. «Պարզապես մի զաֆրան եմ ես ծովափնյա հարթավայրի, շուշան եմ ցածրավայրերի»։ Իսկ հովիվը պատասխանեց. «Ինչպես որ շուշանն է փշոտ մոլախոտերում, այնպես էլ ընկերուհիս է դուստրերի մեջ» (Երգ 2։1, 2)։ Նրանք իրոք սիրում էին իրար։

⁵ Քանի որ սունամացի աղջիկն ու հովիվը առաջին հերթին սիրում էին Աստծուն, նրանց ամուսնական կապը իսկապես ամուր կլիներ։ Աղջիկն իր սիրելի հովվին ասաց. «Ինձ որպես կնիք դիր սրտիդ վրա, որպես կնիք՝ բազկիդ վրա, որովհետև մահվան պես զորեղ է սերը, չի զիջում, ինչպեսև գերեզմանը, երբ բացարձակ նվիրվածություն է պահանջում։ Նրա կայծերը կրակի կայծեր են, այն Յահի բոցն է [քանի որ այն նրանից է]։ Առատ ջրերը չեն կարող հանգցնել սերը, ոչ էլ գետերը կարող են սրբել-տանել այն։ Եթե մարդ իր տան բոլոր թանկարժեք իրերը տա սիրո դիմաց, մարդիկ անպատճառ կարհամարհեն դրանք» (Երգ 8։6, 7)։ Արդյոք չպե՞տք է ամուսնության մասին մտածող Եհովայի ծառան հենց այդպիսի սեր ակնկալի իր ապագա կողակցից։

ԸՆՏՐՈՒԹՅՈՒՆ, ՈՐԸ ԿԱՐԵՎՈՐ Է ԱՍՏԾՈՒ ՀԱՄԱՐ

6, 7. Որտեղի՞ց գիտենք, որ Աստծու համար կարևոր է, թե ինչպիսի կողակից կընտրենք։

⁶ Եհովայի համար կարևոր է, թե ինչպիսի կողակից կընտրես։ Քանանի բնակիչների վերաբերյալ նա իսրայելացիներին հետևյալ պատվերն էր տվել. «Նրանց հետ խնամություն չանես։ Աղջկադ նրա որդուն չտաս և որդուդ համար նրա աղջկան կնության չառնես։ Նա քո որդուն կշեղի ինձ հետևելուց, ու նրանք ուրիշ աստվածների կծառայեն։ Այդ ժամանակ Եհովայի բարկությունը կբռնկվի քո դեմ, և նա իսկույն կոչնչացնի քեզ» (2 Օրենք 7։3, 4)։ Դարեր անց Եզրաս քահանան ասաց. «Դուք անհավատարմությամբ եք վարվել՝ օտար կանանց կնության առնելով և այդպես Իսրայելի մեղքը ավելացնելով» (Եզր. 10։10)։ Իսկ Պողոս առաքյալը իր հավատակիցներին գրեց. «Կինը կապված է այնքան ժամանակ, քանի դեռ նրա ամուսինը ողջ է։ Բայց եթե նրա ամուսինը մահանա, նա ազատ է ամուսնանալու ում հետ որ կամենա, բայց միայն Տիրոջ հետևորդի հետ» (1 Կորնթ. 7։39)։

⁷ Եթե Եհովայի նվիրված ծառան ամուսնանում է մեկի հետ, ով Տիրոջ հետևորդ չէ, Աստծու հանդեպ անհնազանդություն է դրսևորում։ Եզրասի օրերում ապրող իսրայելացիները անհավատարմությամբ վարվեցին՝ «օտար կանանց կնության առնելով», և սխալ կլինի փորձել նվազեցնել Աստվածաշնչում պարզ նշված հրահանգի կարևորությունը (Եզր. 10։10; 2 Կորնթ. 6։14, 15)։ Եհովային չծառայող անհատի հետ ամուսնացող քրիստոնյան օրինակելի չի համարվում և իրականում չի գնահատում ամուսնությունը՝ Աստծու պարգևը։ Այդպիսի միության մեջ մտնելով՝ մկրտված անհատը կարող է որոշ առանձնաշնորհումներ կորցնել Աստծու ժողովրդի մեջ։ Եվ անտրամաբանական կլինի օրհնություններ ակնկալել ու Եհովային հետևյալը աղոթել. «Եհո՛վա, ես գիտակցաբար չեմ հնազանդվել քեզ, բայց, խնդրում եմ, ամեն դեպքում օրհնիր ինձ»։

ՄԵՐ ԵՐԿՆԱՅԻՆ ՀԱՅՐԸ ԱՎԵԼԻ ԼԱՎ ԳԻՏԻ

8. Բացատրի՛ր, թե ինչու պետք է հետևենք ամուսնության վերաբերյալ Աստծու տված առաջնորդությանը։

⁸ Որևէ մեխանիզմ պատրաստողը ճշգրտորեն գիտի, թե ինչպես է այն աշխատում։ Նա կարող է հայտնել անհրաժեշտ մանրամասները՝ այն մաս առ մաս հավաքելու համար։ Իսկ ի՞նչ կլինի, եթե անտեսենք նրա հրահանգները և մեր ուզած ձևով հավաքենք այն։ Հավանաբար, հետևանքը շատ վատ կլինի, և սարքը նույնիսկ գուցե չաշխատի։ Նմանապես, եթե ցանկանում ենք երջանիկ ամուսնություն ունենալ, պետք է հետևենք Եհովայի՝ ամուսնության Հիմնադրի հրահանգներին։

9. Ինչո՞ւ կարող ենք ասել, որ Եհովան հասկանում է, թե ինչ է միայնության զգացումը և թե ինչ մեծ ուրախություն կարող է պարգևել ամուսնությունը։

⁹ Թե՛ մարդու էության և թե՛ ամուսնության մասին Եհովան ամեն ինչ գիտի։ Նա մարդկանց մեջ սեռական կարիք է դրել, որպեսզի «բազմանան, շատանան» (Ծննդ. 1։28)։ Աստված հասկանում է, թե ինչ է միայնության զգացումը, քանի որ առաջին կնոջը ստեղծելուց առաջ ասաց. «Լավ չէ, որ մարդը մենակ մնա։ Մի օգնական ստեղծեմ նրա համար որպես նրան լրացում» (Ծննդ. 2։18)։ Եհովան նաև շատ լավ գիտի, թե ինչ մեծ ուրախություն կարող է պարգևել ամուսնությունը (կարդա՛ Առակներ 5։15–18)։

10. Քրիստոնյա կողակիցները ո՞ր գործոնները պետք է հաշվի առնեն ինտիմ հարաբերություններում։

¹⁰ Ադամի փոխանցած մեղքի ու անկատարության հետևանքով ներկայումս գոյություն չունի կատարյալ ամուսնություն։ Այդուհանդերձ, Եհովայի ծառաները կարող են իսկապես երջանիկ ամուսնական կյանք վայելել, եթե հետևեն Աստծու Խոսքի խորհուրդներին։ Օրինակ՝ նկատի առ ինտիմ հարաբերությունների վերաբերյալ Պողոսի հստակ խորհուրդը (կարդա՛ 1 Կորնթացիներ 7։1–5)։ Աստվածաշունչը ցույց է տալիս, որ սեռական հարաբերությունները նախատեսված չեն միայն սերունդ առաջ բերելու համար։ Դրանք կարող են բավարարել էմոցիոնալ և ֆիզիկական կարիքները։ Սակայն այլասերված ձևերը, ինչ խոսք, տհաճ են Աստծուն։ Քրիստոնյա ամուսիններն ու կանայք, անկասկած, ցանկանում են իրենց կյանքի այս կարևոր հարցում քնքշություն ցուցաբերել՝ անկեղծ սեր դրսևորելով իրար հանդեպ։ Նաև նրանք պետք է խուսափեն ցանկացած արարքից, որը տհաճություն կպատճառի Եհովային։

11. Ինչպե՞ս օրհնվեց Հռութը Եհովայի կամքին ներդաշնակ վարվելու համար։

¹¹ Ամուսնությունը պետք է ուրախության աղբյուր լինի և ոչ թե դժբախտության պատճառ կամ բեռ։ Հատկապես քրիստոնյայի տունը պետք է հանգրվան լինի՝ հանգստի ու խաղաղության վայր։ Նկատի առ, թե մոտ 3000 տարի առաջ ինչ տեղի ունեցավ, երբ տարեց այրի Նոեմին ու նրա այրիացած հարսները՝ Օրփան ու Հռութը, Մովաբից ճամփա ընկան Հուդա։ Նոեմին երիտասարդ կանանց համոզում էր վերադառնալ իրենց ժողովրդի մոտ։ Սակայն մովաբացի Հռութը չբաժանվեց Նոեմիից։ Նա հավատարիմ եղավ ճշմարիտ Աստծուն, և նրան վստահեցում տրվեց, որ իր «վարձատրությունը լիակատար կլինի Իսրայելի Աստծու՝ Եհովայի կողմից, որի թևերի տակ նա եկել էր ապաստան փնտրելու» (Հռութ 1։9; 2։12)։ Մեծապես գնահատելով ամուսնությունը՝ Աստծու պարգևը՝ Հռութը դարձավ տարեց Բոոսի կինը, որը Եհովայի ճշմարիտ երկրպագու էր։ Իսկ երբ նա Աստծու նոր աշխարհում հարություն առնի, կուրախանա՝ իմանալով, որ դարձել է Հիսուս Քրիստոսի նախամայրը (Մատթ. 1։1, 5, 6; Ղուկ. 3։23, 32)։ Այո՛, ի՜նչ մեծ օրհնություններ նա ստացավ՝ Եհովայի կամքին ներդաշնակ վարվելով։

ՈՂՋԱՄԻՏ ԽՈՐՀՈՒՐԴՆԵՐ ՀԱՋՈՂ ԱՄՈՒՍՆՈՒԹՅԱՆ ՀԱՄԱՐ

12. Ամուսնության վերաբերյալ որտեղի՞ց կարելի է ողջամիտ խորհուրդներ գտնել։

¹² Ամուսնության Հիմնադիրը հայտնում է մեզ այն ամենը, ինչ պետք է իմանանք հաջող ամուսնություն ունենալու համար։ Ոչ մի մարդ նրա չափ գիտելիքներ չունի։ Աստվածաշունչը միշտ ճիշտ է ամեն հարցում, և միայն նրա սկզբունքներով առաջնորդվելով է, որ անհատը կարող է ողջամիտ խորհուրդներ ստանալ ամուսնության վերաբերյալ։ Օրինակ՝ Պողոս առաքյալը սուրբ ոգու ներշնչմամբ գրեց. «Ձեզանից ամեն մեկը թող այնպես սիրի իր կնոջը, ինչպես իր անձը։ Իսկ կինը պետք է խոր հարգանք տածի իր ամուսնու հանդեպ» (Եփես. 5։33)։ Այս խորհրդում ոչ մի անհասկանալի բան չկա հասուն քրիստոնյաների համար։ Հարցն այն է՝ կկիրառե՞ն նրանք Եհովայի Խոսքը։ Կկիրառեն, եթե իսկապես գնահատում են ամուսնությունը՝ Աստծու պարգևըa։

13. 1 Պետրոս 3։7-ում արձանագրված խորհուրդը չկիրառելու պատճառով ի՞նչ հետևանքներ կարող են լինել։

¹³ Քրիստոնյա ամուսինը պետք է քնքշությամբ վարվի իր կնոջ հետ։ Պետրոս առաքյալը գրեց. «Դուք, ամուսիննե՛ր, նույն ձևով վարվեք նրանց հետ՝ ձգտելով հասկանալ նրանց, և պատիվ տվեք կանանց որպես ավելի փխրուն անոթի, քանի որ նրանց հետ դուք էլ եք կյանքի պարգևի ժառանգներ. այդ դեպքում ձեր աղոթքների դեմ արգելքներ չեն լինի» (1 Պետ. 3։7)։ Ամուսնու աղոթքները գուցե չլսվեն, եթե նա չկիրառի Եհովայի խորհուրդները։ Դա նաև բացասաբար կանդրադառնա կողակիցների հոգևոր վիճակին, ինչը թերևս մեծ սթրեսի, վիճաբանությունների ու կոպիտ արարքների պատճառ դառնա։

14. Ընտանեկան կյանքում ի՞նչ դեր կարող է ունենալ սիրող կինը։

¹⁴ Այն կինը, որը առաջնորդվում է Եհովայի Խոսքով ու նրա սուրբ ոգով, կարող է շատ բան անել, որ իր տանը խաղաղություն ու երջանկություն տիրի։ Աստվածավախ ամուսնուց ակնկալվում է, որ սիրի իր կնոջը ու պաշտպանի նրան թե՛ ֆիզիկապես, թե՛ հոգևորապես։ Կինը փափագում է զգալ նրա սերը, իսկ դա նշանակում է, որ պետք է այնպիսի հատկություններ դրսևորի, որ ամուսինը սիրի նրան։ «Իմաստուն կինը կառուցում է իր տունը,— ասվում է Առակներ 14։1-ում,— բայց հիմարը իր իսկ ձեռքերով քանդում է այն»։ Իմաստուն և սիրող կինը մեծապես նպաստում է իր ընտանիքի երջանկությանն ու ամրությանը և ցույց է տալիս, որ իսկապես գնահատում է ամուսնությունը՝ Աստծու պարգևը։

15. Ի՞նչ խորհուրդներ ենք գտնում Եփեսացիներ 5։22–25-ում։

¹⁵ Այն ամուսիններն ու կանայք, ովքեր միմյանց հետ վարվում են այնպես, ինչպես Հիսուսն էր վարվում իր ժողովի հետ, ցույց են տալիս, որ իսկապես գնահատում են ամուսնությունը՝ Աստծու պարգևը (կարդա՛ Եփեսացիներ 5։22–25)։ Ի՜նչ մեծ օրհնություններ են վայելում ամուսինները, երբ իսկապես սիրում են իրար ու երբեք թույլ չեն տալիս, որ հպարտությունը, իրարից խռով մնալու երեխայական պահվածքը կամ ոչ քրիստոնեավայել որևէ վարքագիծ մթագնի ամուսնական կյանքի ուրախությունը։

ԹՈՂ ՈՉ ՈՔ ՉԲԱԺԱՆԻ ՆՐԱՆՑ

16. Ինչո՞ւ են որոշ քրիստոնյաներ ամուրի մնում։

¹⁶ Թեև շատերը պլանավորում են ինչ-որ տարիքում ամուսնանալ, Եհովայի ծառաներից ոմանք ամուրի են մնում, որովհետև չեն կարողանում այնպիսի կողակից գտնել, որը համապատասխան կլինի իրենց և հաճելի՝ Աստծուն։ Ուրիշներն էլ ունեն ամուրիության պարգևը, ինչի շնորհիվ իրենց անձը ամբողջովին նվիրում են Եհովային առանց շեղումների ծառայելուն։ Ինչ խոսք, ամուրիությունը հարկավոր է վայելել՝ հետևելով Եհովայի սահմանած չափանիշներին (Մատթ. 19։10–12; 1 Կորնթ. 7։1, 6, 7, 17)։

17. ա) Ամուսնության վերաբերյալ Հիսուսի ո՞ր խոսքերը պետք է հիշենք։ բ) Եթե որևէ քրիստոնյա սկսի ցանկանալ ուրիշի կողակցին, անհապաղ ի՞նչ պետք է անի։

¹⁷ Ամուրի թե ամուսնացած՝ բոլորս պետք է հիշենք Հիսուսի հետևյալ խոսքերը. «Չե՞ք կարդացել, որ նա [Աստված], ով սկզբից ստեղծեց, տղամարդ և կին ստեղծեց նրանց ու ասաց. «Այդ պատճառով տղամարդը կթողնի իր հորն ու մորը և կմիանա իր կնոջը, և երկուսը մեկ մարմին կլինեն»։ Այնպես որ նրանք այլևս երկու չեն, այլ մեկ մարմին են։ Ուրեմն ինչ որ Աստված միավորեց մեկ լծի տակ, թող մարդը չբաժանի» (Մատթ. 19։4–6)։ Ուրիշի կողակցին ցանկանալը մեղք է (2 Օրենք 5։21)։ Եթե որևէ քրիստոնյայի մեջ այդպիսի ցանկություն է առաջանում, պետք է անմիջապես արմատախիլ անի այդ անմաքուր ցանկությունը։ Այդպես պետք է վարվել նույնիսկ այն դեպքում, եթե դա էմոցիոնալ մեծ ցավ կպատճառի իրեն, քանի որ թույլ է տվել, որ այդ եսասիրական փափագը զարգանա (Մատթ. 5։27–30)։ Անչափ կարևոր է շտկել նման մտածելակերպը ու ճնշել նենգավոր սրտի մեղավոր ցանկությունները (Երեմ. 17։9)։

18. Ինչպե՞ս պետք է վերաբերվենք ամուսնությանը՝ Աստծու պարգևին։

¹⁸ Շատերը, ովքեր քիչ բան գիտեն կամ ընդհանրապես ոչինչ չգիտեն Եհովա Աստծու և ամուսնության՝ նրա հրաշալի պարգևի մասին, որոշ չափով գնահատանք են դրսևորում ամուսնական կապի հանդեպ։ Ուրեմն որքա՜ն առավել մենք, որ նվիրված ենք «երջանիկ Աստծուն»՝ Եհովային, պետք է ուրախություն ստանանք նրա տված ամեն բանից ու փաստենք, որ իսկապես գնահատում ենք ամուսնությունը՝ Աստծու պարգևը (1 Տիմոթ. 1։11)։

[ծանոթագրություն]

[մեջբերում 6-րդ էջի վրա]

Լավ ամուսնությունը պատիվ է բերում Եհովային ու երջանկություն պարգևում ընտանիքի յուրաքանչյուր անդամին

[նկար 5-րդ էջի վրա]

Հռութը գնահատանք դրսևորեց ամուսնության՝ Աստծու պարգևի հանդեպ

[նկար 7-րդ էջի վրա]

Ցույց տալի՞ս ես, որ իսկապես գնահատում ես ամուսնությունը՝ Աստծու պարգևը