Որքա՞ն կարևոր է քրիստոնեական եղբայրության դերը

¹ «Ոչ մի մարդ «կղզի» չի»։ Այս խոսքերը, որ ասել է տասնյոթերորդ դարի մի պոետ, լոկ կրկնությունն են Աստվածաշնչի խոսքերի, որը վերաբերում է մարդկային մի կարևոր կարիքի՝ ընկերությանը (Առակ. 18։13, ՆԱ)։ Մեր քրիստոնեական եղբայրությունը բավարարում է այդ կարիքը։ Իսկ ի՞նչ օգտավետ կերպերով։

² Ծառայության մեջ։ Ամենաօգտակար կերպերից մեկն այն է, որ մեր եղբայրները ամրացնում են և աջակցություն ցույց տալիս մեզ քարոզչական ծառայության մեջ։ Հիսուսն իր աշակերտներին «երկու–երկու» ուղարկեց քարոզելու (Մարկ. 6։7; Ղուկ. 10։1)։ Նմանապես մենք, երբ համագործակցում ենք ուրիշների հետ քարոզչության մեջ, տեսնում ենք Ժողովող 4։9, 10 խոսքերի ճշմարտացիությունը։ Միասին ծառայելիս մեզ հետ համագործակցող անհատի հավատը, հնազանդությունն ու սերը մեզ քաջություն և նոր եռանդ են հաղորդում։

³ Անձնական օգնության համար։ Մեր եղբայրությունը նաև քաջալերության աղբյուր է, ինչպես նաև՝ ճնշումները հաղթահարելու ու փորձություններին դիմակայելու համար առաջնորդություն։ Մեր քրիստոնյա ընկերները կարող են մեր ուշադրությունն ուղղել սուրբգրային համարների վրա, որոնք վերաբերում են մեր անձնական մտահոգություններին։ Նրանք նույնիսկ կարող են աղոթել մեզ համար, ինչպես որ մենք ենք աղոթում նրանց համար (Բ Կորնթ. 1։11)։ Եվ, ինչ խոսք, նրանց լավ օրինակն է մղում մեզ բարի գործերի ու զորացնում մեզ։

⁴ Ժողովի հանդիպումներին։ Մենք կարող ենք վայելել քրիստոնեական եղբայրությունից եկած օրհնությունն այն ժամանակ, երբ կանոնավորաբար հաճախենք ժողովի հանդիպումներին (Եբր. 10։24, 25)։ Հանդիպումներին հոգևոր ուսուցման հարուստ ծրագիր է ներկայացվում, իսկ մեր ներկա լինելը մեզ մտերմացնում մեր հավատակիցների հետ։ Այս հավաքույթները մեզ հնարավորություն են տալիս տեսնել, թե ինչպես են մեր եղբայրներն ու քույրերը դրսևորում իրենց հավատը՝ լինի դա բեմի վրա, թե՝ դահլիճում (Հռովմ. 1։12, ԱԹ)։ Մեր եղբայրության կապն ամրանում է, երբ հաղորդակցվում ենք հանդիպումներից առաջ և հետո։ Այսպիսի առիթները հնարավորություն են ստեղծում պատմելու մեզ հետ պատահած, հավատն ամրացնող դեպքեր։ Մեզ վրա դրական ազդեցություն է թողնում անկաշկանդ շփումը նրանց հետ, ովքեր սիրում են Եհովային, նրա Խոսքը, նրա գործը և նրա ժողովրդին (Փիլիպ. 2։1, 2)։

⁵ Մենք մեր քրիստոնեական եղբայրների կարիքն ունենք։ Առանց նրանց՝ կյանքի առաջնորդող նեղ ճանապարհով ընթանալը մեզ համար շատ ավելի դժվար կլիներ։ Եվ ընդհակառակը՝ նրանց սիրով և քաջալերությամբ մենք կարող ենք շարունակել ընթանալ դեպի Եհովայի արդար նոր աշխարհ (Մատթ. 7։14)։