Ի՞նչ ազդեցություն ես թողնում մարդկանց վրա
1. Ի՞նչ էին աշակերտները սովորում Հիսուսից։
1 Հիսուսն ասաց. «Իմ լուծը ձեզ վրա վերցրեք և ինձանից սովորեք» (Մատթ. 11։29)։ Քրիստոսը սովորեցրեց ոչ միայն իր խոսքերով, այլև օրինակով։ Ի՞նչ էին աշակերտները սովորում նրանից։ Հիսուսը մեղմ էր, բարի և սիրող (Մատթ. 8։1–3; Մարկ. 6։30–34)։ Նա իսկապես խոնարհ էր (Հովհ. 13։2–5)։ Հիսուսի հետ ծառայելով՝ աշակերտները տեսնում էին, որ նա անխոնջ ծառայող է և արդյունավետ կերպով է ուսուցանում ճշմարտությունը (Ղուկ. 8։1; 21։37, 38)։ Իսկ ի՞նչ են մեր հավատակիցները սովորում՝ նայելով մեզ։ Ի՞նչ ազդեցություն ենք թողնում այն մարդկանց վրա, ում հետ խոսում ենք ծառայության ժամանակ։
2. Ինչպե՞ս կարող են մեր արտաքին տեսքը և պահվածքը լավ տպավորություն թողնել ծառայության ժամանակ։
2 Ծառայության ժամանակ։ Մեր համեստ հագուկապը, քաղաքավարի վարվելակերպը և անկեղծ հետաքրքրությունը կարող են մեծ ազդեցություն թողնել այն մարդկանց վրա, ում հետ խոսում ենք բարի լուրի մասին (2 Կորնթ. 6։3; Փիլիպ. 1։27)։ Նրանք նկատում են, որ մենք հաճախ ենք օգտվում Աստվածաշնչից։ Մյուսներին էլ տպավորում է այն, որ հարգանքով ենք լսում իրենց։ Համոզված եղիր, որ քո լավ պահվածքը, շարժուձևը և ընդհանրապես լավ օրինակը կարող են նպաստել, որ մարդիկ ընդունեն բարի լուրը։
3. Ինչպիսի՞ ազդեցություն կարող ենք թողնել հավատակիցների վրա։
3 Մեր հավատակիցները։ Մենք կարող ենք դրական ազդեցություն թողնել նաև հավատակիցների վրա։ Եթե եռանդուն լինենք քարոզչական գործում, մյուսները թերևս նույն ոգով վարակվեն։ Ինչպես երկաթը երկաթով է սրվում, այնպես էլ լավ պատրաստված մատուցումը կարող է մղել եղբայրներին և քույրերին բարելավելու իրենց քարոզչական հմտությունները (Առակ. 27։17)։ Եթե ջանասիրաբար ճշգրիտ գրառումներ կատարենք հետաքրքրվողների մասին և հետո ժամանակին վերայցելություն անենք, ապա մեր հավատակիցները ակներևաբար կցանկանան ընդօրինակել մեզ։ Մեր ծառայությունը «ամբողջովին կատարելով»՝ դրական ազդեցություն կթողնենք նրանց վրա (2 Տիմոթ. 4։5)։
4. Ինչո՞ւ պետք է պարբերաբար քննենք, թե ինչ օրինակ ենք թողնում մյուսներին։
4 Մենք պետք է պարբերաբար քննենք, թե ինչ ենք ասում, ինչ ենք անում և թե ինչ օրինակ ենք թողնում մյուսներին։ Եթե լավ օրինակ թողնենք մյուսներին, կուրախացնենք Եհովային և Պողոսի պես կկարողանանք ասել. «Ընդօրինակեք ինձ, ինչպես որ ես էլ՝ Քրիստոսին» (1 Կորնթ. 11։1)։