Շարունակիր առաջադիմել որպես քարոզիչ
1. Առաջին դարի ո՞ր օրինակներն են ցույց տալիս, որ պետք է առաջադիմենք որպես քարոզիչներ։
1 Որպես քարոզիչներ՝ քրիստոնյաները պետք է շարունակ առաջադիմեն։ Այդ նպատակով Հիսուսը իր հետևորդներին անընդհատ մարզում էր քարոզչական գործում (Ղուկ. 9։1–5; 10։1–11)։ Նույն պատճառով Ակյուղասն ու Պրիսկիղան Ապողոսին «իրենց մոտ վերցրին և Աստծու ճանապարհը ավելի ճշգրտությամբ նրան բացատրեցին» (Գործ. 18։24–26)։ Պողոս առաքյալը նույնպես քաջալերեց փորձառու ավետարանիչ Տիմոթեոսին շարունակել ջանասեր լինել սովորեցնելու մեջ, որպեսզի նրա «առաջադիմությունը հայտնի լինի բոլորին» (1 Տիմոթ. 4։13–15)։ Ուստի անկախ նրանից, թե քանի տարի ենք ծառայում Տիրոջը որպես բարի լուրի քարոզիչ, մենք պետք է շարունակ բարելավենք մեր քարոզչական հմտությունները։
2. Ինչպե՞ս կարող ենք սովորել ուրիշներից։
2 Սովորիր ուրիշներից։ Մեր հմտությունները բարելավելու կերպերից մեկը ուրիշներից սովորելն է (Առակ. 27։17)։ Ուստի ուշադիր եղիր, երբ քարոզիչները մատուցում են անում։ Խորհուրդներ հարցրու փորձառու քարոզիչներից և ուշադիր լսիր նրանց (Առակ. 1։5)։ Եթե դժվարանում ես վերայցելություն անել, Աստվածաշնչի ուսումնասիրություն անցկացնել կամ ծառայության մեկ այլ ձևի մասնակցել, նախաձեռնություն վերցրու և քարոզչական խմբի վերակացուին կամ մեկ այլ փորձառու քարոզչի խնդրիր օգնել քեզ։ Հիշիր նաև, որ Եհովայի սուրբ ոգին կարող է քո մեջ ունակություններ զարգացնել։ Ուստի կանոնավորաբար աղոթիր այդ մասին (Ղուկ. 11։13)։
3. Ինչպե՞ս պետք է արձագանքենք, երբ խորհուրդ ենք ստանում։
3 Երբ բարելավումներ կատարելու հետ կապված խորհուրդ ես ստանում, մի՛ շտապիր վիրավորվել, անգամ եթե դու չես խնդրել, որ քեզ խորհուրդ տան (Ժող. 7։9)։ Ապողոսի նման՝ խոնարհությամբ ու երախտագիտությամբ ընդունիր քեզ տրված օգնությունը։ Այդպես վարվելով՝ ցույց կտաս, որ իմաստուն ես (Առակ. 12։15)։
4. Ի՞նչ զորեղ հիմք բերեց Հիսուսը՝ շարունակ առաջադիմելու համար։
4 Առաջադիմությունը փառավորում է Աստծուն։ Օրինակներ օգտագործելով՝ Հիսուսը քաջալերում էր իր հետևորդներին առաջադիմել։ Նա իրեն համեմատեց որթատունկի հետ, իսկ իր օծյալ հետևորդներին՝ ճյուղերի հետ։ Նա ասաց, որ Հայրը մաքրում է յուրաքանչյուր ճյուղ, որ պտուղ է տալիս, որպեսզի այն «ավելի շատ պտուղ տա» (Հովհ. 15։2)։ Ինչպես որ խաղողի այգու տերն է ցանկանում, որ ճյուղերը պտուղ տան, այնպես էլ Եհովան է ցանկանում, որ շարունակենք զարգացնել մեր «շուրթերի պտուղը» մատուցելու ունակությունը (Եբր. 13։15)։ Իսկ ի՞նչ է լինում առաջադիմելու արդյունքում։ Հիսուսը պատասխանում է. «Սրանով է փառավորվում իմ Հայրը, որ դուք շարունակում եք շատ պտուղ բերել» (Հովհ. 15։8)։