Պատերազմ Մերձավոր Արևելքում։ Ի՞նչ է ասում Աստվածաշունչը

Աշխարհը մտահոգ հետևում է Մերձավոր Արևելքում ընթացող հակամարտությանը, որի մեջ ներգրավված են Միացյալ Նահանգները, Իսրայելը և Իրանը։ Արդյոք այն կվերածվի՞ ավելի լայնամասշտաբ պատերազմի։ Աշխարհի պետություններին կհաջողվի՞ կանխել աղետը և հարատև խաղաղություն հաստատել։

Աստվածաշնչյան մարգարեություններին ծանոթ մարդիկ գուցե մտածեն. «Հնարավո՞ր է, որ Մերձավոր Արևելքի այդ հակամարտությունը սկիզբ դնի «Հայտնություն» գրքում նշված Արմագեդոն պատերազմին»։

Ի՞նչ է ասում Աստվածաշունչը։

Պետություններին կհաջողվի՞ վերջ դնել Մերձավոր Արևելքի պատերազմին

Աստվածաշնչում ասվում է. «Մի՛ ապավինեք իշխանավորներին, մարդ արարածին, որը չի կարող փրկություն բերել» (Սաղմոս 146։3)։

Ժամանակը ցույց կտա, թե արդյոք պետություններին կհաջողվի Մերձավոր Արևելքում որոշ չափով խաղաղություն հաստատել։ Սակայն Աստվածաշունչը հստակ ցույց է տալիս, որ ոչ մի քաղաքական գործիչ, աշխարհի ոչ մի կառավարություն և ոչ էլ մարդկանց որևէ խումբ չի կարողանա մեկընդմիշտ վերջ դնել պատերազմներին և հարատև խաղաղություն հաստատել։ Միայն Աստված կարող է «երկրով մեկ դադարեցնել պատերազմները» (Սաղմոս 46։9)։

• Ավելին իմանալու համար կարդացեք «Վերջ պատերազմներին. ինչպե՞ս» վերնագրով «Դիտարան» պարբերագիրը։

Մերձավոր Արևելքի պատերազմը մարգարեության կատարո՞ւմ է

Աստվածաշնչում ասվում է. «Պատերազմների թնդյուն կհասնի ձեր ականջին, և պատերազմների լուրեր կլսեք.... Ազգ ազգի դեմ դուրս կգա, և թագավորություն՝ թագավորության դեմ» (Մատթեոս 24։6, 7)։

Մերձավոր Արևելքի ներկայիս հակամարտությունը մեկն է այն իրադարձություններից, որոնք «աշխարհի վախճանի ժամանակների նշան» են և փաստում են, որ ապրում ենք «վերջին օրերում» (Մատթեոս 24։3; 2 Տիմոթեոս 3։1)։ Ազգամիջյան բախումները, որոնց այսօր ականատես ենք լինում, ցույց են տալիս, որ Աստված շուտով վերջ է դնելու բոլոր պատերազմներին ու մարդկությանը տառապանք պատճառող այլ խնդիրներին։

• Ավելին իմանալու համար կարդացեք «Ո՞րն է «վերջին օրերի», կամ՝ «վերջի ժամանակի» նշանը» հոդվածը։

Արմագեդոնը Մերձավոր Արևելքո՞ւմ է սկսվելու

Աստվածաշնչում ասվում է. «Նրանց հավաքեցին այն վայրում, որը եբրայերեն Արմագեդոն է կոչվում» (Հայտնություն 16։16)։

Արմագեդոն պատերազմը աշխարհի կառավարությունների միջև չի լինելու և հետևաբար չի սկսելու աշխարհագրական որևէ վայրում, օրինակ՝ Մերձավոր Արևելքում։ Դա մի պատերազմ է, որը տեղի է ունենալու Աստծու և աշխարհի բոլոր պետությունների միջև և համաշխարհային բնույթ է կրելու։

• Ավելին իմանալու համար կարդացեք «Ի՞նչ է Արմագեդոն պատերազմը» հոդվածը։

Ի՞նչը կօգնի հանգստություն պահպանել այս քաոսային ժամանակներում

Աստվածաշնչում ասվում է. «Ոչ մի բանի համար մի՛ մտահոգվեք, այլ ամեն ինչի մասին աղոթեք Աստծուն. օգնություն աղերսեք, միշտ շնորհակալական խոսքեր ասեք ու ձեր խնդրանքները հայտնեք նրան» (Փիլիպպեցիներ 4։6)։

Եհովաa Աստված հորդորում է, որ աղոթենք իրեն։ Աստված հոգ է տանում մեր մասին, ուստի կարող ենք վստահ լինել, որ նա կլսի մեր աղոթքները և կօգնի հաղթահարել անհանգստության զգացումը (1 Պետրոս 5։7)։ Նա մեզ մխիթարում է՝ իր Խոսքում բացատրելով, թե ինչու են պատերազմներ լինում, ինչպես է դրանց վերջ դրվելու, և ինչպես է վերանալու ցավն ու տառապանքը (Հայտնություն 21։3, 4)։

• Աստծու տրամադրած օգնության մասին ավելին իմանալու համար կարդացեք «Կարո՞ղ է Աստվածաշունչը մխիթարել ինձ» հոդվածը։