Քայլ 1

Փնտրեք լավ խորհուրդ

Ինչո՞ւ է կարևոր։ Երբ ծնողները նորածին երեխային առաջին անգամ իրենց գիրկն են առնում, նրանք, ըստ ամենայնի, հակասական զգացումներ են ունենում։ «Ես անչափ ուրախ էի և հիացած,— ասում է Բրետ անունով մի հայր (Մեծ Բրիտանիա)։— Բայց միևնույն ժամանակ զգում էի, որ երեխայի դաստիարակությունը մեծ պատասխանատվություն է, և ես պատրաստ չեմ»։ Իսկ Մոնիկան (Արգենտինա) ասում է. «Ես անհանգստանում էի, թե արդյոք կկարողանամ հոգալ աղջնակիս կարիքները։ Հետաքրքիր էր՝ կկարողանայի՞ նրան այնպես դաստիարակել, որ նա դառնար գիտակից և խելամիտ անձնավորություն»։

Թերևս համամիտ եք, որ ծնողները նման ուրախություններ և մտավախություններ են ունենում։ Անշուշտ, երեխա մեծացնելը ամենից դժվար և վհատեցնող, բայցև ամենից գոհացուցիչ և վարձահատույց գործերից մեկն է, որ մարդ երբևէ կարող է ձեռնարկել։ Մի հայր ասում է. «Երեխային դաստիարակելու հնարավորությունը միայն մեկ անգամ է ընձեռվում»։ Քանի որ դուք՝ որպես ծնող, կարող եք վիթխարի ազդեցություն գործել ձեր երեխաների առողջության և երջանկության վրա, գուցե ցանկանաք ստանալ վստահելի խորհուրդներ, թե ինչպես լինել լավ ծնող։

Ինչո՞ւ է դժվար։ Թվում է՝ դաստիարակության վերաբերյալ խորհուրդ տալ կարող է յուրաքանչյուրը։ Անցյալում երիտասարդ ծնողները հետևում էին իրենց ծնողների օրինակին կամ նրանց կրոնական համոզմունքներին։ Բայց այսօր շատ երկրներում ընտանեկան կառույցը քայքայվում է, իսկ կրոնը կորցնում է իր ազդեցությունը։ Արդյունքում՝ բազմաթիվ ծնողներ դիմում են երեխաների դաստիարակության գծով մասնագետների։ Ինչ խոսք, վերջիններս երբեմն խելամիտ խորհուրդներ են տալիս։ Սակայն այլ դեպքերում դրանք հակասական են լինում, իսկ որոշ ժամանակ անց հնանում են։

Ի՞նչը կօգնի։ Փնտրեք այն Անձնավորության խորհուրդը, որը բոլորից լավ գիտի, թե ինչպես է պետք դաստիարակել երեխային։ Այդ անձնավորությունը Եհովա Աստված է՝ մարդու Արարիչը (Գործեր 17։26–28)։ Նրա Խոսքը՝ Աստվածաշունչը, պարունակում է կոնկրետ խորհուրդներ և գործնական օրինակներ, որոնք կարող են օգնել ձեզ լինելու լավ ծնող։ Աստված ասում է. «Կ’խրատեմ քեզ՝ իմ աչքը քեզ վերայ կ’լինի» (Սաղմոս 32։8)։

Ի՞նչ խորհուրդներ է Աստված տալիս ծնողներին, որոնք կօգնեն նրանց երջանիկ երեխաներ մեծացնել։

[Մեջբերում 3–րդ էջի վրա]

«Տիրոջն ապաւինիր քո բոլոր սրտովը, եւ քո հասկացողութեանը մի վստահիր» (Առակաց 3։5)։