Գլուխ 22

Հիսուսը կանչում է չորս աշակերտներին

ՀԻՍՈՒՍԸ հեռանում է իր հայրենի քաղաք Նազարեթից, որտեղ նրա վրա մահափորձ կատարվեց, և գնում է Կափառնայում, որը գտնվում է Գալիլեայի ծովի մոտ։ Այդպիսով կատարվում է Եսայիայի գրած մեկ ուրիշ մարգարեություն, ըստ որի՝ ծովի մոտ բնակվող Գալիլեայի ժողովուրդը մեծ լույս պիտի տեսներ։

Մինչ Հիսուսը շարունակում է Գալիլեայում քարոզել մարդկանց լույս տվող Թագավորության լուրը, նա գտնում է իր աշակերտներից չորսին։ Նախկինում նրանք շրջում էին Հիսուսի հետ, բայց Հրեաստանից վերադառնալուց հետո նորից անցել էին ձկնորսության իրենց գործին։ Ըստ երևույթին, Հիսուսն այժմ նրանց է փնտրում, քանի որ ժամանակն է մշտական, հուսալի օգնականներ ունենալու, որոնց կարող է սովորեցնել, թե իրենից հետո ինչպես շարունակեն ծառայությունը։

Ծովափով քայլելիս Հիսուսը տեսնում է, որ Սիմոն Պետրոսը իր գործընկերների հետ ուռկաններն է լվանում։ Նա մոտենում է նրանց, մտնում է Պետրոսի նավակը և խնդրում, որ նա ցամաքից մի փոքր հեռացնի այն։ Երբ նրանք ցամաքից փոքր–​ինչ հեռանում են, Հիսուսը նստում է նավակի մեջ և սկսում ուսուցանել ափի մոտ հավաքված մարդկանց։

Այնուհետև նա Պետրոսին ասում է.

— Նավակը դեպի խորքը տար, և ձեր ցանցերը գցեք որսալու։

— Վարդապե՛տ,— պատասխանում է Պետրոսը,— ամբողջ գիշեր չարչարվեցինք և ոչինչ չբռնեցինք, բայց քանի որ դու ես ասում, կգցե՛մ ցանցերը։

Ձկնորսներն ուռկանները ծովն են գցում և այնքան շատ ձուկ են բռնում, որ ուռկանները սկսում են պատռվել։ Նրանք շտապ օգնության են կանչում իրենց գործընկերներին, որոնք ոչ հեռու մեկ այլ նավակի մեջ են։ Շուտով երկու նավակներն էլ այնքան շատ ձկներով են լցվում, որ սկսում են սուզվել։ Սա տեսնելով՝ Պետրոսն ընկնում է Հիսուսի առաջ և ասում.

— Հեռացի՛ր ինձանից, որովհետև ես մեղավոր մարդ եմ, Տե՛ր։

— Մի՛ վախեցիր,— պատասխանում է Հիսուսը։— Այսուհետև դու կենդանի մարդկանց պիտի որսաս։

Հիսուսը հրավիրում է նաև Պետրոսի եղբայր Անդրեասին։ «Իմ հետևի՛ց եկեք,— հորդորում է նրանց,— և ես ձեզ մարդկանց որսորդներ կդարձնեմ»։ Նույն հրավերն են ստանում նրանց գործընկերներ Հակոբոսն ու Հովհաննեսը՝ Զեբեդեոսի որդիները, և նրանք նույնպես առանց երկմտելու հետևում են Հիսուսին։ Այսպիսով՝ այս չորսը թողնում են իրենց աշխատանքը՝ ձկնորսությունը, և դառնում Հիսուսի չորս մշտական, հուսալի հետևորդները։ Ղուկաս 5։1–11; Մատթեոս 4։13–22; Մարկոս 1։16–20; Եսայիա 9։1, 2։

▪ Ինչո՞ւ է Հիսուսը կանչում իր աշակերտներին, որ իր հետևից գնան, և ովքե՞ր են նրանք։

▪ Ո՞ր հրաշքն է վախեցնում Պետրոսին։

▪ Հիսուսը ինչպիսի՞ որսով զբաղվելու հրավեր է տալիս իր աշակերտներին։