Հիշարժան դեպքեր Եհովայի վկաների ժամանակակից պատմությունից
1870 Չարլզ Թեյզ Ռասելը և մի խումբ մարդիկ Պիտսբուրգից և Ալեգեյնիից (Փենսիլվանիա, ԱՄՆ) սկսում են կանոնավորաբար ուսումնասիրել Աստվածաշունչը։
1870–1875 Ռասելը և նրա ընկերակիցները իրենց կատարած ուսումնասիրությունների արդյունքում հասկացան, որ երբ Քրիստոսը կրկին գա, մարդկանց աչքին անտեսանելի կլինի, նրա վերադարձը մեծ օրհնություններ կբերի երկրի վրա ապրող բոլոր ընտանիքներին։
1872 Ռասելը և նրա ընկերակիցները հասկացան մարդկության համար Քրիստոսի վճարված փրկագինը։
1876 Չ. Թ. Ռասելը ստանում է «Առավոտվա մունետիկի» հունվարի թողարկումը. այդ տարի ամռանը հանդիպում է Ն. Հ. Բարբերի՝ պարբերականի խմբագրի հետ Ֆիլադելֆիայում (Փենսիլվանիա)։
Չ. Թ. Ռասելը գրում է հոդված, որը լույս է տեսնում «Աստվածաշնչի հետազոտող» պարբերականում (Բրուքլին, Նյու Յորք), որում նա գրում է, որ 1914 թվականին ավարտվելու են հեթանոսների ժամանակները։
1877 «Երեք աշխարհ» գիրքը հրատարակվել է Ն. Հ. Բարբերի և Չ. Թ. Ռասելի միահամուռ ուժերով։
Չ. Թ. Ռասելը հրատարակում է «Ինչու և ինչպես է վերադառնալու մեր Տերը» գրքույկը «Առավոտվա մունետիկի» գրասենյակում (Ռոչեստեր, Նյու Յորք)։
1879 Ռասելը մայիս ամսից այլևս չի աջակցում «Առավոտվա մունետիկի» տպագրությանը փրկանքի վերաբերյալ Բարբերի ունեցած տեսակետի պատճառով։
«Սիոնի Դիտարան և Քրիստոսի ներկայության մունետիկ» պարբերագրի առաջին թողարկումը լույս է տեսել 1879-ի հուլիսին։
1881 Աստվածաշունչ ուսումնասիրողների կողմից թողարկվեցին առաջին թերթիկները. 1914-ից առաջ տարեկան տասնյակ միլիոնավոր թերթիկներ են տարածվել 30 լեզուներով։
Հիմնվում է «Սիոնի Դիտարանի և թերթիկի ընկերությունը». հնչում է «Պահանջվում է 1000 քարոզիչ» կոչը՝ հրավիրելով Աստվածաշունչ ուսումնասիրողներին հնարավորության դեպքում ծառայել որպես գրքեր տարածողներ կամ քարոզչությանը տրամադրել այնքան ժամանակ, որքան կարող էին։
Մեծ Բրիտանիայի խոշոր քաղաքներում «Սնունդ՝ խորհրդածող քրիստոնյաների համար» հրատարակության 300000 օրինակ բաժանվեց եկեղեցի հաճախող մարդկանց։
1883 «Դիտարանը» հասնում է Չինաստան. շուտով այնտեղ նախկին պրեսբիտերական միսիոները սկսում է քարոզել ուրիշներին։
1884 «Սնունդ՝ խորհրդածող քրիստոնյաների համար» հրատարակությունը հասնում է Լիբերիա (Աֆրիկա). մի երախտապարտ ընթերցող լրացուցիչ օրինակներ է խնդրում ուրիշներին բաժանելու համար։
Դեկտեմբերի 15-ին «Սիոնի Դիտարանի և թերթիկի ընկերությունը» պետականորեն գրանցվեց Փենսիլվանիայում։
1885 «Դիտարան ընկերության» հրատարակությունները արդեն կարդում են ճշմարտությանը ծարավ մարդիկ Հարավային Ամերիկայում, Եվրոպայում, Աֆրիկայում և Ասիայում։
1886 Թողարկվում է «Դարերի աստվածային ծրագիրը» գիրքը՝ «Հազարամյակի արշալույս» ժողովածուի (հետագայում կոչվեց «Գրությունների ուսումնասիրություն») առաջին հատորը։
1889 Արչ Սթրիթում (Ալեգեյնի, Փենսիլվանիա) կառուցվում է «Աստվածաշնչի տունը». այստեղ էր գտնվում Ընկերության գլխավոր վարչությունը։
1891 Ալեգեյնիում (Փենսիլվանիա) տեղի ունեցավ Աստվածաշունչ ուսումնասիրողների առաջին մեծ հավաքույթը, որը նրանք անվանեցին համաժողով (ապրիլի 19–25)։
1894 Շրջագայող վերակացուները, որոնք ժամանակի ընթացքում կոչվեցին պիլիգրիմներ (այսօր՝ շրջանային և մարզային վերակացուներ), Ընկերության հատուկ ծրագրով սկսում են այցելել ժողովներ։
1900 Լոնդոնում (Անգլիա) բացվում է «Դիտարան ընկերության» առաջին մասնաճյուղը։
Աստվածաշունչ ուսումնասիրողները վկայություն են տալիս 28 երկրներում։ Բարի լուրը հասել է նաև 13 այլ երկրներ։
1903 Մեծ քանակությամբ թերթիկներ են տարածվում կիրակի օրերին տնետուն ծառայության ժամանակ. մինչ այդ թերթիկները մեծամասամբ տարածվում էին փողոցներում և եկեղեցիների մոտակայքում։
1904 Չ. Թ. Ռասելի քարոզները կանոնավորաբար տպագրվում են թերթերում. տասը տարի անց դրանք արդեն տպագրվում էին մոտ 2000 թերթերում։
1909 Ապրիլին Ընկերության գլխավոր վարչությունը տեղափոխվում է Բրուքլին (Նյու Յորք)։
1914 Հունվարին Նյու Յորքում առաջին անգամ ցուցադրվում է «Արարչության լուսադրաման». մինչև տարվա վերջ այն դիտեց ընդհանուր հաշվով ավելի քան 9000000 հոգի Հյուսիսային Ամերիկայում, Եվրոպայում և Ավստրալիայում։
Հոկտեմբերի 2-ին Բրուքլինի Բեթելի ճաշարանում Չ. Թ. Ռասելը հայտարարում է. «Հեթանոսների ժամանակներն ավարտվեցին»։
Աստվածաշունչ ուսումնասիրողները ակտիվորեն քարոզում են 43 երկրներում. 5155 հոգի մասնակցում է քարոզչական գործին. Հիշատակի երեկոյին ներկա եղավ 18243 հոգի։
1916 Հոկտեմբերի 31-ին մահանում է Չ. Թ. Ռասելը 64 տարեկանում գնացքում, երբ այն անցնում էր Տեխասով։
1917 Հունվարի 6-ին Ջ. Ֆ. Ռադերֆորդը դառնում է Ընկերության նախագահը. մինչ այդ մոտ երկու ամիս Ընկերության բոլոր աշխատանքները վերահսկում էր երեք հոգուց բաղկացած գործադիր կոմիտեն։
Թողարկվում է «Գաղտնիքը բացահայտված է» գիրքը և հուլիսի 17-ին բաժանվում է Բրուքլինի Բեթելի ընտանիքի անդամներին. Ընկերության տնօրենների խորհրդի չորս ընդդիմադիր անդամները սկսեցին ուժգին հակառակություն ցույց տալ. դրանից հետո շատ ժողովներ պառակտվեցին։
1918 «Աշխարհի վերջը եկել է. այժմ ապրող միլիոնավորներ գուցե մահ չտեսնեն» վերնագրով ելույթը առաջին անգամ ներկայացվեց փետրվարի 24-ին Լոս Անջելեսում (Կալիֆորնիա)։ Մարտի 31-ին այն ներկայացվեց Բոստոնում (Մասաչուսեթս) և կոչվեց «Աշխարհի վերջը եկել է. այժմ ապրող միլիոնավորներ երբեք չեն մահանալու»։
Մայիսի 7-ին Ջ. Ֆ. Ռադերֆորդը և նրա ընկերակիցները ձերբակալվեցին՝ դաշնային իշխանության կարգադրագրերի համաձայն. դատավարությունը սկսվեց հունիսի 5-ին. հունիսի 21-ին նրանք դատապարտվեցին (նրանցից մեկը՝ հուլիսի 10-ին) երկարաժամկետ բանտարկության պետական բանտում։
Օգոստոսին Բրուքլինի գլխավոր վարչությունը փակվեց, և գրասենյակները տեղափոխվեցին Պիտսբուրգ ավելի քան մեկ տարով։
1919 Ընկերության ղեկավարներն և նրանց ընկերակիցները մարտի 26-ին ազատ արձակվեցին գրավի դիմաց. մայիսի 14-ին վերաքննիչ դատարանը բեկանեց ստորին ատյանի դատարանի որոշումը, և գործն ուղարկվեց նոր քննության. հաջորդ տարի մայիսի 5-ին կառավարությունը դադարեցնում է դատական գործի քննությունը։
Ջ. Ֆ. Ռադերֆորդը որոշեց մի հանդիպում կազմակերպել, հասկանալու համար, թե կարելի է արդյոք վերսկսել Աստվածաշունչ ուսումնասիրողների գործունեությունը և այդ նպատակով մայիսի 4-ին Լոս Անջելեսի (Կալիֆորնիա) Քլունի անվան դահլիճում ներկայացրեց «Հույս վհատված մարդկության համար» վերնագրով ելույթը. այնքան շատ մարդ եկավ լսելու ելույթը, որ դահլիճում բավականաչափ տեղեր չկային, ուստի ելույթը ներկայացվեց երկրորդ անգամ։
Աստվածաշունչ ուսումնասիրողները համաժողով անցկացրին Սիդար Փոյնթում (Օհայո) սեպտեմբերի 1–8-ը. հայտարարվեց նոր պարբերագրի՝ «Ոսկե դարի» (այժմ՝ «Արթնացե՛ք») հրատարակման մասին։
Քարոզչական ծառայությանը զարկ տալու նպատակով թողարկվում է «Տեղեկագիր» (այժմ՝ «Մեր թագավորական ծառայությունը») թերթիկը։
Այս տարվա հաշվետվությունը ցույց է տալիս, որ 5793 Աստվածաշունչ ուսումնասիրողներ ակտիվորեն քարոզում են 43 երկրներում. Հիշատակի երեկոյի ներկաների թիվը 21411 էր։
1920 «Դիտարան ընկերությունը» տպագրություն է սկսում իր տպարանում (Բրուքլին)։
1922 Փետրվարի 26-ին Կալիֆորնիայում առաջին անգամ ռադիոյով հեռարձակվեց Ջ. Ֆ. Ռադերֆորդի ելույթը՝ հիմնված Աստվածաշնչի վրա։
Սեպտեմբերի 5–13-ը Սիդար Փոյնթում (Օհայո) տեղի ունեցավ Աստվածաշունչ ուսումնասիրողների համաժողովը. հնչում է «հռչակե՛ք, հռչակե՛ք, հռչակե՛ք Թագավորին և նրա թագավորությունը» կոչը։
Գերմանիայում հոգևորականությունը հրահրում է ոստիկաններին ձերբակալել Աստվածաշունչ ուսումնասիրողներին, երբ վերջիններս քարոզչական ծառայության ժամանակ աստվածաշնչյան գրականություն են տարածում։
1924 Փետրվարի 24-ին WBBR-ը («Դիտարան ընկերության» առաջին ռադիոկայանը) սկսում է հեռարձակումները։
1925 «Դիտարանի» մարտի 1-ի համարում քննարկվում է, որ 1914-ին ծնվեց Աստծու Թագավորությունը, ցույց է տրվում, որ կան միմյանցից տարբերվող և միմյանց հակառակ երկու կազմակերպություններ՝ Եհովայի և Սատանայի։
1926 Հորդոր է տրվում կիրակի օրերին քարոզել տնից տուն և առաջարկել գրքեր։
1928 Նյու Ջերսիում Աստվածաշունչ ուսումնասիրողները ձերբակալվում են տնետուն ծառայության ժամանակ աստվածաշնչյան գրականություն տարածելու պատճառով։ Տասը տարիների ընթացքում ամեն տարի ավելի քան 500 այդպիսի ձերբակալումներ տեղի էին ունենում Միացյալ Նահանգներում։
1931 Բանաձևի միջոցով ընդունում են Եհովայի վկաներ անունը հուլիսի 26-ին Կոլումբուսում (Օհայո) անցկացված համաժողովի ժամանակ և դրանից հետո աշխարհի մյուս վայրերում անցկացված համաժողովների ժամանակ։
1932 «Արդարացում» (գիրք 2) գրքում բացատրվում է, թե ինչու են վերականգնման մասին աստվածաշնչյան մարգարեությունները վերաբերում ոչ թե մարմնավոր Իսրայելին, այլ հոգևոր Իսրայելին։
Դադարեցվում է «երեցներին ընտրելու» կարգը՝ համաձայն «Դիտարանի» օգոստոսի 15-ի և սեպտեմբերի 1-ի թողարկումներում տպագրված հոդվածների բացատրության։
1933 Եհովայի վկաների գործունեությունն արգելվում է Գերմանիայում։ Դաժան հալածանքները շարունակվեցին մինչև Երկրորդ համաշխարհային պատերազմի վերջը, և 6262 հոգի բանտարկվեց, ու նրանք ընդհանուր հաշվով 14332 տարի անցկացրին բանտարկության մեջ. 2074 հոգի ուղարկվեց համակենտրոնացման ճամբարներ, որտեղ նրանց անցկացրած տարիների ընդհանուր թիվը 8332 էր։
Ձայնի վերարտադրման սարքերի (մի քանիսը տեղադրվում էին ավտոմեքենաների վրա) օգնությամբ Վկաները աստվածաշնչյան ելույթներ էին հնչեցնում հասարակական վայրերում։
1934 Շարժական ֆոնոգրաֆների օգնությամբ Վկաները հետաքրքրվող անհատների համար հնչեցնում էին աստվածաշնչյան ելույթների կարճ ձայնագրություններ։
1935 Մայիսի 31-ին Վաշինգտոնի համաժողովի ժամանակ հստակորեն նշվեց, որ «մեծ բազմությունը» երկրային կյանքի հույս ունեցող մարդկանց խումբ է. 840 հոգի մկրտվեց այդ համաժողովին. աստիճանաբար սկսվեց ավելի մեծ շեշտ դրվել երկրային դրախտում ապրելու հույսի վրա, որ ունեն Աստծու ներկայիս հավատարիմ ծառաները։
Հոնոլուլուում (Հավայի) ժողովի հանդիպումների անցկացման վայրն առաջին անգամ կոչվեց Թագավորության սրահ։
1936 Առաջին անգամ Թագավորության քարոզիչները կրում են ազդագրեր, որպեսզի մարդկանց ազդարարեն աստվածաշնչյան ելույթների մասին։
Հորդոր է տրվում Աստվածաշնչի ուսումնասիրություն սկսել հետաքրքրվող անհատների հետ «Հարստություն» գրքի և Աստվածաշնչի օգնությամբ. հաճախ ուսումնասիրությունը անցկացվում էր հետաքրքրվող անհատների խմբի հետ։
1937 Շարժական ֆոնոգրաֆների միջոցով Վկաները աստվածաշնչյան ելույթներ են հնչեցնում դռան շեմին։
1938 Վերակացուներ ընտրելու աստվածապետական կարգը փոխարինում է ժողովրդավարական մեթոդներին՝ համաձայն «Դիտարանի» հունիսի 1-ի և 15-ի համարների։
Զոնալ համաժողովներ (այժմ կոչվում են շրջանային համաժողովներ) են կազմակերպվում մի քանի ժողովների համար։
1939–1945 Բրիտանական կայսրության և Բրիտանական համագործակցության ողջ տարածքի մեջ մտնող 23 երկրներում արգելքի տակ էր Եհովայի վկաների գործունեությունը կամ նրանց գրականությունը։
1940 Եհովայի վկաները սկսում է կանոնավորաբար փողոցներում առաջարկել «Դիտարան» և «Մխիթարություն» պարբերագրերը։
Հունիսի 3-ին ԱՄՆ-ի Գերագույն դատարանը վճիռ կայացրեց, համաձայն որի՝ դրոշին պատիվ տալը բոլորի համար պարտադիր էր՝ անկախ կրոնական պատկանելությունից. դրանից հետո Վկաների դեմ ամբոխների հարձակումները համատարած բնույթ կրեցին։
1941 Ակտիվ Վկաների թիվը անցնում է 100000-ից և հասնում է 109371-ի 107 երկրներում՝ չնայած այն բանին, որ Երկրորդ համաշխարհային պատերազմը մոլեգնում էր Եվրոպայում և տարածվում էր Աֆրիկայում և Ասիայում։
1942 Հունվարի 8-ին Սան Դիեգոյում (Կալիֆորնիա) մահանում է Ջ. Ֆ. Ռադերֆորդը։
Հունվարի 13-ին Ն. Հ. Նորը դառնում է Ընկերության նախագահը։
«Դիտարանի» տպաքանակը այդ տարի բոլոր լեզուներով կազմում էր 11325143։
Փետրվարի 16-ին Ընկերության գլխավոր վարչությունում ծառայողների համար կազմակերպվում է Աստվածապետական ծառայության խորացված դասընթացը։
«Դիտարան ընկերությունը» իր (գլանափաթեթավոր ռոտացիոն) տպագրահաստոցով տպագրում է ամբողջական Աստվածաշունչ՝ «Ջեյմս թագավորի թարգմանությունը»։
1943 Փետրվարի 1-ին սկսվում է «Դիտարանի» աստվածաշնչյան «Գաղաադ» դպրոցի առաջին դասարանի դասընթացը։
Ապրիլին համաժողովների ժամանակ հայտարարվեց, որ Աստվածապետական ծառայության դասընթացը (այժմ՝ Աստվածապետական ծառայության դպրոց) անցկացվելու է ժողովներում։
ԱՄՆ-ի Գերագույն դատարանը հօգուտ Եհովայի վկաների վճիռներ է կայացնում 24 դատական գործերից 20-ի համար. հունիսի 14-ին Ավստրալիայի Բարձրագույն դատարանի որոշմամբ Վկաների գործունեության վրայից հանվեց արգելքը։
1945 Հոկտեմբերի 1-ից սկսած՝ Ընկերության տնօրենների խորհրդի անդամներն այլևս չէին ընտրվում քվեարկողների կողմից, որոնք ձայնի իրավունք էին ստանում՝ ֆինանսական ներդրում անելով։
Ամեն ամիս միջին հաշվով անցկացվում է 104814 Աստվածաշնչի անվճար տնային ուսումնասիրություն։
1946 Նախորդ յոթ տարիներին քրիստոնեական չեզոքություն պահպանելու համար ավելի քան 4000 Եհովայի վկաներ Միացյալ Նահանգներում և 1593 Վկաներ Մեծ Բրիտանիայում ձերբակալվեցին և բանտարկվեցին մեկ ամսից մինչև հինգ տարի ժամկետներով։
Երկրորդ համաշխարհային պատերազմի ավարտից մեկ տարի անց 6504 հոգի ծառայում էր լիաժամ՝ որպես ռահվիրա։
Սկսում է թողարկվել «Արթնացե՛ք» (նախկինում՝ «Ոսկե դար» և «Մխիթարություն») պարբերագիրը. տարեկան տպաքանակը կազմում է 13934429։
Հունաստանում ավելի քան 470 Վկաների դեմ դատական գործեր հարուցվեցին աստվածաշնչյան ճշմարտությունները մարդկանց պատմելու համար։
1947 Քվեբեկի (Կանադա) դատարաններում քննվում են Եհովայի վկաների քարոզչական գործունեությանն առնչվող 1700 դատական գործեր։
Ամբողջ աշխարհում ժողովների թիվն անցնում է 10000-ից՝ հասնելով 10782-ի։
1950 Օգոստոսի 2-ին Նյու Յորքում համաժողովի ժամանակ հայտարարվում է անգլերեն լեզվով «Քրիստոնեական Հունարեն Գրությունների նոր աշխարհ թարգմանության» լույսընծայման մասին։
1953 Սեպտեմբերի 1-ին սկսվում է կրթական լայնածավալ ծրագիր, որի միջոցով Եհովայի վկաները սովորում են արդյունավետորեն կատարել տնետուն ծառայությունը։
1957 Եհովայի վկաները 169 երկրներում 100135016 ժամ տրամադրեցին Աստծու Թագավորության լուրը հռչակելու և Աստվածաշնչի ուսումնասիրություններ անցկացնելու գործին։
1958 Նյու Յորքում «Աստծու կամքը» խորագրով միջազգային համաժողովին ներկա եղավ 253922 հոգի 123 երկրներից. 7136 հոգի մկրտվեց։
1959 Մարտի 9-ից Սաութ Լանսինգում (Նյու Յորք) սկսեցին անցկացվել Թագավորական ծառայության դպրոցի դասընթացները, որոնք նախատեսված էին ժողովի վերակացուների և շրջագայող վերակացուների համար։
1961 Ընկերության մասնաճյուղերի վերակացուների առաջին խումբը ներկա է լինում 10-ամսյա հատուկ դասընթացին, որն անցկացվում է Բրուքլինում (Նյու Յորք). դասընթացի նպատակն էր միասնություն պահպանել Եհովայի վկաների գործունեության մեջ ամբողջ աշխարհում։
Անգլերեն լեզվով թողարկվում է «Աստվածաշնչի նոր աշխարհ թարգմանությունը» մեկ հատորով։
1963 «Քրիստոնեական Հունարեն Գրությունների նոր աշխարհ թարգմանությունը» լույս է տեսնում վեց այլ լեզուներով (գերմաներեն, իսպաներեն, իտալերեն, հոլանդերեն, պորտուգալերեն և ֆրանսերեն)։ Հետագայում այն թողարկվեց ավելի շատ լեզուներով։
Միլիոնից ավելի Եհովայի վկաներ ակտիվորեն ծառայում են 198 երկրներում. այս տարի քարոզիչների բարձրագույն թիվը 1040836 էր. մկրտվեց 62798 հոգի։
1965 Եհովայի վկաները սկսում են օգտագործել առաջին համաժողովների սրահը, որը Նյու Յորքում գտնվող մի թատրոնի շենք էր։ Վկաները այն վերանորոգել էին նախքան շահագործելը։
1967 Երկարատև և դաժան հալածանքների ալիքները ողողեցին ողջ Մալավին և տևեցին տարիներ։
1969 Աստվածաշնչի ուսումնասիրությունների թիվը անցնում է մեկ միլիոնից. համաձայն հաշվետվությունների՝ միջին թիվը 1097237 էր։
1971 Կառավարիչ մարմնի անդամների թիվն ավելանում է։ Հոկտեմբերի 1-ից նախագահողը սկսում է ամեն տարի փոխվել՝ ըստ հերթականության։
1972 Հոկտեմբերի 1-ից Եհովայի վկաների ժողովներում վերակացությունը սկսում է իրականացնել երեցների խորհուրդը և ոչ թե միայն մեկ եղբայր։
1974 Ամբողջ աշխարհում քարոզիչների բարձրագույն թիվը հասնում է 2021432-ի. ռահվիրաների թիվը ավելանում է՝ 94604-ից (1973) հասնելով 127135-ի։
1975 Կազմակերպչական բարեփոխում տեղի ունեցավ Կառավարիչ մարմնի գործունեության մեջ. դեկտեմբերի 4-ին Եհովայի վկաների գործունեության վերահսկողությունը մեծամասամբ իրականացվում է վեց կոմիտեների կողմից, որոնք սկսում են գործել 1976-ի հունվարի 1-ից։
1976 Փետրվարի 1-ից «Դիտարան ընկերության» մասնաճյուղերի գործունեությունը սկսում են վերահսկել երեք կամ ավելի հոգևորապես հասուն եղբայրներից բաղկացած կոմիտեները և ոչ թե միայն մեկ վերակացու։
1977 Ռահվիրայական ծառայության դպրոցը հատուկ կրթություն է տրամադրում տասնյակ հազարավոր ռահվիրաների ամբողջ աշխարհում։
1984 Եհովայի վկաները միջին հաշվով 2047113 Աստվածաշնչի ուսումնասիրություն են անցկացնում։
1985 Սկսում է գործել միջազգային շինարարական ծրագիրը կամավորների մասնակցությամբ. ամբողջ աշխարհում շինարարական ծրագրերի վերահսկողությունն իրականացվում է գլխավոր վարչությունից։
Համաձայն հաշվետվությունների՝ 3024131 քարոզիչներ մասնակցում են քարոզչական գործին 222 երկրներում. ռահվիրաների միջին թիվը 322821 է. այս տարի մկրտվեց 189800 հոգի։
1986 Տարածաշրջանային շինարարական կոմիտեներ են նշանակվում Թագավորության սրահների շինարարության հարցում ժողովներին օգնելու համար։
1987 Աշակերտներ պատրաստելու գործն ընդլայնվում է. 3005048 Աստվածաշնչի ուսումնասիրություն է անցկացվում առանձին անհատների և ընտանիքների հետ, շատերի հետ՝ ամեն շաբաթ. այս տարի մկրտվեց 230843 հոգի։
Հոկտեմբերի 1-ին սկսվում է Ծառայության կատարելագործման դպրոցի առաջին դասընթացը Կորիոպոլիսում (Փենսիլվանիա)։
1989 Արևելյան Եվրոպայում տեղի ունեցած փոփոխությունների շնորհիվ հնարավոր եղավ երեք մեծ միջազգային համաժողովներ անցկացնել Լեհաստանում, իսկ հետագա տարիներին՝ նաև այլ երկրներում։
1990 Աֆրիկայի և Արևելյան Եվրոպայի երկրներում Եհովայի վկաների գործունեության վրայից հանվում են սահմանափակումները, ինչի շնորհիվ հնարավորություն է ստեղծվում վկայություն տալ 100000000 բնակչության շրջանում ևս։
Քարոզիչների նոր բարձրագույն թիվ է գրանցվում՝ 4017213. ռահվիրաների թիվը հասնում է 536508-ի. ընդհանուր հաշվով՝ 895229424 ժամ է տրամադրվել Թագավորության հռչակման գործին։
1991 Աֆրիկայի և Արևելյան Եվրոպայի երկրներում Եհովայի վկաների գործունեության վրայից հանվում են արգելքները, ինչի շնորհիվ հնարավորություն է ստեղծվում Աստծու Թագավորության բարի լուրը տարածել 390000000 բնակչության շրջանում ևս։
1992 «Դիտարանը» թողարկվում է միջին հաշվով 15570000 տպաքանակով 111 լեզուներով. «Արթնացե՛ք»-ը լույս է տեսնում 67 լեզուներով միջին հաշվով 13110000 տպաքանակով։
Իր նախադեպը չունեցող հսկայածավալ վկայություն է տրվում. 4472787 քարոզիչներ 229 երկրներում մասնակցում են Թագավորության հռչակման գործին. ամեն ամիս միջին հաշվով 605610 հոգի ծառայում է որպես ռահվիրա. 1024910434 ժամ է տրամադրվել վկայության գործին. 4278127 Աստվածաշնչի ուսումնասիրություն է անցկացվել. մկրտվել է 301002 հոգի։