Թագավորության լուրը № 36

Ի՞նչ է սպասվում ձեզ նոր հազարամյակում

Նոր հազարամյակը նոր դարաշրջանի սկի՞զբ

ՔՍԱՆԵՐՈՐԴ դարն ավարտվեց 1999 թ. դեկտեմբերի 31–ի կեսգիշերին։a Ցավալի իրադարձություններով հագեցած դարաշրջան էր դա, բայց նաև՝ գիտատեխնիկական առաջընթացի, բժշկության մեջ անսպասելի հաջողությունների, ինֆորմացիայի տեղատարափի և համաշխարհային տնտեսության ծաղկման մի ժամանակաշրջան։ Ուստի, նոր հազարամյակը շատերի համար մեծ հույսերի ու փոփոխությունների խորհրդանիշ է դարձել։ Բայց արդյո՞ք այս նոր հազարամյակում վերջ կդրվի պատերազմներին, աղքատությանը, հիվանդությանը և շրջապատող միջավայրի աղտոտմանը...

Շատերն են նման հույսեր փայփայում։ Սակայն որքանո՞վ է հավանական, որ նոր հազարամյակը այսպիսի փոփոխություններ կբերի իր հետ. փոփոխություններ, որոնց շնորհիվ ապահով ու անվտանգ կդառնա ինչպես ձեր, այնպես էլ ձեր ընտանիքի անդամների կյանքը։ Քննարկենք աչքի ընկնող մի քանի լուրջ խնդիրներ, որոնց հետ այսօր բախվում է մարդկությունը։

Շրջապատող միջավայրի աղտոտվածությունը

Արդյունաբերական ձեռնարկություններով հարուստ երկրները «ամբողջ աշխարհում վնասակար ազդեցություն են գործում շրջապատող միջավայրի վրա, համատարած աղտոտվածության պատճառ դառնում և քայքայում էկոլոգիական համակարգերը»։ Եթե այսպես շարունակվի, «բնական միջավայրի վրա անբարենպաստ ազդեցությունները գնալով կսաստկանան» («Global Environment Outlook—2000», ՄԱԿ–ի՝ շրջապատող միջավայրի մասին ծրագիր)։

Հիվանդությունները

«Ներկայումս բարգավաճող երկրներում մահացության 10 դեպքից 5–ը ոչ վարակիչ հիվանդությունների պատճառով է տեղի ունենում. ենթադրվում է, որ 2020 թ.–ին այդ հարաբերությունը կկազմի 10։7» («The Global Burden of Disease», Հարվարդի համալսարանի մամուլ, 1996)։

Մի շարք փորձագետներ պնդում են, որ «մոտավորապես 2010 թ.–ին 23 երկրներում, որտեղ այսօր մոլեգնում է [ՁԻԱՀ–ի] համաճարակը, բնակչության թիվը կնվազի 66 միլիոնով» («Confronting AIDS: Evidence From the Developing World», Եվրոպական հանձնաժողովի և Համաշխարհային բանկի վիճակագրական տվյալներ)։

Աղքատությունը

«Մոտ 1,3 միլիոն բնակիչների օրական եկամուտը կազմում է ավելի քիչ, քան մեկ ամերիկյան դոլլարը, իսկ մոտավորապես մեկ միլիարդ անհատներ ի վիճակի չեն՝ իրենց առաջնահերթ կարիքները բավարարելու» («Human Development Report 1999», ՄԱԿ–ի՝ զարգացման ծրագիր)։

Պատերազմները

«Հնարավոր է, որ բռնությունը [տարբեր երկրներում] հասնի աննկարագրելի չափերի։ Էթնիկական, ցեղային և կրոնական [պառակտումների] հետևանքով առաջ եկած.... բռնությունը կդառնա.... ամենատարածված ընդհարումը առաջիկա քառորդ դարում՝ ....իր հետ տանելով տարեկան հարյուր հազարավորների կյանք» («New World Coming: American Security in the 21st Century», ԱՄՆ–ի ազգային անվտանգության կոմիտե. 21–րդ դար)։

Նոր հազարամյակը ողջ աշխարհում ընդունվեց մեծ ցնծությամբ ու հուզմունքով. մի երևույթ, որը քողարկում է այն իրողությունը, որ շրջապատող միջավայրի աղտոտումը, հիվանդությունները, աղքատությունը և պատերազմներն առավել, քան երբևէ համատարած բնույթ են կրում։ Իսկ նման խնդիրների հիմքում ընկած են ագահությունը, անվստահությունը և եսասիրությունը. հատկություններ, որոնք անհնար է արմատախիլ անել մարդկանց միջից գիտական առաջխաղացումների, տեխնիկայի կամ էլ քաղաքականության միջոցով։

Մարդկությանը օրհնություններ բերող հազարամյակ

«Մարդինը չէ իր ճանապարհը, [և] գնացող մարդի բանը չէ, որ ուղղէ իր գնացքը»,— արձանագրել է վաղեմի մի գրող (Երեմիա 10։23)։ Մարդ արարածը ոչ միայն ի վիճակի չէ երկիրը կառավարելու, այլև իրավո՛ւնք չունի դա անելու։ Միմիայն մեր Ստեղծիչը՝ Եհովա Աստված ունի երկրի վրա իշխելու իրավունք, և միայն նա գիտի, թե ինչպես կարելի է լուծել մարդկության խնդիրները (Հռովմայեցիս 11։33—36; Յայտնութիւն 4։11)։

Իսկ ե՞րբ և ինչպե՞ս... Անժխտելի է այն փաստը, որ «վերջին օրերի» ավարտը շատ մոտ է։ Դրանում համոզվելու համար կարող եք բաց անել ձեր Աստվածաշունչը և կարդալ Բ Տիմոթէոս 3։1—5 համարները։ Այստեղ հստակորեն թվարկվում են ներկայիս «չար ժամանակներում» ապրող մարդկանց բնավորությանը հատուկ մի շարք գծեր։ Մատթէոս 24։3—14–ում և Ղուկաս 21։10, 11–ում նույնպես տրվում է «վերջին օրերի» նկարագիրը։ Այս համարներում խոսվում է 1914 թ.–ից ի վեր տեղի ունեցող իրադարձությունների մասին, որոնք են՝ համաշխարհային պատերազմները, համաճարակները, համատարած սովը և այլն։

Շուտով «վերջին օրերն» իրենց վախճանին կհասնեն։ Դանիէլ 2։44–ում կարդում ենք. «Երկնքի Աստուածը մէկ թագաւորութիւն է վեր կացնելու, որ յաւիտեանս չի աւերուիլ, ....նա պիտի փշրէ ու վերջացնէ այս բոլոր [երկրային] թագաւորութիւնները. իսկ նա ինքը կ’մնայ յաւիտեանս»։ Ինչպես տեսնում ենք, վաղուց արդեն կանխագուշակվել էր, որ Աստված մի Թագավորություն, այլ կերպ ասած՝ կառավարություն է հաստատելու երկիրը կառավարելու նպատակով։ Յայտնութիւն 20։4 խոսքի համաձայն՝ այդ կառավարությունը իշխելու է 1 000 տարի՝ մի հազարամյակ։ Նկատի առնենք միայն մի քանիսն այն ոլորտներից, որոնցում Աստված վերափոխումներ է մտցնելու այդ փառավոր Հազարամյակի ընթացքում ողջ մարդկային հասարակության կենսապայմանները բարելավելու համար։

Տնտեսական վիճակը։ «Տուներ պիտի շինեն եւ բնակուեն, եւ այգիներ տնկեն ու նորանց պտուղն ուտեն։ Նորանք չեն շինիլ, որ ուրիշը բնակուէ, նորանք չեն տնկել, որ ուրիշն ուտէ» (Եսայիա 65։21, 22)։

Առողջական վիճակը։ «Այն ժամանակ բացուելու են կոյրերի աչքերը, եւ խուլերի ականջները պիտի բացուին։ Այն ժամանակ լոք է տալու կաղը եղջերուի պէս. եւ համրի լեզուն օրհներգելու է»։ «Այնտեղի բնակիչը չէ ասելու թէ ես տկար եմ» (Եսայիա 33։24; 35։5, 6)։

Շրջապատող միջավայրը։ Աստված ‘երկիրն ապականողներին ապականելու է’ (Յայտնութիւն 11։18, ԱԹ)։

Մարդկային փոխհարաբերությունները։ «Նորանք չեն վնասիլ եւ չեն ապականիլ իմ բոլոր սուրբ սարի վերայ. որովհետեւ երկիրը լիքն է լինելու Տիրոջ գիտութիւնով» (Եսայիա 11։9)։

Այսօր միլիոնավոր մարդիկ հավատ են ընծայում Աստվածաշնչի այս խոստումներին՝ ապագային նայելով լավատեսորեն ու վստահությամբ։ Ուստիև, նրանց համար ավելի հեշտ է հակազդել կյանքի ճնշումներին, ինչպես նաև լուծել խնդիրները։ Իսկ ինչպե՞ս կարող է Աստվածաշունչը առաջնորդության հեղինակավոր աղբյուր հանդիսանալ ձե՛ր կյանքում։

Կյանքի առաջնորդող գիտությունը

Գիտության և տեխնիկայի բնագավառներում ժամանակ առ ժամանակ ապշեցուցիչ հայտնագործություններ են կատարվում։ Բայցևայնպես, մարդկանց ձեռք բերած այդ նոր գիտելիքները երկրագնդի բնակչության մեծամասնության կյանքը ապահով ու երջանիկ չեն դարձնում։ Միակ գիտությունը, որի շնորհիվ հնարավոր կդառնա այդպիսի կյանքը, ամփոփված է Աստվածաշնչում՝ Յովհաննէս 17։3–ում, որտեղ կարդում ենք. «Յաւիտենական կեանքը այս է. որ ճանաչեն քեզ միակ ճշմարիտ Աստուած, նաեւ Յիսուս Քրիստոսին, որ դու ուղարկեցիր»։

Աստծո և Հիսուս Քրիստոսի մասին կարող ենք իմանալ Աստվածաշնչի էջերից։ Թեպետև շատերը այդ Սուրբ գրքի վերաբերյալ իրենց որոշակի կարծիքն ունեն, սակայն քչերն են անձամբ ուսումնասիրել այն։ Իսկ դուք ծանո՞թ եք Աստվածաշնչին։ Ինչ խոսք, այդ գրքի ընթերցանությունը ջանքեր է պահանջում, բայց արժե՛ այն կարդալ։ Աստվածաշունչը միակ գիրքն է, որ Աստծուց է ներշնչված և «օգտակար է ուսուցման, յանդիմանութեան, ուղղելու եւ արդարութեան մէջ խրատելու համար» (Բ Տիմոթէոս 3։16)։

Իսկ ինչպե՞ս կարող եք ծանոթանալ Աստվածաշնչին։ Եհովայի վկաները կարող են օգնել ձեզ։ Նրանք մի­լիոնավոր մարդկանց հետ անվճար ուսումնասիրություն են անցկացնում բնակարաններում։ Վկաներն օգտվում են Աստվածաշնչի վրա հիմնված հրատարակություններից, որոնցից մեկն էլ «Ի՞նչ է Աստված մեզնից պահանջում» գրքույկն է։ Ձեռնարկը աստվածաշնչյան հարցերին հակիրճ պատասխաններ է տալիս. հար­ցեր, որոնք, գուցե, ձեզ էլ են հետաքրքրում՝ ո՞վ է Աստված, ո՞րն է երկրի նկատմամբ Աստծո նպատակը, ի՞նչ է Աստծո Թագավորությունը, կամ ինչպե՞ս կարելի է Աստվածաշնչի օգնությամբ ընտանեկան կյանքը բարելավել։

Եթե ցանկանում եք, որպեսզի Եհովայի վկաները ձեզ էլ այցելեն, հաճեցեք լրացնել ներքևում տրված ձևաթերթիկը։ Նրանք մեծ ուրախությամբ ձեզ լրացուցիչ տեղեկություններ կտան Աստծո փառահեղ Թագավորության հազարամյա իշխանության մասին։

□ Ուղարկեք ինձ «Ի՞նչ է Աստված մեզնից պահանջում» գրքույկը։

□ Ինձ հետաքրքրում է Աստվածաշնչի անվճար, տնային ուսումնասիրությունը։

[ծանոթագրություն]