Պատմում են Թագավորության քարոզիչները
Ինչպես են ջրվում ճշմարտության սերմերը Չիլիում
ՀՅՈՒՍԻՍԱՅԻՆ Չիլիում գտնվող անապատում տարիներով անձրևներ չեն գալիս։ Սակայն, երբ դրանք սկսում են տեղալ, չորացած, ապառաժոտ գետինը բազմերանգ ծաղիկներից հյուսված մի գորգի է վերածվում։ Այդ գրավիչ տեսարանը գերում է աշխարհի տարբեր ծայրերից եկած զբոսաշրջիկներին։
Սակայն առավել հետաքրքիր երևույթ է տեղի ունենում Չիլիում ապրող մարդկանց շրջանում։ Աստվածաշնչի ճշմարտության ջրերը հոսում են դեպի երկրի բոլոր ծայրերը, և բազմաթիվ անկեղծ մարդիկ «ծաղկում են» որպես Հիսուս Քրիստոսի աշակերտներ։ Ճշմարտության ջրերը մարդկանց հասցնելու միջոցներից մեկը հեռախոսն է։ Հետևյալ դեպքերը պատմում են այն հոյակապ արդյունքների մասին, որոնք ձեռք են բերվել քարոզելու այս ձևի շնորհիվ։
• Կարինա անունով մի լիաժամ քարոզչուհու խնդրեցին շրջանային համաժողովի ծրագրում ցուցադրել, թե ինչպես կարելի է հեռախոսով վկայություն տալ։ Սակայն մինչ այդ նա չէր մասնակցել վկայության այդ ձևին։ Որպեսզի նրան ոգևորեին հանդես գալ շրջանային համաժողովի ծրագրում, երեցներից մեկն իր կնոջ և Կարինայի հետ միասին քննարկեցին հեռախոսով քարոզելու հետ կապված որոշ հարցեր։ Նրանք խորհուրդ տվեցին այս հարցում օգնություն ստանալու համար աղոթքով դիմել Եհովային։ Կարինան այդպես էլ արեց և վերջապես վճռեց գործի անցնել։
Կարինան ընտրեց մոտակա գյուղի հեռախոսահամարներից մեկը։ Լսափողը վերցրեց մի հեռախոսավարուհի, և Կարինան բացատրեց զանգահարելու նպատակը։ Կինը դրականորեն արձագանքեց, և նրանք պայմանավորվեցին երեք օր անց կրկին զրուցել։ Հեռախոսային հաջորդ զրույցի արդյունքը եղավ այն, որ Աստվածաշնչի ուսումնասիրություն սկսվեց «Ի՞նչ է Աստված մեզնից պահանջում» գրքույկով։ Այդ ժամանակվանից սկսած նրանք հետաքրքիր և աշխույժ ուսումնասիրություններ են անցկացնում։ Կնոջ հարցերին բավարար պատասխաններ տալու համար Կարինան գրականություն է ուղարկում նրան։
• Բեռնարդան առիթից օգտվելով քարոզեց մի մարդու, որը սխալմամբ հավաքել էր իր հեռախոսի համարը։ Վրդովվելու փոխարեն՝ նա ասաց, որ ինքը Եհովայի վկա է և առաջարկեց իր օգնությունը։ Դրան հաջորդեց մի խոսակցություն, որի ընթացքում այդ մարդն ուշադրությամբ լսում էր Բեռնարդայի բացատրությունն այն մասին, թե ինչպես է Աստծո Թագավորությունը շուտով վերջ դնելու անարդարությանը։ Նա Բեռնարդային տվեց իր հեռախոսահամարը, և վերջինս իր վերայցելությունները կատարեց հեռախոսով։ Խոսակցություններից մեկի ընթացքում Բեռնարդան կարդաց «Հավիտենական կյանքի առաջնորդող գիտություն» գրքից մի հատված։ Այդ մարդը ցանկություն հայտնեց ձեռք բերել գրքի օրինակը, և Բեռնարդան ուղարկեց այն Աստվածաշնչի հետ միասին։ Այնուհետև հոգ տարվեց, որպեսզի նրան այցելի նույն տարածքում ապրող եղբայրներից մեկը։ Այդ «ծաղկող բույսը» շարունակում է ջրվել մինչև հիմա։
Այո՛, այս աշխարհի հոգևորապես չորացած հողի մեջ դեռ թաքնված սերմեր կան, որոնք սպասում են, թե ճշմարտության կենարար ջրերը ե՛րբ կհասնեն իրենց։ Իսկ հազարավոր ծարավ մարդիկ շարունակում են «ծլել» ու «ծաղկել» որպես Եհովա Աստծո հավատարիմ ծառաներ (Եսայիա 44։3, 4)։