Ի՞նչ հետևանք ունեցավ այրիությունը երկու կանանց համար

Սանդրան այրի է և բնակվում է Ավստրալիայում։ Մի քանի տարի առաջ մահացել էր նրա ամուսինը, և այդ կորուստը մեծ հարված էր հասցրել նրան։ «Այն բանի գիտակցումը, որ անսպասելիորեն կորցրեցի ամուսնուս՝ ամենալավ ընկերոջս, ցնցեց ինձ։ Նույնիսկ չեմ կարողանում հիշել, թե հիվանդանոցից ինչպես վերադարձա տուն և օրվա մնացած մասն ինչով զբաղվեցի։ Հաջորդ մի քանի շաբաթների ընթացքում իմ բոլոր անհանգստությունները վերածվեցին մշտական ֆիզիկական ցավի»։

Սանդրան Իլեյն անունով տարիքով իրենից մեծ մի ընկերուհի ուներ, որն արդեն վեց տարի էր, ինչ այրի էր։ Իլեյնը վեց ամիս շարունակ խնամել էր քաղցկեղով հիվանդ իր ամուսնուն՝ Դեյվիդին։ Ամուսնու մահը նրան այն աստիճան ծանր վիշտ էր պատճառել, որ դրանից շատ չանցած նա ժամանակավորապես կորցրել էր տեսողությունը։ Երկու տարի հետո պատահեց, որ նա դրսում վայր ընկավ։ Նրա բժիշկը հիվանդության ոչ մի նշան չգտավ, սակայն հայտնաբերեց, թե ինչն էր նրա տկարության պատճառը. Իլեյնը վիշտն իր մեջ էր պահում։ Ուստի խորհուրդ տվեց գնալ տուն և փորձել արտասվել։ «Բավականին երկար ժամանակ տևեց, մինչև որ դուրս եկա այդ վիճակից,— խոստովանում է Իլեյնը՝ ավելացնելով.— Այժմ նույնիսկ սովորություն ունեմ, երբ մենակ եմ լինում, փակվել ննջասենյակում և լաց լինել՝ գլուխս ընկղմելով Դեյվիդի հագուստների մեջ»։

Այո՛, սիրելի ամուսնու կորուստը տարբեր ազդեցություններ կարող է թողնել կնոջ վրա, քանի որ այրիությունը, իրականում, իր մեջ ավելին է ընդգրկում, քան պարզապես առանց ամուսնու ապրելը։ Օրինակ՝ Սանդրան որոշ ժամանակ ինքն իրեն կորցրել էր։ Ուրիշ շատ այրիների նման , նա էլ իրեն խոցելի ու անապահով էր զգում։ Նա մտաբերում է. «Սովոր էի, որ միշտ ամուսինս վերջնական որոշումներ կայացներ։ Եվ հանկարծ մենակ մնացի... Աչքերիցս քունը փախավ։ Հոգնեցի, ասես՝ ուժերս սպառվեցին։ Չգիտեի ինչ անեի»։

Սանդրայի և Իլեյնի հետ պատահածը միակ դեպքը չէ. ամեն օր ամբողջ աշխարհում ուրիշ շատ–​շատերն էլ են բախվում նման իրավիճակի հետ։ Հիվանդությունների, դժբախտ պատահարների, պատերազմների, էթնիկական մաքրումների և, ընդհանուր առմամբ, տիրող բռնության պատճառով գնալով ավելանում է այրիների թիվը։a Այս կանանցից շատերը լուռ կրում են իրենց վիշտը՝ չիմանալով ինչ անել։ Ի՞նչ կարող են անել ընկերներն ու բարեկամները՝ օգնելու համար այրիացած շատերին համակերպվել այդ վիճակի հետ։ Հաջորդ հոդվածում որոշ խորհուրդներ կգտնեք, որոնք կարող են օգտակար լինել։

[ծանոթագրություններ]