«Մօտեցէք Աստուծուն, եւ նա կ’մօտենայ ձեզ»
Նախկինում և հիմա. նա ուժ գտավ վերափոխվելու
ՍԱՆԴՐԱ անունով մի կին, որն ապրում է Մեքսիկայում, իր մասին պատմում է, որ իրենց ընտանիքի խորթ զավակն է եղել։ Դեռահաս տարիքից նրա կյանքը թունավորված է եղել մերժվածության զգացումով՝ զուրկ սիրուց ու ջերմությունից։ Նա ասում է. «Ես դեպի հասուն տարիք գնացի մշտական դատարկության զգացումով ու խիստ կասկածում էի, թե արդյոք իմաստ ունի իմ կյանքը կամ կյանքն առհասարակ»։
Բարձր դասարաններում սովորելու տարիներին Սանդրան սկսեց խմել այն գինուց, որ հայրը գնում էր տան համար։ Որոշ ժամանակ անց նա ինքը արդեն սկսեց գնել ոգելից խմիչքներ ու իրեն տվեց հարբեցողությանը։ Նա խոստովանում է. «Կյանքն ինձ ոչնչով չէր հրապուրում»։ Հուսահատությունից մղված՝ Սանդրան անցավ թմրանյութերին։ «Այն, ինչ օգնում էր ինձ մոռացության տալ պրոբլեմներս,— ասում է Սանդրան,— կրում էի պայուսակումս. շիշը, հաբերը և մի քիչ մարիխուանա»։
Բժշկական ֆակուլտետն ավարտելուց հետո Սանդրան է՛լ ավելի տրվեց ալկոհոլին։ Նա փորձեց վերջ դնել իր կյանքին, սակայն կենդանի մնաց։
Սանդրան հուսահատ օգնություն փնտրեց տարբեր կրոնների մեջ, բայց՝ իզուր։ Հաճախ էր նա լացակումած գոչում. «Որտե՞ղ ես, Աստվա՛ծ, ինչո՞ւ ինձ չես օգնում»։ Անարժեքության զգացումը հասել էր արդեն գագաթնակետին, երբ Եհովայի վկա մի կին զրուցեց նրա հետ։ Նրանք սկսեցին միասին ուսումնասիրել Աստվածաշունչը։ Սանդրան խորապես զգացվեց, երբ իմացավ, որ «Տէրը[Եհովան] մօտիկ է սրտով կոտրուածներին» (Սաղմոս 34։18)։
Վկան օգնեց Սանդրային հասկանալ, որ Եհովա Աստված տեղյակ է մեր թուլություններին, որոնք հետևանք են Ադամից ժառանգած մեղքի ու անկատարության։ Սանդրան իմացավ, որ Աստված հասկանում է, որ մենք ի վիճակի չենք լիարժեք ձևով համապատասխանել արդարության չափանիշներին (Սաղմոս 51։5; Հռովմ 3։23; 5։12, 18)։ Նրան ուրախացրեց նաև այն փաստը, որ Եհովան իր ուշադրությունը չի կենտրոնացնում միայն թերությունների վրա և չի ակնկալում մեր կարողություններից ավելին։ Ժամանակին սաղմոսերգուն այսպիսի հարց ուղղեց Եհովային. «Տէր, եթէ դու անօրէնութիւնները համարես, ո՞վ կ’կենայ, Տէր» (Սաղմոս 130։3)։
Հիսուս Քրիստոսի փրկանքի վերաբերյալ աստվածաշնչյան կարևոր ճշմարտությունը ջերմությամբ լցրեց Սանդրայի սիրտը։ Այդ զոհաբերության միջոցով Եհովան գթասրտորեն շնորհում է հնազանդ մարդկանց արդար համարվելու հնարավորություն՝ չնայած նրանց անկատարությանը (Ա Հովհաննես 2։2; 4։9,10)։ Իրոք որ, մենք կարող ենք ստանալ «մեղքերի թողութիւն», ու դա իր հերթին կօգնի հաղթահարել թերարժեքության զգացումն ու նմանօրինակ այլ բացասական զգացումներ (Եփեսացիս 1։7)։
Սանդրան արժեքավոր դասեր քաղեց Պողոս առաքյալի օրինակից։ Առաքյալը մեծապես գնահատում էր այն ողորմությունը, որը դրսևորելով՝ Աստված ներել էր անցյալում գործած իր մեղքերը և օգնում էր հաղթող դուրս գալ այն պայքարում, որ նա մղում էր երբեմն գլուխ բարձրացնող տկարությունների դեմ (Հռովմայեցիս 7։15–25; Ա Կորնթացիս 15։9, 10)։ Պողոսը ճիշտ ուղղություն էր տալիս իր կյանքին, ‘ճնշում էր իր մարմինն ու նվաճում’, որպեսզի շարունակեր գնալ Աստծո ցույց տված ճանապարհով (Ա Կորնթացիս 9։27)։ Նա թույլ չէր տալիս, որ իր մեղավոր հակումները հաղթեն իրեն։
Սանդրայի թուլությունները նրան հանգիստ չէին տալիս, սակայն նա շարունակում էր պայքարել դրանց դեմ։ Նա թախանձագին օգնություն էր խնդրում Եհովայից, որպեսզի կարողանար հաղթահարել դրանք, փնտրում էր նրա ողորմությունը (Սաղմոս 55։22; Յակոբոս 4։8)։ Այն բանի գիտակցումը, որ Եհովան անհատապես հետաքրքրվում է իրենով, օգնեց Սանդրային վերափոխել իր կյանքը։ «Ներկայումս ես ուրախությամբ ուրիշներին եմ օգնում Աստվածաշունչ ուսումնասիրել՝ ծառայելով լիաժամ»,— ասում է նա։ Սանդրան առանձնաշնորհում է ունեցել օգնելու իր ավագ և կրտսեր քույրերին ճանաչել Եհովային։ Ձգտելով ‘բարի գործել’՝ նա իր բժշկական գիտելիքները սիրով օգտագործում է Եհովայի վկաների համաժողովների ժամանակ (Գաղատացիս 6։10)։
Ի՞նչ եղան Սանդրայի վատ սովորությունները։ Նա վստահությամբ ասում է. «Միտքս միշտ պարզ է։ Այլևս ոչ խմում եմ, ոչ ծխում, ոչ էլ թմրանյութեր ընդունում. դրանց կարիքը չունեմ։ Ես գտել եմ այն, ինչ փնտրում էի»։
[մեջբերում 9–րդ էջի վրա]
«Ես գտել եմ այն, ինչ փնտրում էի»
[շրջանակ 9–րդ էջի վրա]
Աստվածաշնչի սկզբունքները ներգործուն են
Ստորև բերվում են մի քանի աստվածաշնչյան սկզբունքներ, որոնք օգնել են շատերին ազատվել վնասակար սովորություններից.
«Մեր անձերը սրբենք հոգու եւ մարմնի ամեն պղծութիւնիցը, սրբութիւնը կատարենք Աստուծոյ ահովը» (Բ Կորնթացիս 7։1)։ Աստծո օրհնությունները ստանում են նրանք, ովքեր թողնում են իրենց պիղծ սովորությունները ու ձգտում են մաքրության։
«Տիրոջ երկիւղը չարն ատել է [նշանակում]» (Առակաց 8։13)։ Աստծո հանդեպ հարգալից վախ տածելը օգնում է անհատին վերջ դնել ամեն մի վատ սովորության, այդ թվում՝ թմրամոլությանը։ Նման փոփոխություն կատարելով՝ անհատը ոչ միայն Աստծո հավանությանն է արժանանում, այլև իրեն պաշտպանում է սարսափելի հիվանդություններից։
«Իշխանութիւններին եւ պետութիւններին հնազանդեն, հպատակեն» (Տիտոս 3։1)։ Շատ վայրերում որոշակի թմրանյութեր ունենալը կամ օգտագործելը համարվում է օրենքով հետապնդելի։ Ճշմարիտ քրիստոնյաները չեն դիմում անօրինական քայլի՝ ունենալով կամ օգտագործելով նման նյութեր։