Մեր ընթերցողները հարցնում են
Աստծու Թագավորությունը մեր սրտերո՞ւմ է
Այսօր շատերը այս հարցին «այո» են պատասխանում։ Օրինակ՝ «Կաթոլիկական հանրագիտարանում» (անգլ.) նշվում է. «Աստծու թագավորությունը այն է.... որ Աստված իշխում է մեր սրտերում»։ Հոգևորականները սովորաբար այս գաղափարն են ուսուցանում։ Սակայն արդյո՞ք Աստվածաշունչը իրականում սովորեցնում է, որ Աստծու Թագավորությունը մարդկանց սրտերում է։
Ոմանց կարծիքով՝ հենց ինքը Հիսուսն է առաջինը ասել, որ Աստծու Թագավորությունը մարդկանց սրտերում է։ Իրոք, Հիսուսն ասել է. «Ահա Աստծու թագավորությունը ձեր միջև է» (Ղուկաս 17։21)։ Աստվածաշնչի որոշ թարգմանություններում այս համարում գրված է՝ «Աստծու արքայութիւնը ներսում, ձեր մէջ է» (ԷԹ) կամ «ձեր ներսումն է» (ԱԹ)։ Արդյո՞ք Հիսուսի խոսքերը այստեղ ճշգրտորեն են թարգմանված։ Իսկապե՞ս նա նկատի ուներ, որ Աստծու Թագավորությունը մարդկանց սրտերում է։
Նախ՝ քննենք, թե ըստ Աստվածաշնչի՝ ինչ է մարդու սիրտը։ Երբ օգտագործվում է փոխաբերական իմաստով, այն նշանակում է անհատի ներքին անձնավորությունը։ Սրտից են ծագում նրա մտքերը, մղումները, զգացմունքները։ Այն միտքը, որ այնպիսի մի վեհ բան, ինչպիսին Աստծու Թագավորությունն է, գտնվում է մարդու սրտում և բարեփոխում ու վեհանձն է դարձնում նրան, կարող է հրապուրիչ լինել։ Բայց ճի՞շտ է, որ այն գտնվում է մարդու սրտում։
Աստվածաշնչում ասվում է. «Խորամանկ է սիրտն ամենից աւելի եւ ապականուած» (Երեմիա 17։9)։ Հիսուսն ինքն ասաց. «Ներսից՝ մարդու սրտից են դուրս գալիս վնասակար մտքերը՝ պոռնկությունները, գողությունները, սպանությունները, շնությունները, ուրիշի ունեցածը ցանկանալը, չար գործերը» (Մարկոս 7։20–22)։ Տրամաբանենք։ Մի՞թե աշխարհում եղող դժբախտությունների մեծ մասի պատճառը մարդու մեղավոր սիրտը չէ։ Ուրեմն ինչպե՞ս կարող է Աստծու կատարյալ Թագավորությունը այդպիսի սկզբնաղբյուր ունենալ։ Իրո՛ք, Աստծու Թագավորությունը չի կարող առաջ գալ մարդու սրտից, ինչպես որ թուզը չի աճում տատասկից (Մատթեոս 7։16)։
Երկրորդ՝ քննենք, թե ում հետ էր Հիսուսը խոսում, երբ ասաց Ղուկաս 17։21–ում գրված խոսքերը։ Նախորդ համարում կարդում ենք. «Երբ փարիսեցիները նրան հարց տվեցին, թե երբ է գալու Աստծու թագավորությունը, նա պատասխանեց նրանց» (Ղուկաս 17։20)։ Փարիսեցիները Հիսուսի թշնամիներն էին։ Հիսուսը նշեց, որ այդ կեղծավորները չեն մտնելու Աստծու Թագավորություն (Մատթեոս 23։13)։ Եթե փարիսեցիները չէին մտնելու Աստծու Թագավորություն, ապա մի՞թե կարող էր այդ Թագավորությունը նրանց սրտերում լինել։ Դա անհնար էր։ Այդ դեպքում ի՞նչ նկատի ուներ Հիսուսը։
Մի շարք Աստվածաշնչերում, որոնք ուշադիր են թարգմանված, Հիսուսի այս խոսքերը փոխանցված են այսպես՝ «ձեր միջև է»։ «Նոր աշխարհ թարգմանությունում» ևս այդպես է։ Իսկ ինչպե՞ս էր Աստծու Թագավորությունը գտնվում այն ժամանակվա մարդկանց, այդ թվում նաև փարիսեցիների միջև։ Հիսուսը, որ Եհովա Աստծու կողմից նշանակվել էր այդ Թագավորության Թագավոր, բայց դեռ չէր անցել իր պարտականությունների կատարմանը, գտնվում էր հենց այդ մարդկանց միջև։ Նա սովորեցնում էր Աստծու Թագավորության մասին և նույնիսկ հրաշքներ էր գործում՝ դրանով իսկ նախապես ցույց տալով, թե ինչեր է անելու այդ Թագավորությունը։ Բառի բուն իմաստով՝ Թագավորությունը գտնվում էր նրանց միջև։
Հստակ է, որ Գրությունները թիկունք չեն կանգնում այն գաղափարին, թե Աստծու Թագավորությունը մարդկանց սրտերում է։ Աստծու Թագավորությունը իրական կառավարություն է, որը, ինչպեսև մարգարեացվել էր, արմատական փոփոխություններ է կատարելու երկրագնդի վրա (Եսայիա 9։6, 7; Դանիէլ 2։44)։