Մոտեցեք Աստծուն
Մխիթարություն սրտով կոտրվածներին
«ԵՀՈՎԱՆ ինձ էլ երբեք չի սիրի»։ Այսպես արտահայտվեց մի քրիստոնյա կին, որը երկար տարիներ պայքարում էր դեպրեսիայի դեմ։ Նա ինքն իրեն համոզել էր, որ Եհովան շատ հեռու է իրենից։ Սակայն արդյո՞ք Եհովան հեռու է իր այն երկրպագուներից, ովքեր ճնշված են։ Այս հարցի պատասխանը, որն անչափ մխիթարական է, գտնում ենք սաղմոսերգու Դավթի ներշնչյալ խոսքերում՝ արձանագրված Սաղմոս 34։18-ում։
Դավիթը գիտեր, թե ինչպես կարող են ծանր ճնշումներն անդրադառնալ Եհովայի հավատարիմ ծառայի վրա։ Երիտասարդ տարիքում նա ապրեց փախստականի կյանքով, անգթորեն հետապնդվեց Սավուղի կողմից՝ այն չարակամ ու նախանձ թագավորի, որը վճռել էր սպանել իրեն։ Նա պատսպարան գտավ այնտեղ, որտեղ, իր կարծիքով, Սավուղը երբեք չէր փնտրի իրեն։ Դա թշնամու՝ փղշտացիների Գեթ քաղաքն էր։ Բայց երբ նրան ճանաչեցին, իրեն խելագար ձևացրեց, և այդպիսով մի կերպ փրկվեց։ Իր փրկության համար Դավիթը փառք տվեց Աստծուն և այս դեպքի հետ կապված գրեց 34-րդ սաղմոսը։
Արդյո՞ք Դավիթը մտածում էր, որ Աստված հեռու է բոլոր նրանցից, ովքեր ճնշման ներքո վհատվում են կամ կարծում են, թե անարժեք են Աստծու աչքում։ Նա գրում է. «Եհովան մոտ է սրտով կոտրվածներին, և ոգով փշրվածներին փրկում է նա» (համար 18)։ Եկ տեսնենք, թե ինչպես կարող են այս խոսքերը մխիթարել և հույսով լցնել քեզ։
«Եհովան մոտ է»։ Ինչպես նշված է մի աշխատության մեջ, այս բառակապակցությունը «արտահայտում է այն միտքը, որ Տերը ուշադիր է և զգոն, միշտ պատրաստ է օգնելու և փրկելու իր ժողովրդին»։ Մխիթարական է իմանալ, որ Եհովա Աստված պաշտպանում է իր ծառաներին։ Նա տեսնում է, թե ինչ խնդիրներ են դիմագրավում նրանք այս «չափազանց դժվար ժամանակներում», և հասկանում է նրանց խորունկ զգացմունքները (2 Տիմոթեոս 3։1; Գործեր 17։27)։
«Սրտով կոտրվածներին»։ Որոշ մշակույթներում «կոտրված սիրտ» արտահայտությունը կապում են անպատասխան սիրո հետ։ Սակայն ինչպես ասում է մի գիտնական, սաղմոսերգուի խոսքերը վերաբերում են «վշտին ու ցավին ընդհանրապես»։ Ինչ խոսք, նույնիսկ Աստծու հավատարիմ ծառաները կարող են երբեմն կրել անտանելի թվացող դժվարություններ, որոնք կոտրում են նրանց սիրտը։
«Ոգով փշրվածներին»։ Գուցե վհատված անհատն այնքան ընկնի իր աչքից, որ մի ակնթարթում կորցնի բոլոր հույսերը։ Աստվածաշնչի թարգմանիչների համար նախատեսված մի ուղեցույցում ասվում է, որ այս արտահայտությունը կարող է թարգմանվել հետևյալ կերպ՝ «[մարդիկ], ովքեր ոչ մի լավ բանի հույս չունեն»։
Ինչպե՞ս է Եհովան վերաբերվում «սրտով կոտրվածներին» և «ոգով փշրվածներին»։ Մի՞թե նա իրեն հեռու է պահում այդ մարդկանցից՝ մտածելով, որ նրանք արժանի չեն իր սիրուն և ուշադրությանը։ Իհա՛րկե ոչ։ Ինչպես սիրառատ ծնողն է ամուր գրկում ու սփոփում իր ճնշված երեխային, այնպես էլ Եհովան է իր «գիրկն» առնում այն ծառաներին, ովքեր աղաղակում են օգնության համար։ Նա փափագում է մխիթարել ու ամոքել նրանց կոտրված սիրտն ու փշրված ոգին։ Եհովան կարող է իմաստություն և անհրաժեշտ զորություն տալ, որպեսզի նրանք պայքարեն ցանկացած փորձության դեմ, որոնց բախվում են (2 Կորնթացիներ 4։7; Հակոբոս 1։5)։
Ուրեմն փորձիր մտերմանալ Եհովայի հետ։ Ինչո՞ւ։ Քանի որ մեր կարեկից Աստված խոստանում է. «Ես.... բնակվում եմ.... փշրվածների ու ոգով խոնարհների հետ, որպեսզի կենդանացնեմ խոնարհների ոգին ու կոտրվածների սիրտը» (Եսայիա 57։15)։
Աստվածաշնչի ընթերցանության ծրագիր հունիս ամսվա համար