Սովորեցնենք մարդկանց, որպեսզի իրենց համար օգուտներ քաղեն

¹ Եհովան ցանկանում է, որ բոլոր մարդիկ իրենց համար օգուտներ քաղեն (Ես. 48։17)։ Նա գիտի, թե ինչն է իսկական երջանկություն բերում և անշուշտ ցանկանում է, որ մարդիկ հեռու մնան փորձանքներից ու վայելեն կյանքը՝ իր հրահանգներին ականջ դնելով։ Մենք մեծապես օգտվում ենք՝ Աստծո ուղիների հետ ներդաշնակ ապրելով (Սաղ. 34։8)։ Իսկ ինչպե՞ս կարող ենք սովորեցնել մարդկանց, որ նույնը անեն։

² Ինչի՞ն են ձգտում մարդիկ։ Ի՞նչն է մտահոգում քո շրջապատում ապրող մարդկանց։ Իրենց տան անվտանգությո՞ւնը, կայուն ամուսնություն ունենա՞լը, միգուցե իրենց զավակների ապագա՞ն ու նման մի շարք հարցեր։ Խնդիրների առաջ կանգնելիս՝ նրանք որտե՞ղ են օգնություն փնտրում։ Հնարավոր է, որ նրանք իրենց ապավինեն կամ այդ հարցերը քննարկող ձեռնարկների դիմեն կամ էլ ուրիշների առաջնորդությունը փնտրեն։ Ժամանակի ընթացքում շատերը մոլորության մեջ են ընկնում, երբ հայտնաբերում են, որ օգնություն ստանալու համար իրենց գործադրած կերպերն անկայուն ու ոչ գործնական են։ Մենք պետք է հավաստիացնենք այդ մարդկանց, որ Աստծո Խոսքում առաջարկվող առաջնորդությունը շատ ավելի լավն է (Սաղ. 119։98)։ Դա կարելի է անել՝ ցույց տալով նրանց, թե ինչպես կարող են բարելավել իրենց կյանքը նույնիսկ հիմա, եթե Աստվածաշունչն ուսումնասիրելու և նրա պահանջները կատարելու ջանքեր գործադրեն (Բ Տիմոթ. 3։16, 17)։

³ Բարելավիր ընտանեկան կյանքդ։ Քչերն են հասկանում, որ Եփեսացիս 5։22—6։4 խոսքերում արձանագրված ներշնչյալ խորհուրդն իրականում օգնում է լուծել ընտանեկան խնդիրները։ Մի ամուսնական զույգ տասը տարի միասին ապրելուց հետո որոշում է ամուսնալուծվել։ Պատահում է այնպես, որ կինը սկսում է Աստվածաշունչն ուսումնասիրել և ծանոթանալ ամուսնական կյանքին վերաբերող սուրբգրային սկզբունքներին։ Քանի որ կինը սկսում է կիրառել այդ սկզբունքները, ամուսինը շուտով փոփոխություններ է նկատում նրա մոտ, և որոշում է միանալ նրան Աստվածաշնչի ուսումնասիրության մեջ։ Ավելի ուշ ամուսինը պատմում է. «Այժմ մենք երջանիկ ընտանեկան կյանքի հիմքն ենք գտել»։

⁴ Կյանքի իրական իմաստը։ Երբ մի երիտասարդ թմրամոլ օգնության համար դիմեց Վկաներին, նրան բացատրեցին, որ Եհովան իր հանդեպ անհատական հոգատարություն է ցուցաբերում։ «Ես իմացա,— պատմում է նա,— որ Արարիչը մարդկանց համար նպատակ ունի և իր բարեհաճությունը վայելող անհատներին հավիտենական կյանք է խոստանում։ Չեք պատկերացնի, թե որքան երջանիկ եմ, որ գիտեմ այս ամենը։ Հիմա ես առողջ եմ, ներքուստ հանգիստ եմ և Աստծո հետ սերտ փոխհարաբերության մեջ եմ»։

⁵ Չկա մեկը, որ հնարավորություն չունենա օգտվելու Աստծո Խոսքի հայթայթած գործնական օգնությունից։ Աստծո Խոսքը մեզ համար որպես առաջնորդություն գործածելով՝ մենք համոզվել ենք, որ Աստծո ուղին այս աշխարհի առաջարկած ուղիներից լավագույնն է (Սաղ. 116։12)։ Մեզ համար առանձնաշնորհում է այդ մասին մարդկանց հաղորդելը և, ի օգուտ իրենց, նրանց սովորեցնելը։ Այդպես վարվելով՝ մենք հիանալի արդյունքներ կքաղենք։