Զգուշացե՛ք վտանգներից Ինտերնետ ցանցից օգտվելիս

¹ Եհովայի վկաներին ուրախություն է պատճառում միմյանց հետ շփվելը։ Նրանց հաճելի է ծառայության ժամանակ պատահած դեպքերի մասին միմյանց պատմել, նաև Եհովայի ժողովրդի հետ կապված իրադարձությունների և ողջ աշխարհի մասշտաբով Թագավորության գործընթացի մասին լսել։ Նրանք հետաքրքրվում են, թե ինչ վիճակում են գտնվում արտակարգ իրավիճակներից, ինչպես օրինակ, ճգնաժամերից կամ բնական աղետներից տուժած իրենց հավատակիցները, որպեսզի ըստ հնարավորին կարողանան օգնություն ցույց տալ նրանց։ Նման ուշադրությունը մատնացույց է անում համաշխարհային եղբայրության միասնությանը և ապացուցում է, որ մենք իսկապե՛ս սիրում ենք միմյանց (Յովհ. 13։34, 35)։

² Այսօր կայծակնային արագությամբ մեզ են հասնում աշխարհում տեղի ունեցող իրադարձությունների մասին տեղեկությունները։ Ռադիոյի և հեռուստատեսության ուղիղ եթերի շնորհիվ աշխարհի բոլոր անկյուններում բնակվող մարդիկ կարողանում են մանրամասն տեղեկություններ ստանալ զանազան իրադարձությունների մասին։ Իր հերթին, հեռախոսային կապի միջոցով հնարավոր է դարձել երկրագնդի հեռավոր մասերում ապրող մարդկանց հետ անմիջական կապ հաստատելը։ Կապի միջոցների բնագավառում վերջին տարիներին աշխարհով մեկ մեծ տարածում է գտել Ինտերնետը («Արթնացե՛ք», 1997 թ. հուլիսի 22, ռուս.)։

³ Հեռախոսի հայտնագործումը հնարավորություն տվեց աշխարհի տարբեր մասերում ապրող մարդկանց ակնթարթորեն կապ հաստատել միմյանց հետ։ Թեև հեռախոսը հաղորդակցության բավականին օգտակար միջոց է, այնուամենայնիվ, հարկավոր է զգույշ լինել, քանի որ այն կարող է անցանկալի կապի կամ գործունեության միջոց դառնալ, ինչպես նաև հեռախոսային երկար խոսակցությունները կարող են վնասել ընտանեկան բյուջեն։ Հեռուստատեսությունը և ռադիոն կրթության բնագավառի առաջընթացին նպաստելու մեծ կարողություններ ունեն։ Ցավոք, հաղորդումներից շատերը բարոյազուրկ բնույթ են կրում, և դրանք դիտելը ժամանակի անտեղի վատնում է։ Ուստի, խելամիտ կլինի ընտրողաբար օգտվել հեռուստատեսությունից և ռադիոյից։

⁴ Ինտերնետի միջոցով անհատը մատչելի գներով կապ է հաստատում աշխարհի տարբեր մասերում ապրող միլիոնավոր մարդկանց հետ և հսկայական քանակությամբ ինֆորմացիայի դուռ բաց անում («Արթնացե՛ք», 1998 թ. հունվարի 8, ռուս.)։ Այնուամենայնիվ, առանց ընտրություն կատարելու Ինտերնետից ցանկացած ինֆորմացիա ընդունելով՝ անհատը կարող է հոգևոր և բարոյական մեծ հարվածների ենթարկվել։ Իսկ ինչպե՞ս։

⁵ Շատերին անհանգստացնում է այն, որ ցանցի միջոցով հեշտությամբ կարելի է տեղեկություն ստանալ զենքեր, այդ թվում նաև ռումբեր արտադրելու մասին։ Արտադրության տարբեր ճյուղերի ղեկավար անձնակազմին մտահոգում է այն հանգամանքը, որ աշխատավորները աշխատանքի ժամերին զգալի ժամանակ են վատնում Ինտերնետից օգտվելու վրա։ Մեր գրականության մեջ շատ հաճախ է զգուշացվել Ինտերնետից սպասվող հոգևոր առումով բացահայտ վտանգների մասին։ Բազում Web–հանգույցներ ներկայացնում են բռնության և պոռնկագրության վերաբերյալ նյութեր, որոնք ամենևին վայել չեն քրիստոնյաներին (Սաղ. 119։37)։ Այս վտանգներից բացի, գոյություն ունի մեկ այլ ծածուկ վտանգ ևս, որը ստիպում է Եհովայի վկաներին առավել զգոնություն ցուցաբերել։ Ո՞րն է այդ վտանգը։

⁶ Մի պահ մտածեք. կհրավիրեի՞ք ձեր տուն ձեզ անծանոթ մեկին՝ առանց նախօրոք իմանալու, թե ով է նա։ Իսկ ինչպե՞ս վարվել, երբ հնարավոր չէ պարզել նրա ով լինելը։ Թույլ կտայի՞ք, որ ձեր երեխաները այդ անհատի հետ մենակ մնային։ Սակայն, միանգամայն հնարավոր է, որ նման բան պատահի Ինտերնետից օգտվելիս։

⁷ Էլեկտրոնային փոստով հնարավոր է տեղեկություն ուղարկել քեզ անծանոթ անհատներին, նաև նրանցից տեղեկություն ստանալ։ Պարագան նույնն է, երբ համակարգչի միջոցով հաղորդակցվում ես ֆորումում կամ «զրուցասենյակում» (chat room)։ «Համակարգչային» խոսակցությանը կարող են մասնակցել անհատներ, որոնք թերևս պնդեն, թե Եհովայի վկաներ են, բայց իրականում Վկաներ չլինեն։ Կամ կարող են ստել և ներկայանալ որպես դեռահաս. կամ էլ նույնիսկ կեղծել իրենց սեռը։

⁸ Հնարավոր է, որ մեր հավատալիքների վերաբերյալ որոշ դեպքերի նկարագրություն կամ ուղղակի մեկնաբանություններ ստանաք։ Այդ տեղեկությունը ուղարկվում է ուրիշներին, իրենց հերթին նրանք էլ ուղարկում են տարբեր ուղղություններով։ Սովորաբար այդպիսի տեղեկության ճշգրտությունը հնարավոր չէ ստուգել, և, պետք է նշել, որ երբեմն այն չի համապատասխանում իրականությանը։ Այդպիսի մեկնաբանությունները կարող են հավատուրացություն տարածելու գաղտնի աղբյուր հանդիսանալ (Ա Թեսաղ. 2։1—3)։

⁹ Ինտերնետից օգտվելիս այդ վտանգը մտապահելով՝ ինքդ քեզ հարցրու. «Ո՞րն է ցանցից օգտվելու նպատակս։ Հնարավո՞ր է, որ դրանից ոչ ճիշտ ձևով օգտվելուց վնասվի հոգևոր վիճակս։ Կամ գուցե բացասաբա՞ր անդրադառնա ուրիշների հոգևոր վիճակի վրա»։

¹⁰ «Եհովայի վկաների» Web–հանգույցները։ Որպես օրինակ՝ եկեք քննարկենք Ինտերնետի հանգույցներից մի քանիսը, որոնք ստեղծվել են իրենց Եհովայի վկա ներկայացնող անհատների կողմից։ Այդ անձնավորությունները հորդորում են քեզ կարդալ իրենց հանգույցների ֆայլերում ծառայության հետ կապված դեպքերի մասին պատմվող ինֆորմացիան, որը տեղադրվել է այնտեղ իրենց նույնպես Եհովայի վկա կոչող անհատների կողմից։ Խրախուսում են, որ հայտնես Ընկերության գրականության մասին քո կարծիքն ու տեսակետը։ Ոմանք խորհուրդներ են տալիս, թե ինչ մատուցումներ կարելի է օգտագործել ծառայության մեջ։ Այդ հանգույցներում բոլորին առաջարկվում է միանալ «զրուցասենյակին», նաև հաղորդակցվել ուրիշների հետ այնպես, ինչպես որ կզրուցեին հեռախոսով։ Դրանք հաճախ ուղղում են քեզ դեպի ուրիշ հանգույցները, որտեղ կարող ես ուղիղ կերպով հաղորդակցվել ամբողջ աշխարհի Եհովայի վկաների հետ։ Սակայն համոզվա՞ծ ես, որ նման հաղորդակցությունը հավատուրացների կողմից չի կազմակերպված։

¹¹ Ինտերնետի միջոցով հաղորդակցությունը անհամատեղելի է Եփեսացիս 5։15—17–ում Պողոս առաքյալի տված խորհրդի հետ. «Տեսէք, թէ ինչպիսի զգուշութեամբ պէտք է ընթանաք. ոչ թէ ինչպէս անմիտներ, այլ՝ ինչպէս իմաստուններ. ժամանակն օգտագործեցէ՛ք, քանզի օրերը չար են. դրա համար անմիտ մի՛ եղէք, այլ իմացէ՛ք, թէ ի՛նչ է Տիրոջ կամքը»։

¹² «Հաւատարիմ եւ իմաստուն ծառայից» հոգևոր սնունդ ստանալու աստվածապետական «կառույցը» քրիստոնեական ժողովն է (Մատթ. 24։45—47)։ Եհովայի կազմակերպության մեջ գտնվելը մեզ օգնում է հեռու մնալ այս աշխարհից, անհրաժեշտ առաջնորդություն և պաշտպանություն է հայթայթում, ինչպես նաև քաջալերում է Տիրոջ գործով զբաղված լինել (Ա Կորնթ. 15։58)։ Սաղմոսերգուն Աստծո ժողովրդի մեջ իրեն ուրախ և ապահով էր զգում (Սաղ. 27։4, 5; 55։14; 122։1)։ Ժողովը իր անդամներին նաև հոգևորապես է պաշտպանում և աջակցում։ Այնտեղ դու կարող ես սիրալիր, հոգատար և ուշադիր ընկերներ գտնել՝ քեզ ծանոթ մարդիկ, որոնք միշտ պատրաստ են օգնելու և մխիթարելու քեզ դժվարին պահերին (Բ Կորնթ. 7։5—7)։ Ժողովի անդամները պաշտպանված են այն անհատներից, որոնց, համաձայն Աստվածաշնչի սկզբունքի, զրկում են ընկերակցությունից՝ առանց զղջալու շարունակ մեղանչելու կամ հավատուրացության գաղափարներ առաջ քաշելու պատճառով (Ա Կորնթ. 5։9—13; Տիտոս 3։10, 11)։ Կարո՞ղ ենք նույնպիսի սիրալիր հոգատարություն և պաշտպանություն ակնկալել Ինտերնետի միջոցով ուրիշների հետ շփվելիս։

¹³ Անխոս, չե՛նք կարող։ Մի շարք Web–հանգույցներ բացահայտորեն ծառայում են որպես հավատուրացության պրոպագանդայի միջոցներ։ Հնարավոր է, որ դրանք կեղծ տեղեկություններ պարունակեն, և նրանք, ովքեր ստեղծել են այդ հանգույցները, գուցե մանրամասն բացատրություններ տան՝ հավաստիացնելու համար, որ իրենք իսկապես Եհովայի վկաներ են։ Նրանք նույնիսկ կարող են ձեզ հարցուփորձ անել, որպեսզի ճշտեն, թե արդյո՞ք դուք Եհովայի վկա եք։

¹⁴ Եհովան ցանկանում է, որ խորաթափանց լինենք։ Ինչո՞ւ։ Որովհետև նա գիտի, որ խորաթափանցությունը կպաշտպանի մեզ շատ վտանգներից։ Առակաց 2։10—19 խոսքերի սկզբում ասվում է. «Իմաստութիւնը կ’մտնէ քո սիրտը, եւ գիտութիւնը ախորժելի կ’լինի քո հոգիին. խոհեմութիւնը քեզ կ’պահէ, հանճարը [«խորաթափանցությունը», ՆԱ] քեզ կ’պաշտպանէ»։ Իսկ ինչի՞ց կպաշտպանի. օրինակ՝ «չար ճանապարհից», ճշմարիտ ուղիները լքողներից և անբարո կյանք վարող, խոտորված մարդկանցից։

¹⁵ Թագավորության սրահում մենք շփվում ենք իսկապես մեր եղբայրները եղող անհատների հետ։ Մենք անձամբ ճանաչում ենք նրանց։ Ոչ մեկը մյուսին չի պարտադրում ապացուցել իր ով լինելը, քանի որ դա երևում է ցուցաբերվող եղբայրասիրությունից։ Մեզանից մեր Եհովայի վկա լինելը հաստատող ոչ մի վկայական չի պահանջվում։ Հենց այստե՛ղ է, որ ստանում ենք այն փոխադարձ քաջալերությունը, որի մասին Եբրայեցիս 10։24, 25–ում գրեց Պողոսը։ Թեև Web–հանգույցները հորդորում են հաղորդակցվել ուրիշների հետ, սակայն այդ հաղորդակցությունը չի կարող մեզ տալ այն քաջալերանքը, ինչը ստանում ենք ժողովներում։ Սաղմոս 26։4, 5 խոսքերը մեզ զգուշացնում են հեռու մնալ վտանգներից, որոնց անարգել կարող ենք հանդիպել Ինտերնետի Web–հանգույցներում։

¹⁶ Անհնար է հսկել, թե ինչ տեսակի ինֆորմացիա է մտնում Ինտերնետ և հասնում օգտվողներին։ Ինտերնետի միջոցով շփվելիս հաճախ ոճիրի և շահագործման հարմար թիրախ են դառնում երեխաներն ու դեռահասները։ Նրանք, լինելով դյուրահավատ ու հետաքրքրասեր, հաճույքով են հետազոտում կիբեռնետիկայի այս նոր բնագավառը՝ կիբեռտարածությունը։ Ուստի ծնողները պետք է աշխատեն հսկել իրենց զավակներին և այս բնագավառի հետ կապված նրանց տալ Աստվածաշնչով հիմնավորված խելամիտ առաջնորդություն, ինչպես որ կվարվեին երաժշտության և ֆիլմերի ընտրության հարցում (Ա Կորնթ. 15։33)։

¹⁷ Ցավոք, մեր եղբայրներից և քույրերից ոմանք զրկվել են ընկերակցությունից միայն այն պատճառով, որ Ինտերնետի միջոցով միանալով «զրուցասենյակին», սկսել են շփվել աշխարհիկ մարդկանց հետ, իսկ դա նրանց անբարոյության է առաջնորդել։ Որոշ երեցների խիստ ցնցել են այդ դեպքերը. նրանք գրում են, որ ոմանք լքում են իրենց կողակիցներին, որպեսզի շարունակեն կապը այն անհատների հետ, որոնց հետ ծանոթացել են Ինտերնետի միջոցով (Բ Տիմոթ. 3։6)։ Ուրիշներն էլ հրաժարվում են ճշմարտությունից՝ հավատուրացների տված սխալ տեղեկություններին հավատալու պատճառով (Ա Տիմոթ. 4։1, 2)։ Այս լուրջ վտանգները հաշվի առնելով՝ չե՞ս կարծում, որ անհրաժեշտ է զգուշություն ցուցաբերել և չմասնակցել «զրուցասենյակում» անցկացվող խոսակցություններին։ Ինչպես արձանագրված է Առակաց 2։10—19 խոսքերում, իմաստություն, խոհեմություն և խորաթափանցություն դրսևորելը, անկասկած, կպաշտպանի մեզ։

¹⁸ Նկատվել է, որ մի շարք անհատներ Web–հանգույցներ են ստեղծել՝ իբրև թե բարի լուրը քարոզելու նպատակով։ Այդ հանգույցներից շատերը հովանավորվում են անխոհեմ եղբայրների կողմից։ Մյուսները կարող են հավատուրացների կողմից կազմված լինել՝ դյուրահավատ անհատներին գայթակղեցնելու համար (Բ Յովհ. 9—11)։ Այն մասին, թե կա՞ արդյոք անհարժեշտություն, որ մեր եղբայրներն այդպիսի Web–հանգույցներ ստեղծեն, «Մեր թագավորական ծառայությունը» թերթիկի 1997 թ. նոյեմբերի համարի 3–րդ էջում կարդում ենք. «Կարիքը չկայ որ ոեւէ անհատ Ինթըրնէթ–ի վրայ դրուելիք նիւթեր պատրաստէ՝ Եհովայի Վկաներու, մեր գործունէութեանց կամ հաւատալիքներուն մասին։ Մեր պաշտօնական վայրը ճշգրիտ տեղեկութիւն կը ներկայացնէ ոեւէ անհատի որ կը փափաքի զայն ունենալ [www.watchtower.org]»։

¹⁹ Ուսումնասիրության պիտույքներ Ինտերնետի միջոցո՞վ։ Ոմանք ցանկանում են օգնել եղբայրներին՝ աստվածապետական տարբեր գործունեությունների վերաբերյալ իրենց կատարած հետազոտությունների արդյունքները Ինտերնետ անցկացնելով։ Օրինակ՝ ենթադրենք մեկն իր հանրային ելույթի հետ կապված հետազոտություն է կատարում և ապա անցկացնում Ինտերնետ՝ կարծելով, թե նման տեղեկությունը կարող է օգտակար լինել նույն թեմայով ելույթ ունեցողների համար։ Ոմանք Ինտերնետ են անցկացնում «Դիտարան»–ի հաջորդ ուսումնասիրության համար Աստվածաշնչի բոլոր համարները կամ Աստվածապետական ծառայության դպրոցի և ժողովի Գրքի ուսումնասիրության համար պատրաստված նյութերը։ Ոմանք էլ նույնիսկ խորհուրդներ են տալիս, թե ինչ մատուցումներ կարելի է օգտագործել ծառայության մեջ։ Իրականում արդյոք պե՞տք է այս ամենը։

²⁰ Եհովայի կազմակերպության հայթայթած գրականությունը զարկ է տալիս մեր տրամաբանությանը և սովորեցնում մեզ՝ «լաւը եւ վատը որոշելու» (Եբր. 5։14)։ Իսկ կարելի՞ է հասնել դրան, երբ ուրիշներն են մեր փոխարեն հետազոտություն կատարում։

²¹ Բերիայում բնակվող քրիստոնյաների մասին Աստվածաշնչում ասվում է, որ նրանք «աւելի ազնիւ մարդիկ էին, քան թէ Թեսաղոնիկէում եղածները»։ Ինչո՞ւ. որովհետև «ամենայն յօժարութեամբ ընդունեցին խօսքը. ամբողջ ժամանակ քննում էին գրուածքները՝ իմանալու, թէ այդ բաները այդպէ՞ս են» (Գործք 17։11)։ Չնայած Պողոսն ու Շիղան էին նրանց քարոզում, այնուամենայնիվ, նրանք չէին ընդունի ճշմարտությունը, մինչև անձամբ չհամոզվեին դրանում։

²² Ելույթի կամ հանդիպման համար ուրիշների կատարած փնտրտուքներից օգտվելն իսկապես անիմաստ է դարձնում անձնական ուսումնասիրությունը։ Մի՞թե չես ցանկանում ինքդ անձամբ հավատ զարգացնել դեպի Աստծո Խոսքը։ Քո սեփական համոզվածությունը կարող է հիմք ծառայել, որպեսզի քո տածած հավատը խոստովանես ելույթներում, հանդիպումներին մեկնաբանություններ տալիս կամ դաշտի ծառայության ժամանակ (Հռովմ. 10։10)։ Իսկ ուրիշների կատարած հետազոտությունից օգտվելը հակասում է Առակաց 2։4, 5–ում ամփոփված խորհրդին՝ անձամբ ‘որոնենք և պտրտենք Աստծո գիտությունը գանձերի նման’։

²³ Օրինակ՝ քո անձնական Աստվածաշնչում որևէ համար կարդալուց հետո կարող ես հակիրճ քննել յուրաքանչյուր համարի համատեքստը, ապա ‘ստուգությամբ հետամուտ լինել ամեն բանի’, ինչպես ժամանակին Ղուկասն էր վարվել իր Ավետարանը գրելիս (Ղուկ. 1։3)։ Այդ լրացուցիչ ջանքերի շնորհիվ կհմտանաս Գրությունների համարները փնտրելու և դրանք ծառայության ժամանակ կամ ելույթում ներկայացնելու մեջ։ Շատ անհատներ տպավորված են այն բանից, որ Եհովայի վկաները հմտորեն են գործածում Աստվածաշունչը։ Իսկ դա պատահում է միայն այն ժամանակ, երբ սովորություն ենք դարձնում անձնական Աստվածաշնչերում սուրբգրային համարները փնտրելը։

²⁴ Ժամանակն իմաստությամբ օգտագործենք։ Քննարկվելիք հաջորդ թեման վերաբերվում է նրան, թե որքան ժամանակ ենք հատկացնում Ինտերնետ տեղեկություններ անցկացնելուն, կարդալուն և պատասխանելուն։ Սաղմոս 90։12–ում խորհուրդ է տրվում մեզ աղոթքներում հետևյալը խնդրել. «Սովորեցրու մեզ, որ այնպէս համարենք մեր օրերը, որ իմաստուն սիրտ ընդունենք»։ Պողոսը գրեց. «ժամանակը կարճ է» (Ա Կորնթ. 7։29)։ Նա նաև զգուշացրեց. «Քանի դեռ ժամանակ կայ, բարին գործենք բոլորի հանդէպ, մանաւանդ հաւատի մէջ մեր հարազատների հանդէպ» (Գաղ. 6։10)։

²⁵ Այսպիսի խորհուրդը մատնացույց է անում ժամանակը խելամտորեն օգտագործելու անհրաժեշտությանը։ Իսկ որքա՜ն ավելի օգտավետ կլինի ժամանակ հատկացնել Աստծո Խոսքը կարդալուն (Սաղ. 1։1, 2)։ Չկա մեզ համար ավելի լավ հաղորդակցություն (Բ Տիմոթ. 3։16, 17)։ Ծնողնե՛ր, ձեր երեխաներին սովորեցնո՞ւմ եք, որ իմաստությամբ օգտագործեն իրենց ժամանակը՝ այն Թագավորության գործին տրամադրելով (Ժող. 12։1)։ Աստվածաշնչի անձնական և ընտանեկան ուսումնասիրություններին, ժողովի հանդիպումներին և ծառայությանը ժամանակ տրամադրելն անհամեմատ ավելի մեծ օգուտներ է բերում, քան Ինտերնետից ակնկալվող օգնությունը։

²⁶ Այդ առնչությամբ իմաստուն կլինի, եթե մեր ուշադրությունը կենտրոնացնենք հոգևոր բաների վրա, ինչպես նաև նրա, ինչը էական է և վերաբերվում է զուտ քրիստոնեական կյանքին։ Դա պահանջում է մեզանից մտածված ընտրություն կատարել և որոշել, թե ո՞ր ինֆորմացիան է մեր ժամանակին և ուշադրությանն արժանի։ Քրիստոսը նշեց, թե ինչն է ամենակարևորը քրիստոնյայի կյանքում. «Նախ խնդրեցէ՛ք Աստծու արքայութիւնը եւ նրա արդարութիւնը, եւ այդ բոլորը Աստուած ձեզ աւելիով կը տայ» (Մատթ. 6։33)։ Երջանիկ չե՞ս զգում քեզ, երբ ավելի շատ զբաղված ես լինում Թագավորության գործով, քան ուրիշ գործունեություններով։

²⁷ Ինտերնետի էլեկտրոնային փոստը։ Բնական է, որ հեռու ապրող ընտանիքի անդամների կամ ընկերների հետ կյանքի դեպքերի մասին պատմելու կամ էլ մտքերը կիսելու ցանկություն ունենք։ Բայց որքանո՞վ ճիշտ կլիներ այդ տեղեկությունները փոխանցել նրանց, որոնք չեն ճանաչում ո՛չ ձեր ընտանիքին, ո՛չ էլ ձեր ընկերներին։ Արժե՞ արդյոք այդ տեղեկություններն անցկացնել Ինտերնետի էջերից որևէ մեկը և կարդալու համար մատչելի դարձնել օտար մարդկանց. կամ դրանք պատճենահանել և ուղարկել ուրիշներին՝ անկախ այն բանից, ճանաչում ես նրանց, թե՝ ոչ։ Նաև, երբ հաղորդագրություններ ստանաս, որոնք ակներևաբար քեզ չեն ուղղված, ճի՞շտ կլինի, արդյոք, դրանք ուրիշներին ուղարկելը։

²⁸ Իսկ ի՞նչ կասես, եթե փոխանցած տեղեկությունդ ճշգրիտ չլինի։ Դա չի՞ նշանակի, որ ակամա դու էլ դառնում ես սուտ տեղեկություններ տարածող (Առակ. 12։19; 21։28; 30։8; Կող. 3։9)։ Անշուշտ, հիշելով այն մասին, որ ‘պետք է զգուշությամբ ընթանալ, ոչ թե ինչպես անմիտներ, այլ ինչպես իմաստուններ’, մենք այդ հարցում անհրաժեշտ զգոնություն կցուցաբերենք (Եփես. 5։15)։ Որքան ուրախ ենք, որ մեր «Տարեգիրք», «Դիտարան» և «Արթնացե՛ք» հրատարակությունները լեցուն են ճշգրիտ դեպքերով. դեպքեր, որոնցով քաջալերվում ենք մենք և մղվում շարունակ ընթանալու Եհովայի «ճանապարհով» (Ես. 30։20, 21)։

²⁹ Մեկ ուրիշ վտանգ ևս գոյություն ունի, որի մասին նկարագրում է Պողոս առաքյալը. «Անգործութեան են վարժւում՝ շրջելով տնից տուն. եւ ոչ միայն դատարկապորտներ են, այլեւ շատախօս եւ աւելորդ հետաքրքրասէր. եւ խօսում են բաներ, որ պէտք չէ խօսել» (Ա Տիմոթ. 5։13)։ Այս խոսքերը ցույց են տալիս, որ չարժե մեր եղբայրներին անհիմն տեղեկություններ հաղորդելու վրա ժամանակ և ուժ վատնել։

³⁰ Մի պահ մտածիր նաև, թե ինչքա՜ն ժամանակ է խլում մեծաքանակ էլեկտրոնային փոստերն աչքի անցկացնելը և դրանց պատասխանելը։ Նկատիր, թե մի գրքում առատորեն հորդացող ինֆորմացիայի մասին ինչ է ասվում. «Քանի որ անհատը գնալով ավելի շատ ժամանակ է ծախսում էլեկտրոնային փոստի վրա, այն դադարում է հետաքրքիր նորույթ լինել ու արագորեն դառնում է ժամանակ խլող բեռ՝ գործակիցների, ընկերների, բարեկամների օրական ուղարկած կարդալիք և պատասխան պահանջող մեծաթիվ լուրերով.... և առանց խնդրանքի ստացված վաճառքի գովազդներով»։ Գրքում ավելացվում է. «Էլեկտրոնային փոստով ստացվող լուրերի սիրահարների մեջ սկսում է տարածվել շատ վատ մի սովորություն. ինչ զվարճալի նորություն էլ որ նրանք ստանան՝ կատակներ, քաղաքային հերյուրանքներ, անվերջ շղթայով ուղարկվող նամակներ և էլի ուրիշ բաներ, փոխանցում են բոլոր նրանց, ում հասցեն գտնվում է իրենց էլեկտրոնային տեղեկատուի մեջ» («Data Smog​—Surviving the Information Glut»)։

³¹ Նման երևույթ է նկատվում մեր եղբայրներից շատերի էլեկտրոնային փոստերում, որոնցում կարելի է հանդիպել կատակների կամ ծառայության մասին ծիծաղաշարժ պատմությունների, մեր հավատալիքների վրա հիմնված բանաստեղծությունների, համաժողովներում կամ Թագավորության սրահներում լսած տարբեր ելույթներից օրինակների, ծառայությունից դեպքերի և այլն. մի խոսքով, բավականին անմեղ թվացող բաների։ Շատերը, սովորաբար, էլեկտրոնային փոստով ուրիշներին ինֆորմացիա են փոխանցում առանց աղբյուրը ստուգելու, որի հետևանքով դժվարանում է իսկական նախաձեռնողի տվյալները պարզելը, և արդեն այդ տեղեկության ճշգրտությունը կասկածի տակ է ընկնում (Առակ. 22։20, 21)։

³² Հաճախ այդ անբովանդակ լուրերը չեն համապատասխանում Տիմոթեոսին գրած նամակում Պողոսի ակնարկած ողջամիտ խոսքերին. «Որպէս օրինակ ունեցիր այն ողջամիտ խօսքերը, որոնք ինձնից լսեցիր՝ այն հաւատով եւ սիրով, որ ունեն Քրիստոս Յիսուսին միանալով հաւատացողները» (Բ Տիմոթ. 1։13)։ ‘Ողջամիտ խոսքերի օրինակը’ իր մեջ բովանդակում է սուրբգրային ճշմարտության «մաքուր լեզուն», իսկ վերջինս հիմնականում կենտրոնանում է Աստվածաշնչի գլխավոր թեմայի՝ Թագավորության միջոցով Եհովայի գերիշխանությունը պաշտպանելու վրա (Սոփ. 3։9, ՆԱ)։ Ամեն ջանք պետք է թափենք, որպեսզի մեր ժամանակն ու ուժը ամբողջովին հատկացնենք ոչ թե անօգուտ զբաղմունքներին, այլ Եհովայի գերիշխանությանը թիկունք կանգնելուն։

³³ Քանի որ ապրում ենք ներկա համակարգի վերջին օրերում, այժմ ավելի, քան երբևէ պետք է աչալուրջ լինենք։ Աստվածաշունչը մեզ զգուշացնում է. «Արթո՛ւն եղէք, հսկեցէ՛ք, քանի որ ձեր ոսոխը՝ Սատանան, մռնչում է առիւծի պէս, շրջում եւ փնտռում է, թէ ո՛ւմ կուլ տայ» (Ա Պետ. 5։8)։ Նաև կարդում ենք. «Աստծու սպառազինութիւնը հագէք, որպէսզի կարողանաք ընդդիմանալ Սատանայի հնարանքներին» (Եփես. 6։11)։

³⁴ Ինտերնետից սխալ օգտվելու դեպքում այն կարող է Սատանայի ձեռքում գործիք դառնալ, որով նա որսում է դրա կարողություններով հրապուրվող անհատներին։ Թեև չի կարելի անտեսել նաև Ինտերնետի տված օգուտները, սակայն, ընդհանուր առմամբ, անզգույշ օգտագործման դեպքում այն վտանգավոր է դառնում։ Ծնողներին խորհուրդ է տրվում հետևել, թե ինչպես են իրենց զավակներն օգտվում Ինտերնետից։

³⁵ Ինտերնետի մասին հավասարակշռված տեսակետ ունենալը մեզ համար պաշտպանություն կլինի։ Մենք գնահատում ենք Պողոսի տեղին արված հիշեցումը, թե «այս աշխարհը գործածողները չար կերպով չ’գործածողների պէս [լինեն]. որովհետեւ այս աշխարհի կերպարանքն անցնում է» (Ա Կորնթ. 7։31, ԱԹ)։ Այս հանգամանքն ի նկատի ունենալով՝ մենք մեր ընտանիքների հետ միասին կարող ենք դիմագրավել և չտարվել այն ամենով, ինչ առաջարկում է աշխարհը, այդ թվում նաև Ինտերնետով մատուցվող ամեն բանով։

³⁶ Շատ կարևոր է, որ ժողովում եղբայրների հետ միասնական լինենք և մեր մնացած ժամանակը խելամտորեն օգտագործենք, ինչը կօգնի մեզ ամբողջ սրտով պաշտպանելու Թագավորության շահերը։ Քանի որ ներկա համակարգը հասնում է իր վախճանին, եկեք ‘այլևս չընթանանք այնպես, ինչպես որ այլ հեթանոսներն են ընթանում իրենց մտքի ունայնությամբ’, այլ ‘իմանանք, թե ի՛նչ է Տիրոջ կամքը’ (Եփես. 4։17; 5։17)։