Ուշադիր եղիր Աստծո պատգամներին

¹ Մարդու ասած ամեն մի խոսքին չարժե հատուկ ուշադրություն դարձնել։ Բայց երբ Աստված է խոսում, անչափ կարևոր է նրան լսելը (Բ Օրին. 28։1, 2)։ Ուրախ ենք, որ Աստծուց ներշնչված մարդիկ մեր օգտի համար գրանցել են «Աստծու պատգամները» (Հռովմ. 3։2)։ Գալիք նահանգային համաժողովը հրաշալի հնարավորություն կընձեռի մեզ՝ լսելու այդ պատգամները։ Ինչպե՞ս կարող ես դու հատուկ ուշադրություն դրսևորել։

² Ամեն առավոտ փոքր–​ինչ շուտ եկ։ Պատկերացրու իսրայելացիների հուզմունքը, երբ նրանց ասացին, որ պետք է Սինայ սարի ստորոտում հանդիպեին Եհովային, որպեսզի նրա Օրենքը լսեին (Ելից 19։10, 11, 16—19)։ Եթե դու էլ ես այդպես վերաբերվում Եհովայի ուսուցմանը, ապա հնարավոր ամեն բան կանես փոքր–​ինչ շուտ գալու համար։ Ուշանալով մենք ծրագիրն ամբողջությամբ չենք լսում և խանգարում ենք ուրիշներին, երբ փորձում ենք նստելու տեղ գտնել։ Ամեն օր դռները կբացվեն առավոտյան ժամը 8։00–ին, իսկ ծրագիրը կսկսվի ժամը 9։30–ին։

³ Ոմանք, նույնիսկ եթե ժամանակին են տեղ հասնում, ծրագիրը սկսվելիս իրենց տեղերում չեն լինում։ Ո՞րն է պատճառը։ Պատճառն այն է, որ նրանք շարունակում են զրուցել իրենց ընկերների հետ, մինչև որ նախագահող եղբայրը հայտարարում է բացման երգը և միայն դրանից հետո են գնում իրենց տեղերը։ Հարկավոր է նկատել, որ յուրաքանչյուր մասը սկսելու բացման երգից մի քանի րոպե առաջ նա նստած է լինում բեմի վրա, և այդ ընթացքում Թագավորության մեղեդի է հնչում։ Սա ազդանշան է, որ պետք է զբաղեցնել տեղերը։ Այդ դեպքում երգը հայտարարելիս մենք պատրաստ կլինենք բոլորի հետ փառաբանել Եհովային։

⁴ Լսեք ընտանիքով։ Երբ հավաքված իսրայելացիների համար ընթերցում էին Եհովայի պատգամները, ընտանիքներն, իրենց «երեխաների» հետ միասին, լսում էին ու սովորում (Բ Օրին. 31։12, ԷԹ)։ Համաժողովների ժամանակ երեխաները չպետք է ‘իրենց կամքին ձգված’ լինեն (Առակ. 29։15, Արևմտ. Աստ.)։ Ծնողնե՛ր, միջոցներ ձեռք առեք, որպեսզի համաժողովին ընտանիքով տեղ զբաղեցնեք ձեր զավակների հետ միասին։ Որոշ ծնողներ իրենց երեխաներին զուգարան են ուղեկցում հենց այն ժամանակ, երբ բացման երգն է սկսվում։ Սակայն, այդ ձևով երեխաները հազիվ թե հասկանան երկրպագության մեջ երգերի ու աղոթքների կարևորությունը։ Ավելի լավ չի՞ լինի երեխաների այդ կարիքները հնարավորության սահմաններում հոգալ նախքան ծրագրի յուրաքանչյուր մասի սկսվելը։

⁵ Մեզ հեշտ կլինի ծրագրին հետևել, եթե նախորդ գիշերը բավականաչափ հանգստացած լինենք և օրվա ընթացքում խուսափենք ծանր կերակուրներից։ Կենտրոնացի՛ր ելույթ ունեցողի խոսքերի վրա։ Թույլ մի՛ տուր մտքերիդ թափառելու։ Աստվածաշնչով հետևիր, երբ այնտեղից համարներ են ընթերցվում։ Հակիրճ գրառումներ կատարիր։ Յուրաքանչյուր ելույթի ժամանակ մտքումդ քննիր լսածդ և մտածիր, թե ինչպես կարելի է այդ նյութը կիրառել։ Օրվա վերջում ընտանիքով քննարկեք ծրագրի թեմաները։ Ո՞ր կետը հատկապես դուր եկավ յուրաքանչյուրին։ Ինչպե՞ս կարող է ընտանիքդ լավագույն կերպով կիրառել այդ ինֆորմացիան։

⁶ Հարգանք ցույց տուր Աստծո խոսքի հանդեպ։ Համաժողովներին հիանալի հնարավորություններ են բացվում մեզ համար՝ զրուցելու մեր ընկերների հետ և վայելելու կազդուրիչ ընկերակցություն։ Մենք զրուցելու համար ժամանակ կունենանք, եթե վաղ գանք համաժողովն անցկացնելու վայր։ Սակայն ոմանք զրույցի են բռնվում ծրագրի ընթացքում՝ կարծելով, թե դա այդպիսի մեծ լսարանում գրեթե չի շեղի ունկնդիրների ուշադրությունը։ Նույնիսկ երբ հանդիպումներ են անցկացվում մեծ հավաքատեղիներում, հարկավոր է ծրագրին հետևել ճիշտ այնպես, ինչպես Թագավորության սրահում ժողովի հանդիպումների ժամանակ։ Բջջային հեռախոսների, փեյջերների, տեսաձայնագրիչների, լուսանկարչական ապարատների և այլ սարքերի օգտագործումը չպետք է խանգարի մարդկանց՝ ծրագիրը լսելու։

⁷ Եհովայից Օրենքը ստանալիս Մովսեսը «հաց չ’կերավ՝ եւ ջուր չ’խմեց» (Ելից 34։28)։ Նմանապես, պատշաճ չի լինի ծրագրի ընթացքում ուտելը կամ խմելը։ Եթե լուրջ առողջական խնդիրներ չունես, սպասիր մինչև ուտելու «ժամանակը» գա (Ժող. 3։1)։

⁸ Որոշ համաժողովներում շատ եղբայրների ու քույրերի և նույնիսկ փոքր երեխաների շրջանում դեռևս գոյություն ունի ծրագրի ժամանակ միջանցքներում անցուդարձ անելու խնդիրը։ Կարգադրիչները կարող են խնդրել նրանց զբաղեցնել իրենց տեղերը։ Զանազան բաժիններում աշխատող կամավորներն իրենց աշխատանքն ավարտելուն պես պետք է վերադառնան իրենց տեղերը։ Չնայած նրանք նշանակված են՝ կարևոր գործ կատարելու հենց ծրագրի ընթացքում, սակայն նրանք չպետք է մյուս կամավորների հետ զրուցելու նպատակով մնան այդ բաժնում։

⁹ Մենք չենք ցանկանում ‘դանդաղ լինել լսելիքով’, երբ ունկնդրում ենք Աստծո խոսքը (Եբր. 5։11, ԱԹ)։ Ուստի, եկեք վճռական լինենք պատշաճ հարգանք ցույց տալու մեջ՝ ուշադիր ականջ դնելով Եհովայի պատգամներին, որոնք կքննարկվեն գալիք նահանգային համաժողովում։