Նոր հրատարակություն՝ ուսումնասիրություններ սկսելու համար

¹ Մի ամերիկուհի Հռոմի կաթոլիկ եկեղեցու ջերմեռանդ անդամներից էր։ Նա հավատարմորեն պաշտպանում էր եկեղեցու ուսմունքները և նույնիսկ ուխտագնացություն կատարեց դեպի Վատիկան։ Սակայն, երբ Եհովայի վկաներից մեկը նրան Աստվածաշնչի ուսումնասիրություն առաջարկեց, նա համաձայնվեց։ Ինչո՞ւ։ Քանի որ ցանկանում էր իմանալ, թե ինչ է սովորեցնում Աստծո Խոսքը, իսկ իր եկեղեցին նման ուսումնասիրություն չէր առաջարկում։ Ի՞նչ ենք սովորում այս դեպքից։ Այն, որ նախօրոք հնարավոր չէ իմանալ, թե ով կընդունի Աստվածաշունչն ուսումնասիրելու մեր առաջարկը, իսկ ով՝ ոչ (Ժող. 11։6)։

² Երբևէ երկմտե՞լ եք մարդկանց հայտնել, որ մենք պատրաստ ենք Աստվածաշունչն ուսումնասիրել ցանկություն հայտնող յուրաքանչյուր անհատի հետ։ Արդյոք ձեր տան շրջակայքում ապրող բոլո՞ր մարդիկ գիտեն, որ մենք նման անվճար ծառայություն ենք մատուցում։ Ինչպե՞ս օգնենք նրանց, որ այդ մասին իմանան։ Մեզ կօգնի նոր հրատարակությունը։ Դա մի գեղեցիկ, վեց էջանոց թերթիկ է և կրում է «Կցանկանայի՞ք ավելին իմանալ Աստվածաշնչի մասին» անվանումը։ Եկեք ենթավերնագիր առ ենթավերնագիր ծանոթանանք այս թերթիկին։

³ «Ինչո՞ւ է անհրաժեշտ կարդալ Աստվածաշունչը»։ Թերթիկում նշված պատճառները շատ հետաքրքրական են։ Այն բացատրում է, որ «Աստվածաշունչը Աստծո սերը արտահայտող հրահանգներ է պարունակում»՝ ցույց տալով, թե ինչպես կարելի է աղոթքի միջոցով մոտենալ Աստծուն և ստանալ հավիտենական կյանքի պարգևը (Ա Թեսաղ. 2։13)։ Թերթիկում խոսվում է «այնպիսի ճշմարտությունների» մասին, որոնք «կարող են լուսավորել մարդուն», ինչպես օրինակ՝ ինչ է պատահում մահից հետո և ինչու է աշխարհը տառապանքով լի։ Այն պատմում է, որ երբ անհատը կիրառում է «Աստվածաշնչում արձանագրված սկզբունքները», դա նպաստում է նրա առողջությանն ու երջանկությանը, բացի այդ նա հույսով է լցվում և ուրիշ ցանկալի հատկություններ ձեռք բերում։ Թերթիկում նշվում է Աստվածաշունչը կարդալու ևս մեկ պատճառի մասին, այն է՝ ապագային վերաբերող մարգարեությունները, որոնք ցույց են տալիս, թե ինչ է լինելու շատ շուտով (Յայտն. 21։3, 4)։

⁴ «Օգնություն՝ Աստվածաշունչը հասկանալու համար»։ Թերթիկում ասվում է. «Մենք բոլորս էլ օգնության կարիք ենք զգում Աստվածաշունչը հասկանալու համար»։ Այնուհետև խոսվում է ուսուցման մեր մեթոդի մասին. «Շատ լավ կլինի Աստվածաշունչը աստիճանաբար ուսումնասիրել՝ սկսելով հիմնական ուսմունքներից»։ Թեպետ «Աստվածաշունչն է արժանահավատ ինֆորմացիայի աղբյուրը», այնուհանդերձ թերթիկում հատուկ նշվում է, որ ուսումնասիրողը «Աստված պահանջում է» գրքույկի օգնությամբ կկարողանա «հասկանալ բազմաթիվ տարբեր հարցերի վերաբերյալ աստվածաշնչյան վկայակոչումները»։ Իսկ հաջորդ ենթավերնագրում մի առանձնահատուկ հարց է հնչում։

⁵ «Կցանկանայի՞ք ամեն շաբաթ ժամանակ տրամադրել Աստվածաշունչը հասկանալու համար»։ Թերթիկի այս հատվածում պատմվում է, որ Աստվածաշնչի ուսումնասիրություն անցկացնելու ժամն ու վայրը կարելի է հարմարեցնել ուսումնասիրողի ցանկությանը՝ լինի դա նրա տանը, թե՝ հեռախոսով։ Ովքե՞ր կարող են մասնակցել քննարկմանը։ Թերթիկը պատասխանում է. «Ձեր ամբողջ ընտանիքը, այն ընկերները, որոնց կցանկանայիք հրավիրել. կամ գուցե նախընտրում եք, որ քննարկումը անցկացվի միայն ձեզ հետ»։ Իսկ որքա՞ն պետք է տևի ուսումնասիրությունը։ Թերթիկում բացատրվում է. «Շատերը շաբաթական մեկ ժամ են հատկացնում Աստվածաշնչի ուսումնասիրությանը։ Եթե ամեն շաբաթ դուք ի վիճակի եք ավելի շատ կամ ավելի քիչ ժամանակ տրամադրելու, ապա Վկաները կարող են հարմարվել ձեզ՝ օգնություն ցույց տալու համար»։ Ահա՛ թե որտեղ է բանալին... Մենք պատրաստ ենք հարմարվել յուրաքանչյուր ուսումնասիրողի հանգամանքներին։

⁶ «Սովորելու հրավեր»։ Թերթիկում զետեղված կտրոնի միջոցով ընթերցողը կարող է պատվիրել «Աստված պահանջում է» գրքույկը կամ խնդրել, որ այցելեն իրեն և ցույց տան, թե ինչպես է Աստվածաշնչի տնային ուսումնասիրություն անցկացվում։ Կտրոնի վրա պատկերված է «Աստված պահանջում է» գրքույկի գունազարդ շապիկը։ Ակնհայտ չէ՞, որ այս նոր թերթիկը շատ անկեղծ անհատների կքաջալերի ընդունել մեր օգնությունը։ Իսկ այժմ եկեք քննարկենք, թե ինչպես կարող ենք լավագույն ձևով գործածության մեջ դնել այս նոր հրատարակությունը։

⁷ Ո՞ւմ կարող եք առաջարկել թերթիկը։ Թերթիկը կարելի է անձամբ տալ անհատին կամ թողնել նրանց, ում տանը չենք հանդիպել։ Կարելի է տարածել տնետուն ծառայության ընթացքում, փողոցում կամ գործարար թաղամասերում։ Եթե մարդիկ նույնիսկ հրաժարվում են վերցնել որևէ ուրիշ գրականություն, թերթիկն ամեն դեպքում առաջարկեք։ Թերթիկը կարող եք դնել այն պարբերագրերի կամ այլ գրականության էջերի արանքում, որոնք տարածում եք։ Նամակ ուղարկելիս՝ թերթիկ էլ դրեք ծրարի մեջ։ Հեռախոսով զրուցելիս՝ առաջարկեք զրուցակցին այն ուղարկել փոստով։ Միշտ ձեզ հետ ունեցեք այս թերթիկի մի քանի օրինակ, որպեսզի առաջարկեք գնումներ անելիս, հասարակական տրանսպորտով երթևեկելիս՝ ցանկացած հնարավորություն օգտագործելով։ Տվեք այն ձեր բոլոր հյուրերին։ Առաջարկեք ձեր բարեկամներին, հարևաններին, աշխատակիցներին, համադասարանցիներին և մյուս ծանոթներին։ Մի խոսքով՝ աշխատեք այս թերթիկը տալ ձեզ հանդիպած բոլոր մարդկանց։ Իսկ հետո՞։

⁸ Եթե անմիջապես վերցնում են։ Կլինեն մարդիկ, որ անմիջապես կվերցնեն թերթիկը և ցանկություն կհայտնեն Աստվածաշունչն ուսումնասիրել։ Ուստի ամեն անգամ ծառայության դուրս գալիս միշտ քեզ հետ ունեցիր «Աստված պահանջում է» գրքույկի երկու օրինակ. մեկը՝ ուսումնասիրողի, մյուսը՝ քեզ համար։ Եթե մարդը դեմ չէ, անհապաղ ուսումնասիրություն սկսիր։ Բաց արա գրքույկի երկրորդ էջը և կարդա «Ինչպես գործածել այս գրքույկը» վերնագրի տակ գտնվող ինֆորմացիան։ Հետո անցիր առաջին դասին ու ցույց տուր, թե ինչպես է անցկացվում ուսումնասիրությունը։ Կա՞ արդյոք սրանից ավելի հեշտ եղանակ։

⁹ Եթե ունկնդրիդ մտածելու ժամանակ է հարկավոր՝ քո առաջարկության հետ կապված։ Չթողնելով, որ երկար ժամանակ անցնի՝ ձգտիր նրան կրկին այցելել։ Անպայման հետդ վերցրու «Աստված պահանջում է» գրքույկը։ Զրուցակցին ցույց տուր գրքույկի երկրորդ էջի բովանդակությունը։ Նրան առաջարկիր ընտրել այն դասը, որն իրեն ամենաշատն է հետաքրքրում։ Հենց այդ դասից էլ սկսիր քննարկումը։

¹⁰ Եթե պարբերագիր ես թողել։ Եթե զրուցակցիդ պարբերագրի հետ միասին թերթիկ ես տվել, ապա վերայցելության ժամանակ կարող ես ասել. «Անցած անգամ ձեզ մոտ թողեցի «Դիտարան» պարբերագրի մի օրինակ։ Գուցե նկատել եք, որ այդ հանդեսի լրիվ անվանումն է՝ «Դիտարան. ծանուցանում է Եհովայի Թագավորությունը»։ Եթե դեմ չեք, այսօր ես կցանկանայի պատմել, թե ինչ է իրենից ներկայացնում այդ Թագավորությունը, և այն ինչպիսի նշանակություն կարող է ունենալ ձեր և ձեր ընտանիքի համար»։ Հետո բացիր «Աստված պահանջում է» գրքույկի 6–րդ դասը։ Սկսելով առաջին պարբերությունից՝ կարդա և քննարկիր այնքան ժամանակ, որքան որ անհատը կարող է տրամադրել։ Քննարկման վերջում առաջարկիր մեկ ուրիշ օր հանդիպել և ավարտել այդ դասի ուսումնասիրությունը։

¹¹ Մոտդ միշտ թերթիկներ ունեցիր։ Ծառայողական վերակացուն և գրականության համար պատասխանատու եղբայրները պետք է ուշադիր լինեն, որպեսզի ժողովում «Իմանալ Աստվածաշունչը» թերթիկից ամեն ժամանակ բավական քանակությամբ առկա լինի։ Մի քանի թերթիկ պահիր հագուստիդ գրպանում կամ պայուսակիդ մեջ, ավտոմեքենայում, աշխատատեղում, հետդ տար դպրոց, դիր այն ձեր տան միջանցքում. կարճ ասած՝ այնպես, որ այն միշտ ձեռքիդ տակ ունենաս։ Իհարկե, մի քանի հատ էլ դիր քո քարոզչական պայուսակում, որպեսզի, երբ մեկի հետ զրուցես Աստվածաշնչի մասին, նրան թերթիկ առաջարկես։

¹² Թող որ Եհովան օրհնի մեր ջանքերը։ Բոլոր քրիստոնյաների բաղձալի նպատակն է ճշմարտությունը սովորեցնել հնարավորին չափ շատ մարդկանց (Մատթ. 28։19, 20)։ Այժմ անցկացնո՞ւմ ես Աստվածաշնչի տնային ուսումնասիրություն։ Եթե այո, ապա կարո՞ղ ես քո շաբաթական գրաֆիկում ժամանակ առանձնացնել ևս մեկի հետ ուսումնասիրելու համար։ Իսկ եթե այժմ ոչ մեկի հետ չես ուսումնասիրում, ապա, անշուշտ, ցանկանում ես։ Ուրեմն՝ աղոթիր Եհովային, որ օրհնի ջանքերդ՝ գտնելու այնպիսի մեկին, որը կհամաձայնի ուսումնասիրություն սկսել։ Այնուհետև գործի անցիր՝ համաձայն քո աղոթքների (Ա Յովհ. 5։14, 15)։

¹³ Եվ այսպես՝ ուսումնասիրություններ սկսելու համար մենք նոր հրատարակություն ունենք։ Կարդացեք այն։ Տարածեք առանց կաշկանդվելու՝ ցանկացած հնարավորության դեպքում։ Որքան որ ներում են ձեր ուժերը, ‘բարիք գործեք, բարի գործերով հարստացեք, եղեք առատաձեռն, ձեր ունեցածից ուրիշին էլ բաժին հանեք’ (Ա Տիմոթ. 6։18)։

[Շրջանակ 4–րդ էջի վրա]

Ե՞րբ կարելի է տարածել թերթիկը

◼ Առօրյա խոսակցությունների ժամանակ

◼ Երբ անհատը վերցնում է մեր գրականությունը

◼ Երբ տանը մարդ չկա

◼ Երբ վերայցելություններ ենք կատարում

◼ Երբ փողոցում զրուցում ենք մեկի հետ

◼ Երբ վկայություն ենք տալիս գործարար թաղամասերում

◼ Երբ ոչ պաշտոնական զրույց ենք վարում

◼ Երբ նամակ ենք գրում

◼ Երբ երթևեկում ենք հասարակական տրանսպորտով

◼ Երբ ինչ–​որ մեկը թակում է մեր տան դուռը

◼ Երբ խոսում ենք բարեկամների, հարևանների, աշխատակիցների, համադասարանցիների և ուրիշ ծանոթների հետ