Եհովայի ցուցաբերած սիրո համար երախտագետ լինելը օրհնություններ է բերում (մաս 1–ին)

¹ Հովհաննես առաքյալը գրեց. «Սիրենք Աստծուն, որովհետեւ առաջինը նա՛ սիրեց մեզ» (Ա Յովհ. 4։19)։ Երբ խորհում ենք այն ամենի մասին, թե ինչ է Եհովան արել մեզ համար, փոխադարձաբար սրտանց ցանկանում ենք խոր երախտագիտություն հայտնել նրան։ Հիսուսն այս հարցում օրինակ թողեց նրանով, որ հնազանդորեն վկայեց Աստծո անվան և Թագավորության մասին (Յովհ. 14։31)։ Մեզ համար օգտակար կլինի քննարկել մի քանի միջոցներ, որոնց օգնությամբ կկարողանանք ցույց տալ մեր գնահատանքը Եհովայի ցուցաբերած սիրո համար, որն էլ օրհնություններ է բերում։

² Տնետուն ծառայելով։ Հիսուսը սովորեցրեց իր աշակերտներին, թե ինչպես կատարել Թագավորության քարոզչությունը։ Նրա տված հրահանգներից հստակորեն երևում է, որ նրանք, տարածելով բարի լուրը, ծառայել են տնետուն (Ղուկ. 9։1–6; 10։1–7)։ Մենք պետք է սիրենք Աստծուն և մերձավորին, որպեսզի, չնայած անտարբերությանն ու հակառակությանը, շարունակենք կատարել այս ծառայությունը։ Գնալով տնետուն՝ նաև ինքներս ենք օգուտներ քաղում, քանի որ մեր հավատն ու հույսը ավելի են ամրանում, և մեր համոզվածությունն ավելի է աճում։

³ Ծառայելով հրեշտակների առաջնորդությամբ՝ գտնում ենք բազմաթիվ մարդկանց, ովքեր ծարավ են ճշմարտության (Յայտն. 14։6)։ Որոշ տանտերեր պատմում են, որ այն պահին, երբ օգնության համար Աստծուն էին աղոթում, Վկաները բախել են իրենց դուռը։ Օրինակ՝ երկու քույր փոքր երեխայի հետ միասին տնետուն էին ծառայում Կարիբյան ծովի կղզիներից մեկում։ Երբ նրանք որոշեցին, որ արդեն ժամանակն է տուն վերադառնալու, փոքրիկը առաջ գնաց ու բախեց հաջորդ դուռը։ Դուռը բացեց մի երիտասարդ կին։ Տեսնելով դա՝ Վկաները մոտեցան և սկսեցին խոսել կնոջ հետ։ Վերջինս նրանց ներս հրավիրեց և ասաց, որ հենց նոր աղոթում էր Աստծուն, որպեսզի Վկաներին ուղարկի իր մոտ՝ բացատրելու Աստվածաշունչը։

⁴ Ծառայելով փողոցում։ Քանի որ որոշ վայրերում անչափ դժվար է մարդկանց տանը գտնել, արդյունավետ միջոց է փողոցում ծառայելը։ Բացի այդ, բազմաթիվ մարդիկ ապրում են սահմանափակ մուտք ունեցող թաղամասերում կամ հսկողության տակ գտնվող շենքերում, որտեղ հնարավոր չէ դռնեդուռ ծառայել։ Սակայն, որպես երախտագիտություն Եհովայի ցուցաբերած սիրո հանդեպ, օգտագործում ենք ամեն հնարավոր միջոց, այդ թվում նաև փողոցում վկայություն տալը, որպեսզի կարողանանք մարդկանց հաղորդել Թագավորության լուրը (Առակ. 1։20, 21)։

⁵ Կրկնակի այցելություններ կատարելով։ Քանի որ փնտրում ենք նրանց, ովքեր «գիտակցում են իրենց հոգևոր կարիքները», ուրեմն ցանկանում ենք հնարավոր ամեն բան անել նրանց այդ կարիքը բավարարելու համար (Մատթ. 5։3, ՆԱ)։ Այդ նպատակին հասնելու համար հարկավոր է վերադառնալ՝ մեր ցանած ճշմարտության սերմերը ջրելու (Ա Կորնթ. 3։6–8)։ Ավստրալիայում քույրը թերթիկ տվեց մի կնոջ, որն առաջին հայացքից կարծես թե առանձնակի հետաքրքրություն չցուցաբերեց։ Այնուամենայնիվ քույրը շարունակում էր այցելել նրան՝ փորձելով կրկին տանը գտնել։ Երբ վերջապես նրան հաջողվեց հանդիպել այդ կնոջը, մեր քույրը տեսավ, որ առաջին այցից հետո նա թանկ գնով Աստվածաշունչ է ձեռք բերել։ Քույրը նրա հետ ուսումնասիրություն սկսեց։

⁶ Աստվածաշնչի ուսուցումներ անցկացնելով։ Սա կարող է լինել մեր ծառայության ամենահաճելի և արգասաբեր մասը։ Ի՜նչ մեծ օրհնություն է օգնել մարդկանց իմանալու Եհովայի մասին, տեսնել, թե Աստծուն հաճեցնելու համար ինչպես են նրանք փոփոխություններ կատարում իրենց կյանքում և, ի վերջո, ներկա գտնվել նրանց մկրտությանը, որով խորհրդանշվում է նրանց նվիրումը Եհովային (Ա Թեսաղ. 2։20; Գ Յովհ. 4)։

⁷ Հաջորդ համարում կքննարկենք մի քանի միջոցներ ևս, որոնք կիրառելով ցույց կտանք մեր երախտագիտությունը Եհովային՝ իր ցուցաբերած սիրո համար, որն էլ օրհնություններ է բերում։