¹ Այս հոդվածի առաջին մասում քննարկեցինք, թե ինչպիսի չորս միջոցների օգնությամբ կարող ենք ցույց տալ մեր գնահատանքը Եհովայի ցուցաբերած սիրո համար (Ա Յովհ. 4։9–11)։ Այս հոդվածում կքննարկենք ևս հինգը։ Մարդկանց լիարժեք հոգևոր օգնություն ցույց տալով՝ կօրհնվենք։

² Ոչ պաշտոնական ծառայություն։ Սա արդարության ծարավ մարդկանց գտնելու և նրանց գրականություն թողնելու հարմար միջոց է։ Հարկավոր է ‘գնել ժամանակը’ և օգտագործել ցանկացած հնարավորություն՝ քարոզելու բոլոր նրանց, ում հանդիպում ենք (Եփես. 5։16, ԱԹ)։ Դա անելու համար թերևս պահանջվի «ոտքի հանել» մեր ողջ արիությունը, սակայն եթե գնահատում ենք Աստծո ցուցաբերած սերը և տեսնում մարդկանց կարիքները, կքարոզենք նրանց՝ օգտագործելով ամեն հարմար առիթ (Բ Տիմոթ. 1։7, 8)։

³ Մի միսիոներ տաքսում իր կողքին նստած ուղևորի հետ զրույց սկսելով՝ առատորեն օրհնվեց. ուղևորին հետաքրքրեց ճշմարտությունը։ Միսիոները մի քանի անգամ այցելեց նրան և արդյունքում նրա հետ Աստվածաշնչի ուսումնասիրություն սկսեց։ Տղամարդն ընդունեց ճշմարտությունը, աճեց հոգևորապես, և այժմ ժողովում նա ծառայում է որպես երեց։

⁴ Վկայություն նամակներով։ Ի՞նչ կարելի է անել, եթե հիվանդության կամ վատ եղանակի պատճառով չենք կարող տնետուն ծառայել։ Կարելի է նամակներ գրել՝ ճշմարտության մասին հակիրճ պատմելով ծանոթներին, նրանց, ովքեր կորցրել են իրենց հարազատներին կամ՝ ում տանը չենք հանդիպել։ Կարելի է այդ նամակի մեջ համապատասխան թերթիկ դնել և առաջարկել հասցեատիրոջը արձագանքել, եթե նա հարցեր ունենա։ Որպես հետադարձ հասցե հարկավոր է նշել անձնական կամ Թագավորության սրահի հասցեն։ Խնդրում ենք, մի նշեք մասնաճյուղի հասցեն։

⁵ Վկայություն հեռախոսով։ Այս միջոցը հիանալի հնարավորություն է բարի լուրը հասցնելու այն մարդկանց, ում չենք կարող հանդիպել տնետուն ծառայության ժամանակ։ Եթե հեռախոսով ողջամտորեն, սիրալիր կերպով, նրբանկատորեն ու հմտորեն քարոզենք, հավանաբար դրական արձագանք կստանանք։ Լավագույն արդյունքների հասնելու համար կարելի է օգտվել 2001 թ. փետրվար ամսվա «Մեր թագավորական ծառայության» թերթիկում ներկայացված գործնական խորհուրդներից (էջ 6, պարբ. 33–41)։

⁶ Հեռախոսով քարոզելով մի կնոջ՝ քույրը հարցրեց, թե մտածե՞լ է նա արդյոք այն մասին, թե ինչ է սպասում ապագայում իրեն և իր ընտանիքի անդամներին։ Կինը պատասխանեց՝ այո՛։ Քիչ հետո նա խոստովանեց, որ հուսահատության պատճառով տանից դուրս չի գալիս։ Սակայն արձագանքելով քրոջ անկեղծ հոգատարությանը՝ կինը ցանկություն հայտնեց հանդիպել նրա հետ մոտակա խանութում։ Արդյունքում նա հաճույքով ընդունեց Աստվածաշունչն ուսումնասիրելու առաջարկը։

⁷ Ողջունել անծանոթներին։ Եթե սիրում ենք մեր դրացիներին, ապա ուշադիր կլինենք բոլոր անծանոթների նկատմամբ, ովքեր այցելում են մեր հանդիպումներին, և նրանց սրտանց կողջունենք (Հռովմ. 15։7)։ Թող անծանոթների համար ակնհայտ լինի, որ գտնվում են այն մարդկանց մեջ, ովքեր ի սրտե հոգ են տանում նրանց հոգևոր բարօրության համար։ Մեր անկեղծ հոգատարությունը գուցե մղի նրանց ընդունելու մեր օգնությունը և Աստվածաշնչի տնային ուսումնասիրություն սկսելու։

⁸ Օրինակելի լինել։ Մեր լավ վարքով ‘զարդարում ենք’ ճշմարտությունը (Տիտոս 2։10)։ Երբ մարդիկ մեր՝ Եհովայի վկաներիս մասին դրական կարծիք են հայտնում, նրանք այդպիսով փառավորում են մեր Աստծուն (Ա Պետ. 2։12)։ Հետևաբար՝ մեր վարքը նույնպես կարող է օգնել մարդկանց բռնելու ճշմարտության ուղին։

⁹ Ինչո՞ւ չխորհել այս հինգ միջոցների մասին, որոնք ցույց են տալիս, թե ինչպես արտահայտել մեր գնահատանքը Եհովայի ցուցաբերած մեծագույն սիրո համար, և ինչո՞ւ դրանք չկիրառել մեր կյանքում (Ա Յովհ. 4։16)։ Չէ՞ որ այդ դեպքում առատ օրհնություններ կստանանք։