Թագավորության լուրի քարոզչությունը կյանքեր է փրկում

¹ Թագավորության լուրի քարոզչությունը ամենակարևոր գործն է մեր օրերում։ Եհովա Աստված, Հիսուս Քրիստոսը և բազում հրեշտակներ իրենց ուշադրությունն ամբողջապես կենտրոնացրել են այս գործունեության վրա։ Ի՞նչ է իրենից ներկայացնում այս գործը և ինչո՞ւ է այդքան կարևոր։ Թագավորության լուրի քարոզչությունը մարդկանց կյանքեր է փրկում (Հռովմ. 1։16; 10։13, 14)։

² Ոմանք այն կարծիքին են, որ մարդկանց ավելի մեծ օգուտ կտանք, եթե փորձենք բարեփոխել մեզ շրջապատող աշխարհը։ Շատերը ջանք չեն խնայում խաղաղություն հաստատելու, հիվանդությունների դեմն առնելու և տնտեսական կյանքում դրական տեղաշարժեր կատարելու համար։ Բայց ի՞նչը ավելի մեծ օգուտներ կբերի մարդկանց։

³ Ամենակարևոր գործը։ Թագավորության ավետիսը բացատրում է, թե որն է կյանքի նպատակը, մարդկության տառապանքի պատճառը. այն նաև ապագայի համար վստահելի հույս է տալիս։ Բարի լուրը հնարավորություն է ընձեռում մարդկանց դառնալու Եհովայի բարեկամները և ստանալու «Աստծու խաղաղութիւնը, որ վեր է, քան ամենայն միտք» (Փիլիպ. 4։7)։ Թագավորության լուրն է միայն, որ գործնական առաջնորդություն է տալիս մարդկանց՝ հաղթահարելու այսօրվա պրոբլեմները. այն նաև բացատրում է, թե ինչպես կարող ենք կենդանի մնալ, երբ ապագայում կործանվի այս չար աշխարհը (Ա Յովհ. 2։17)։ Ուստի՝ մի՞թե չարժե ամեն հնարավորություն օգտագործել՝ քարոզելու Թագավորության բարի լուրը։

⁴ Պատկերացնենք օրինակով. ի՞նչ կանեք, եթե իմանայիք, որ գյուղի քնած բնակիչներին վտանգ է սպառնում. ուր որ է կքանդվի ամբարտակը, և ջուրը կսրբի–կտանի գյուղը։ Ո՞րը կլինի բնակիչներին օգնելու լավագույն միջոցը՝ քանդվող ամբարտակի ջուրը դատարկե՞լը, թե՞ ավերումից հետո գյուղը վերականգնելը։ Ո՛չ մեկը և ո՛չ էլ մյուսը։ Հարկավոր է անհապաղ գյուղացիներին արթնացնել, զգուշացնել մոտալուտ աղետի մասին և օգնել նրանց վտանգավոր գոտուց հեռանալու։ Նրանք, ովքեր հոգևոր առումով քնած են այսօր, լուրջ վտանգի տակ են գտնվում (Ղուկ. 21։34–36)։ Քանի որ ներկա համակարգը կործանման շեմին է, եկեք անհետաձգելիության զգացումով քարոզենք բոլոր մարդկանց (Բ Տիմոթ. 4։2; Բ Պետ. 3։11, 12)։

⁵ Հարատևեք այս գործում։ Եկեք միջոցներ փնտրենք, թե ինչպես կարելի է թվով ավելի շատ անկեղծ սիրտ ունեցող մարդ գտնել՝ քարոզելով բարի լուրը տներում, փողոցում, հեռախոսով և անպաշտոն վկայություն տալով։ Այս հանձնարարությունը, որ տվել է մեզ Եհովան, ամենակարևոր գործն է, որ կարող ենք երբևիցե կատարել։ Եթե նախանձախնդրորեն վերաբերվենք այս գործին, ‘կփրկենք և՛ մեզ, և՛ նրանց, որ լսում են մեզ’ (Ա Տիմոթ. 4։16)։