Ինչպես են ժողովի Գրքի ուսումնասիրության վերակացուները անհատական հետաքրքրություն ցույց տալիս
1 Ժողովի Գրքի ուսումնասիրությունը նախատեսված է, որպեսզի հնարավոր լինի «անհատապես ուշադրություն դարձնել յուրաքանչյուրի հոգևոր աճին։ .... Դրանով արտահայտվում է իր ժողովրդի հանդեպ Եհովայի ողորմությունն ու հոգածությունը» (om-U, էջ 75; Ես. 40։11)։ Նման անհատական ուշադրություն ցույց տալու հարցում կարևոր դեր է խաղում Գրքի ուսումնասիրության վերակացուն։
2 Գրքի ուսումնասիրության ժամանակ։ Գրքի ուսումնասիրության խմբերը փոքր են լինում, ինչի շնորհիվ վերակացուն կարողանում է իր խմբի բոլոր անդամներին ճանաչել (Առակ. 27։23)։ Սովորաբար ուսումնասիրությունից առաջ կամ հետո նրանց հետ հաղորդակցվելու հնարավորություն է լինում։ Ամսվա ընթացքում վերակացուին կհաջողվի զրուցել խմբում գրեթե բոլորի հետ։ Սա օգնում է Գրքի ուսումնասիրության խմբի անդամներին ազատորեն նրան մոտենալ, երբ փորձությունների մեջ են կամ քաջալերության կարիք ունեն (Ես. 32։2)։
3 Գրքի ուսումնասիրության վերակացուն փորձում է խրախուսել բոլորին մասնակցելու ուսումնասիրությանը։ Նա դա անում է իր հեզահոգի և բարեհամբույր վերաբերմունքով (Ա Թեսաղ. 2։7, 8)։ Նա միջոցներ է փնտրում բոլորին ներքաշելու թեմայի քննարկման մեջ, ներառյալ փոքրերին։ Եթե ոմանք ամաչում են մեկնաբանություններ տալուց, նա կարող է նրանց հետ նախօրոք պայմանավորվել, թե Աստվածաշնչի որ համարը կցանկանային կարդալ կամ որ պարբերությունը մեկնաբանել։ Կամ էլ նա գուցե ցույց տա, թե ինչպես կարելի է սեփական բառերով մեկնաբանություններ տալ։
4 Եթե Գրքի ուսումնասիրության վերակացուին օգնում է ծառայող օգնականը, վերակացուն հանձնարարում է նրան երկու ամսվա մեջ մեկ անգամ ուսումնասիրություն անցկացնել։ Սրա շնորհիվ վերակացուն տեսնում է, թե ինչպես է դա նրան հաջողվում և անհրաժեշտ օգտակար խորհուրդներ է տալիս։ Սա մի հիանալի միջոց է՝ օգնելու եղբայրներին բարելավել ուսուցանելու իրենց հմտությունները (Տիտոս 1։9)։
5 Քարոզչական ծառայության մեջ։ Գրքի ուսումնասիրության վերակացուի գլխավոր պարտականություններից մեկը քարոզչական գործունեության մեջ առաջնորդություն ցույց տալն է (Թուոց 27։16, 17)։ Նա գործնական միջոցներ է ձեռնարկում խմբակային քարոզչության համար և ձգտում է օգնել բոլորին ծառայության մեջ ուրախություն գտնելու (Եփես. 4։11, 12)։ Դա կատարելու համար նա նպատակ է դնում խմբի ամեն անդամի հետ ծառայության դուրս գալ։ Նաև համագործակցում է ծառայողական վերակացուի հետ, որպեսզի նրանք, ովքեր ցանկանում են ծառայության մեջ բարելավվել, կարողանան օգնություն ստանալ ավելի փորձառու քարոզիչներից։
6 Որպես սիրառատ հովիվ։ Գրքի ուսումնասիրության վերակացուն հետաքրքրված է նրանցով, ովքեր իրենց հանգամանքների բերումով քիչ են մասնակցում քարոզչական գործին։ Ժողովում կարող են լինել անհատներ, ովքեր մեծահասակ են կամ անկողնային հիվանդ, ոմանք էլ գուցե լուրջ հիվանդություն են ձեռք բերել կամ ծանր վնասվածք ստացել։ Վերակացուն պետք է տեղյակ պահի իր խմբի նման անդամներին, որ եթե սահմանափակ հնարավորությունների պատճառով նրանք չեն կարողացել ամսվա ընթացքում մի ամբողջ ժամ քարոզել, ապա 15 րոպե քարոզելու դեպքում կարող են քարոզչական ծառայության հաշվետվության մեջ նշել այդքանը։ (Ժողովի Ծառայողական կոմիտեն որոշում է, թե ովքեր կարող են դա անել։) Նա նաև հետաքրքրվում է խմբի այն քարոզիչներով, որոնք ակտիվ չեն ծառայության մեջ՝ ձգտելով օգնել նրանց կրկին ակտիվորեն համագործակցելու ժողովի հետ (Ղուկ. 15։4–7)։
7 Որքա՜ն երախտապարտ ենք մենք այն ուշադրության համար, որ ցույց են տալիս Գրքի ուսումնասիրության վերակացուները։ Նրանց անհատական հետաքրքրվածությունը օգնում է, որ «բոլորս հասնենք հավատի ամբողջական միության[ը],.... հավատի չափահասությանը, Քրիստոսի կատարյալ նմանությանը» (Եփես. 4։13, ԱՆԹ)։