Աջակցիր քո՝ ժողովի Գրքի ուսումնասիրության վերակացուին

¹ Մեզանից ամեն մեկը շատ առումներով է օգուտներ քաղում ժողովի Գրքի ուսումնասիրությունից։ Անցած ամիս մենք քննարկեցինք, թե ինչ պարտականություններ ունի ժողովի Գրքի ուսումնասիրության վերակացուն և ինչպես է դրանք կատարում։ Ի՞նչ կարող ենք անել, որպեսզի օգնենք նրան՝ դրանով իսկ օգնելով մեզ և մյուսներին։

² Ամեն շաբաթ ներկա եղիր։ Գրքի ուսումնասիրության խումբը սովորաբար փոքրաթիվ է լինում, հետևաբար քո ներկայությունը հանդիպմանը ակնառու կերպով երևում է։ Նպատակ դիր ամեն շաբաթ հաճախել Գրքի ուսումնասիրության հանդիպմանը։ Նաև դու կարող ես օգտակար լինել, եթե ճշտապահություն հանդես բերես հանդիպումներին ժամանակին ներկա լինելու առումով։ Դա հնարավորություն կտա վերակացուին հանդիպումը ճիշտ ժամանակին սկսել (Ա Կորնթ. 14։40)։

³ Քաջալերական մեկնաբանություններ։ Գրքի ուսումնասիրության վերակացուին կարող ես նաև աջակցել նրանով, որ լավ նախապատրաստվես հանդիպմանը և քաջալերական մեկնաբանություններ տաս։ Լավագույն մեկնաբանությունները սովորաբար նրանք են լինում, երբ մեկնաբանություն տվողը խոսում է միայն մեկ հարցի շուրջ։ Վարվելով այսպես՝ մենք նաև խրախուսում ենք մյուսներին, որ իրենք էլ մեկնաբանություններ տան։ Ձգտիր ամբողջ պարբերությունը չպատմել։ Եթե քննարկվող նյութը հուզում է քեզ, ապա կարող ես հարստացնել քննարկումը՝ մեկնաբանություններ տալով քո մտածումների մասին (Ա Պետ. 4։10)։

⁴ Եթե հանդիպմանը ընթերցելու առանձնաշնորհում ունես, ապա քո նշանակման մեջ ջանասեր եղիր։ Լավ ընթերցանությունը նպաստում է, որ ուսումնասիրությունը բարձր մակարդակով անցնի ու հաճելի լինի ներկաներին (Ա Տիմոթ. 4։13)։

⁵ Խմբակային քարոզչություն։ Գրքի ուսումնասիրության շատ խմբերում անցկացվում է քարոզչական հանդիպում։ Թիկունք կանգնելով այս միջոցառմանը՝ դու կօգնես վերակացուին քարոզչական գործում իր առաջնորդությունն իրականացնելու մեջ։ Քարոզչական հանդիպումներին նայիր որպես հնարավորությունների՝ ավելի մտերմանալու քո եղբայրների հետ ու քաջալերելու նրանց։

⁶ Քարոզչական ծառայության հաշվետվությունները։ Ամեն ամսվա վերջում քարոզչական ծառայության հաշվետվությունը անհապաղ հանձնելը ևս մեկ միջոց է աջակցելու վերակացուին։ Դու կարող ես այն կա՛մ ուղղակիորեն նրան տալ, կա՛մ էլ գցել հաշվետվության համար նախատեսված արկղիկը, որը գտնվում է Թագավորության սրահում։ Գրքի ուսումնասիրության վերակացուները նույնպես կարող են իրենց հավաքած հաշվետվությունները գցել այդ արկղը, և այնուհետև ժողովի քարտուղարը կարող է դրանք վերցնել։

⁷ Քո համագործակցությունը ժողովի Գրքի ուսումնասիրության վերակացուի հետ աննկատ չի մնա։ Ամենից կարևորը՝ դու կարող ես վստահ լինել, որ Եհովան ‘քեզ հետ կլինի’ (Փիլիպ. 4։23)։