Ինչպե՞ս կարող ես օգուտներ քաղել քո քարոզչական ծառայության խմբից
1. Ի՞նչ օգուտներ էինք ստանում Գրքի ուսումնասիրության հանդիպման ժամանակ, որոնք այսօր մատչելի են քարոզչական ծառայության խմբի միջոցով։
1 Կարոտո՞վ ես հիշում ժողովի Գրքի ուսումնասիրության հանդիպումը։ Խմբերը փոքր էին, մթնոլորտը՝ ավելի անկաշկանդ։ Այս հանդիպումը հնարավորություն էր տալիս հեշտությամբ մտերմանալու իրար հետ, ինչն օգնում էր հավատի մեջ ամուր մնալու (Առակ. 18։24)։ Գրքի ուսումնասիրության վերակացուն տեղեկանում էր մեր որպիսությամբ և կարողանում էր անհատական օգնություն ցույց տալ (Առակ. 27։23; 1 Պետ. 5։2, 3)։ Այս օգուտներն այժմ մատչելի են քարոզչական ծառայության խմբի միջոցով։
2. Ինչպե՞ս կարող ենք մտերմանալ մեր խմբի անդամների հետ։
2 Եղիր նախաձեռնող։ Քարոզչական ծառայության խմբերը սովորաբար այն նույն չափի են, ինչ նախկինում Գրքի ուսումնասիրության խմբերը։ Ծառայելով «կողք կողքի»՝ մենք ամրացնում ենք եղբայրական կապը (Փիլիպ. 1։27)։ Ձեր խմբից քանի՞ հոգու հետ ես արդեն ծառայել։ Կարո՞ղ ես «ընդլայնվել» այս առումով (2 Կորնթ. 6։13)։ Երբեմն կարող ենք մեր խմբի անդամներից մեկին հրավիրել մեր ընտանեկան երկրպագությանը կամ էլ միասին ճաշելու։ Որոշ ժողովներում քարոզչական ծառայության խմբերը հերթով հյուրասիրում են ժողով այցելած հռետորին։ Նույնիսկ եթե հռետորը չի կարող մասնակցել, խումբը, այնուամենայնիվ, նշանակված օրը հավաքվում է ճաշելու և իրար քաջալերելու։
3. Ինչպե՞ս են վերակացուները հովվում խմբի անդամներին։
3 Ճիշտ է, այսօր հավաքվում ենք շաբաթական երկու անգամ, սակայն, դա չի նշանակում, որ հովվական գործը պետք է նվազի։ Խմբի վերակացուները իրենց խմբի յուրաքանչյուր անդամի պետք է քաջալերեն, ինչպես նաև օգնեն, որ հմտանա ծառայության մեջ։ Եթե քո խմբի վերակացուն դեռ չի ծառայել քեզ հետ, կարող ես խնդրել, որ միասին ծառայեք։ Բացի այդ, ծառայողական վերակացուն յուրաքանչյուր ամիս մի խմբի հետ շաբաթ ու կիրակի օրերին մասնակցում է ծառայությանը։ Փոքր ժողովներում, որտեղ քարոզչական խմբերը քիչ են, նա կարող է յուրաքանչյուր խմբի այցելել տարին երկու անգամ։ Երբ ծառայողական վերակացուն այցելում է ձեր խումբ, ամեն ինչ արա, որ կարողանաս մասնակցել ծառայությանը։
4. ա) Ինչպե՞ս են կազմակերպվում քարոզչական ծառայության հանդիպումները։ բ) Ինչո՞ւ պետք է մտածենք այն մասին, թե արդյոք չենք կարող մեր տունը առաջարկել քարոզչական ծառայության հանդիպումներ անցկացնելու համար։
4 Հաճախ նպատակահարմար է, որ յուրաքանչյուր խումբ շաբաթ և կիրակի օրերին իր առանձին հանդիպումն անցկացնի իր առանձին վայրում։ Երբ քարոզչական խումբը մոտավորապես նույն ժամի է անցկացնում իր հանդիպումները, ապա խմբի քարոզիչների համար ավելի հեշտ կլինի գալ քարոզչական ծառայության հանդիպման և, հավանաբար, նաև գնալ տարածք։ Նման դեպքերում քարոզիչներին ավելի հեշտ է կազմակերպել, բացի այդ, նրանք առանց ժամանակ կորցնելու կարող են գնալ տարածք։ Նաև խմբի վերակացուի համար ավելի հեշտ է անհրաժեշտ ուշադրությունը ցույց տալ իր խմբի անդամներին։ Սակայն հանգամանքները կարող են այնպես լինել, որ հարկ լինի երկու կամ ավելի խմբեր միավորել, այսինքն՝ միասնական քարոզչական ծառայության հանդիպում անցկացնել։ Եթե ամբողջ ժողովը ամսվա առաջին շաբաթ օրը կամ «Դիտարանի» ուսումնասիրությունից հետո անցկացնում է քարոզչական ծառայության հանդիպում, ապա լավ կլինի, որ յուրաքանչյուր խումբ միասին նստի, որպեսզի խմբի վերակացուն աղոթքից առաջ մի քանի րոպեում կազմակերպի իր խմբի գործունեությունը (տե՛ս «Կարո՞ղ ես քո տունը առաջարկել» շրջանակը)։
5. Թեև հիմա չկա ժողովի Գրքի ուսումնասիրության հանդիպում, ինչո՞ւմ կարող ենք վստահ լինել։
5 Թեև հիմա չկա ժողովի Գրքի ուսումնասիրության հանդիպում, Եհովան շարունակում է մեզ տալ այն ամենը, ինչ անհրաժեշտ է իր կամքը կատարելու համար (Եբր. 13։20, 21)։ Եհովայի հոգածության ներքո մենք ոչ մի բանի պակասություն չենք զգում (Սաղ. 23։1)։ Քարոզչական խմբի միջոցով Աստված շատ օրհնություններ է տալիս։ Եթե լինենք նախաձեռնող և «առատորեն ցանենք», ապա «առատորեն էլ կհնձենք» (2 Կորնթ. 9։6)։
[շրջանակ 6-րդ էջի վրա]
Կարո՞ղ ես քո տունը առաջարկել
Որոշ ժողովներում խմբերը միավորվում են, որովհետև չկան բավարար թվով տներ, որտեղ կարող է քարոզչական ծառայության հանդիպում անցկացվել։ Այդ հանդիպումները ժողովի գործունեության մի մասն են, ուստի մեծ պատիվ կլինի մեզ համար, եթե դրանք մեր տանը անցկացվեն։ Կարո՞ղ ես քո տունը տրամադրել։ Մի անհանգստացիր, եթե այն համեստ է։ Երեցները տուն ընտրելիս հաշվի են առնում տան գտնվելու վայրը և մի քանի այլ գործոններ (այն նույն ձևով, երբ եղբայրները Գրքի ուսումնասիրության հանդիպման անցկացման համար վայր էին ընտրում)։ Եթե ուզում ես քո տունը առաջարկել, ապա այդ մասին տեղյակ պահիր քո խմբի վերակացուին։