Քարոզչական ծառայության հանդիպումները

1. Ինչո՞ւ ենք ձգտում քարոզել կազմակերպված ձևով։

¹ Հիսուսը լավ օրինակ է թողել Թագավորության քարոզչության գործը կազմակերպված և արդյունավետ կերպով կատարելու հարցում։ Այսօր էլ այս համաշխարհային գործի համար պատասխանատու եղբայրները ձգտում են ընդօրինակել նրան։ Այդ նպատակով յուրաքանչյուր ժողովում անցկացվում են քարոզչական ծառայության հանդիպումներ, որպեսզի քարոզիչները կազմակերպված կերպով կատարեն իրենց ծառայությունը (Մատթ. 24։45–47; 25։21; Ղուկ. 10։1–7)։

2. Ինչպե՞ս են անցկացվում քարոզչական ծառայության հանդիպումները։

² Օգտակար հանդիպում։ Քարոզչական ծառայության հանդիպումների ժամանակ փոխադարձաբար քաջալերվում ենք և ծառայության վերաբերյալ գործնական խորհուրդներ ենք ստանում։ Հանդիպման ժամանակ կարելի է քննարկել օրվա խոսքը, եթե այն վերաբերում է ծառայությանը։ Երբեմն «Մեր թագավորական ծառայությունը» թերթիկից, «Տրամաբանել» (անգլ., ռուս.) և «Ծառայության դպրոց» գրքերից կարելի է որոշ մտքեր քննարկել, որպեսզի բոլոր ներկաները պատրաստված գնան ծառայության։ Գուցե կարճ ցուցադրման միջոցով երբեմն ներկայացվի, թե ինչպես կարելի է առաջարկել որևէ հրատարակություն։ Նախքան եզրափակիչ աղոթքը բոլորը պետք է իմանան, թե ում հետ են գնալու ծառայության, և թե որտեղ է գտնվում քարոզչական տարածքը։ 15 րոպե տևող այս հանդիպումից անմիջապես հետո բոլորը պետք է դուրս գան ծառայության։

3. Ո՞վ է պատասխանատու քարոզչական ծառայությունը կազմակերպելու համար։

³ Ինչպե՞ս է կազմակերպվում այս հանդիպումը։ Ծառայողական վերակացուն պատասխանատու է քարոզչական հանդիպումները կազմակերպելու համար։ Իսկ խմբի վերակացուների կամ նրանց օգնականների պատասխանատվությունների մեջ է մտնում շաբաթ–կիրակի օրերին իրենց խմբերի հետ ծառայության մասնակցելը։ Որոշ վերակացուներ և ծառայող օգնականներ գուցե կարողանան նաև շաբաթվա ընթացքում գնալ խմբի հետ ծառայության։ Եթե չկարողանան, ծառայողական վերակացուն հոգ կտանի, որ որևէ եղբայր անցկացնի շաբաթվա ընթացքում կազմակերպվող հանդիպումները։ Խմբի վերակացուները սերտորեն համագործակցում են ծառայողական վերակացուի հետ, որպեսզի յուրաքանչյուր խումբ շաբաթ–կիրակի օրերին տնետան ծառայության համար քարոզչական տարածք ունենա։

4-6. ա) Ի՞նչ նպատակ պետք է դնեն ժողովները՝ իրենց քարոզչական տարածքների հետ կապված։ բ) Ո՞ր հարցերը կօգնեն որոշելու, թե որտեղ և երբ պետք է անցկացվեն քարոզչական հանդիպումները։

⁴ Որտե՞ղ և ե՞րբ պետք է անցկացվեն այս հանդիպումները։ Միևնույն վայրում ամբողջ ժողովով հավաքվելու փոխարեն՝ լավ կլինի, որ այս հանդիպումները անցկացվեն քարոզչական տարածքին մոտ գտնվող մասնավոր տներում, որպեսզի ծառայությունը ավելի արդյունավետ լինի, և քարոզիչները ժամանակ խնայեն։ Այս հանդիպումները կարող են անցկացվել նաև Թագավորության սրահներում։ Շատ ժողովներում քարոզչական ծառայության հանդիպումն անցկացվում է կիրակի օրերին՝ հանրային ելույթից և «Դիտարանի» ուսումնասիրությունից հետո։ Եղբայրները պետք է պարբերաբար քննեն հանգամանքները, որպեսզի տեսնեն՝ հարմար կլինի՞ արդյոք նույն վայրերում շարունակել հանդիպումներն անցկացնել։

⁵ Այն, թե որտեղ պետք է անցկացվեն հանդիպումները և որքան հաճախ՝ կախված է այն բանից, թե որքան շատ է քարոզվել այդ տարածքում։ Հետևյալ հարցերը կօգնեն որոշելու, թե որտեղ և երբ պետք է անցկացվեն այս հանդիպումները։

⁶ Ո՞ր տարածքները ավելի շատ ուշադրության կարիք ունեն։ Ո՞ր ժամին է հարմար գնալ տնետուն։ Պե՞տք է արդյոք երեկոյան ժամերին տնետուն ծառայել կամ վերայցելություններ կատարել։ Քարոզչական ծառայության բոլոր հանդիպումների գրաֆիկը պետք է փակցված լինի ժողովի հայտարարությունների տախտակին։ Բոլոր քարոզիչներն էլ պետք է նպատակ դնեն հիմնովին քարոզելու նշանակված տարածքներում, որպեսզի Պողոս առաքյալի պես կարողանան ասել. «Այլևս չքարոզված տարածք չունեմ» (Հռոմ. 15։23)։

7. Ի՞նչ պատասխանատվություն է կրում քարոզչական ծառայության հանդիպումն անցկացնող եղբայրը։

⁷ Ի՞նչ պատասխանատվություն է կրում եղբայրը։ Այդ հանդիպումն անցկացնող եղբայրը պետք է խոր հարգանք դրսևորի աստվածապետական այս միջոցառման հանդեպ՝ լավ նախապատրաստվելով։ Հանդիպումները պետք է սկսվեն ժամանակին, լինեն գործնական և տևեն 10–15 րոպե։ Եղբայրը նախքան հանդիպումը սկսելը խմբի համար պետք է ունենա քարոզչական տարածք։ Կարիք չկա ուշացողներին սպասելու, սակայն կարելի է կարճ տեղեկություն թողնել նրանց համար, թե որ տարածքում է խումբը քարոզում։ Երբ ավարտվում է հանդիպումը, բոլորը պետք է դուրս գան ծառայության։ Ինչ խոսք, լավ կազմակերպված քարոզչական հանդիպումը մեծապես կօգնի ներկաներին՝ կատարելու իրենց ծառայությունը օրվա ընթացքում (Առակ. 11։14)։

8. Ինչպե՞ս կարող են քարոզիչները համագործակցել եղբոր հետ։

⁸ Համագործակցել խմբի հետ։ Համագործակցությունը շատ կարևոր է (Եբր. 13։17)։ Հնարավորության դեպքում եղբայրը կաջակցի նրանց, ովքեր օգնության կարիք ունեն։ Լավ կլինի, որ հանդիպմանը փորձառու քարոզիչներ ներկա լինեն, որպեսզի օգնեն նոր կամ անփորձ քարոզիչներին։ Ովքեր պատրաստ են համագործակցելու նրա հետ, ում կնշանակի եղբայրը, մեծ հաջողությունների կհասնեն (Առակ. 27։17; Հռոմ. 15։1, 2)։ Բոլորը պետք է ճշտապահ լինեն։ Եթե հարգանք ենք դրսևորում այս հանդիպումների նկատմամբ և մտածում ենք մեր եղբայրների բարօրության մասին, ապա պատրաստակամորեն համապատասխան փոփոխություններ կանենք (2 Կորնթ. 6։3, 4; Փիլիպ. 2։4)։

9. Ինչպե՞ս են ռահվիրաները աջակցում քարոզչական հանդիպումներին։

⁹ Ռահվիրաների աջակցությունը։ Ինչ խոսք, շատ քաջալերական է, որ ռահվիրաները մասնակցում են քարոզչական ծառայության հանդիպումներին։ Նրանք շատ պատասխանատվություններ ունեն. բացի Աստվածաշնչի ուսումնասիրություններ անցկացնելուց և վերայցելություններ կատարելուց, ռահվիրաները նաև հոգ են տանում իրենց ընտանիքի անդամներին և աշխատում են։ Այդ պատճառով էլ պարտադիր չէ, որ նրանք ներկա լինեն բոլոր քարոզչական հանդիպումներին, հատկապես եթե դրանք անցկացվում են ամեն օր։ Այդուհանդերձ, հավանաբար հնարավոր կլինի, որ նրանք շաբաթվա մեջ գոնե մի քանի հանդիպումների ներկա լինեն։ Կարելի է ասել, որ քարոզչական հանդիպումների ժամանակ քարոզիչները կրթվում են, ուստի կարող են օգուտներ քաղել ռահվիրաների փորձից ու գիտելիքներից։ Շատ ժամանակ տրամադրելով քարոզչությանը՝ ռահվիրաները մեծ փորձ են ձեռք բերում, որը կարող են փոխանցել քարոզիչներին։ Ավելին, եռանդորեն ծառայելով և մասնակցելով քարոզչական հանդիպումներին՝ նրանք լավ օրինակ են մյուսների համար։ Իսկապես, նրանք մեծ գնահատանքի են արժանի։

10. Ինչո՞ւ պետք է բոլոր քարոզիչները ամբողջ սրտով մասնակցեն այս հանդիպումներին։

¹⁰ Ինչպես Հիսուսի ժամանակներում, այնպես էլ այսօր Թագավորության քարոզչության գործը իրականացվում է տնետուն ծառայության շնորհիվ։ Քարոզչական ծառայության հանդիպումների ժամանակ սովորում ենք արդյունավետորեն քարոզել և փոխադարձաբար քաջալերվում ենք։ Ուստի հնարավորության սահմաններում եկեք ամբողջ սրտով մասնակցենք այս հանդիպումներին (Գործ. 5։42; 20։20)։ Եթե այդպես վարվենք, կարող ենք վստահ լինել, որ Եհովան առատապես կօրհնի մեզ, իսկ մեր առաջնորդ Հիսուս Քրիստոսը կցնծա (Մատթ. 25։34–40; 28։19, 20)։