Հարցերի արկղ
◼ Ինչպե՞ս պետք է անցկացվեն քարոզչական ծառայության հանդիպումները։
Քարոզչական ծառայության հանդիպումը ժողովի հաստատուն միջոցառումներից մեկն է։ Այն պետք է կազմակերպված ու վայելուչ ձևով անցկացվի։ Հանդիպմանը ներկա գտնվողների վերաբերմունքն ու արտաքին տեսքը պետք է լինեն այնպիսին, ինչպես սովորաբար ժողովի մյուս հանդիպումների ժամանակ է։ Հանդիպումը պետք է սկսել ժամանակին նույնիսկ այն դեպքում, երբ գիտեք, որ դեռ էլի եկողներ կլինեն։ Հանդիպումն անցկացնելու համար նշանակված անհատը պետք է պատրաստ լինի որևէ գործնական նյութ փոխանցել ներկաներին, որն օգուտ կտա այդ օրվա ծառայությանը։ «Մեր թագավորական ծառայությունը» թերթիկը օգտակար տեղեկություններ և հրահանգներ է պարունակում սույն հանդիպման համար։
Հարկավոր չէ յուրաքանչյուր հանդիպման ընթացքում քննարկել օրվա խոսքը։ Դրան կարելի է անդրադառնալ և հակիրճ քննարկել միայն այն դեպքում, երբ տվյալ օրվա խոսքը քարոզչությանը վերաբերող քաջալերական մտքեր է պարունակում։ Հանդիպումը պետք է բավականին վաղ անցկացվի, որպեսզի հնարավոր լինի դրանից հետո ծրագրված ամբողջ ժամանակը ծառայությանը տրամադրել։ Այն պետք է տևի ընդամենը 10—15 րոպե, նույնիսկ՝ ավելի կարճ, եթե անցկացվում է ժողովի որևէ հանդիպումից հետո։ Պետք է հաշվի առնել նաև ռահվիրաների տվյալ օրվա պլանները, քանի որ, դաշտի ծառայության հանդիպումը ձգձգելով կամ ուշ սկսելով, հնարավոր է դժվարություններ առաջանան նրանց համար, ովքեր ճշգրտությամբ հետևում են իրենց գրաֆիկին։
Պետք է հոգ տանել, որպեսզի հանդիպմանը ներկա գտնվող ցանկացած անհատ այդ օրը քարոզելու տեղ ունենա։ Անշուշտ, ոմանք գուցե արդեն պլանավորել են կրկնակի այցելություններ կատարել կամ էլ Աստվածաշնչի ուսումնասիրություն անցկացնել. այդ դեպքում կարիք չկա նրանց նշանակել որևէ տարածքում քարոզելու համար։
Բոլոր ներկաները հանդիպման ընթացքում պետք է ուշադիր լինեն և համագործակցության ոգի ցուցաբերեն, մինչև որ քարոզչական խմբերը կազմվեն և հանդիպումն աղոթքով ավարտվի։ Նրանք, ովքեր նախօրոք արդեն հոգ են տարել, թե ում հետ պետք է համագործակցեն, կարող են հայտնել հանդիպումն անցկացնողին։ Քարոզչական խմբերին հատուկ նշանակումներ տալը պետք է կատարել հանդիպումն ավարտելուց առաջ, և ոչ թե ավտոկանգառում կամ հասարակական որևէ այլ վայրում։ Դաշտի ծառայության հանդիպումը պետք է աղոթքով ավարտվի։ Եթե բոլոր մասնակիցները հետևեն վերոհիշյալ հրահանգներին, մենք կարող ենք վստահ լինել, որ Եհովան մեծապես կօրհնի տվյալ օրվա մեր քարոզչությունը։