Քարոզչական ծառայության հանդիպումների վեհ նպատակը

1. Ո՞րն է քարոզչական հանդիպումների նպատակը։

¹ Մի անգամ նախքան իր 70 աշակերտներին քարոզչության ուղարկելը Հիսուսը նրանց հետ հանդիպում ունեցավ (Ղուկ. 10։1–11)։ Նա քաջալերեց նրանց՝ հիշեցնելով, որ մենակ չեն, և «հնձի Տերը»՝ Եհովան, կառաջնորդի իրենց։ Հիսուսը նաև նախապատրաստեց նրանց՝ հրահանգներ տալով։ Բացի այդ, նա կազմակերպեց նրանց՝ «երկու-երկու» ուղարկելով։ Այսօրվա քարոզչական հանդիպումներն ունեն այդ նույն վեհ նպատակը։ Դրանք մեզ քաջալերում, նախապատրաստում և կազմակերպում են։

2. Որքա՞ն պետք է տևի քարոզչական հանդիպումը։

² Ներկայումս քարոզչական հանդիպման տևողությունը 10–15 րոպե է, որի ժամանակ որոշվում է, թե ով ում հետ է համագործակցելու, որտեղ են ծառայելու, և վերջում աղոթք է ասվում։ Սակայն այժմ փոփոխություն է տեղի ունեցել։ Սկսած ապրիլից՝ այդ հանդիպումների տևողությունը կլինի 5–7 րոպե։ Իսկ եթե այդ հանդիպումը հաջորդում է ժողովի հանդիպմանը, ապա այն պետք է ավելի կարճ տևի, քանի որ ներկաներն արդեն վայելել են հոգևոր ծրագիրը։ Կարճ տևողությամբ քարոզչական հանդիպումները հնարավորություն են տալիս ավելի շատ ժամանակ տրամադրելու ծառայությանը։ Բացի այդ, այն ռահվիրաներն ու քարոզիչները, որոնք ծառայությունը կսկսեն նախքան հանդիպումը, իրենց ծառայությունը կընդհատեն կարճ ժամանակով։

3. Ինչպե՞ս պետք է կազմակերպել քարոզչական ծառայության հանդիպումները։

³ Քարոզչական ծառայության հանդիպումները պետք է այնպես կազմակերպել, որ քարոզիչները օգուտներ քաղեն դրանցից։ Շատ ժողովներում հարմար է առանձին խմբերով հանդիպումներ անցկացնել՝ բոլորով մեկ վայրում հավաքվելու փոխարեն։ Այդպես քարոզիչները հեշտությամբ կարող են գալ քարոզչական ծառայության հանդիպման վայր, իսկ հետո գնալ քարոզչական տարածք։ Նաև խմբի վերակացուներին հեշտ կլինի կազմակերպել քարոզիչներին և հոգ տանել իրենց խմբի անդամներին։ Երեցների խորհուրդը կարող է քննել իրենց ժողովի հանգամանքները և կայացնել լավագույն որոշումը քարոզիչների համար։ Նախքան հանդիպումը կարճ աղոթքով ավարտելը բոլորը պետք է իմանան, թե ում հետ և որտեղ են ծառայելու։

4. Ինչո՞ւ են քարոզչական ծառայության հանդիպումները նույնքան կարևոր, որքան ժողովի մյուս հանդիպումները։

⁴ Նույնքան կարևոր են, որքան ժողովի մյուս հանդիպումները։ Քանի որ քարոզչական ծառայության հանդիպումները կազմակերպվում են այն քարոզիչների համար, ովքեր ուզում են ծառայության գնալ, թերևս պարտադիր չէ, որ ամբողջ ժողովը ներկա լինի այդ հանդիպմանը։ Սակայն դա չի նշանակում, որ թեթևամտորեն պետք է վերաբերվել այդ հանդիպումներին կամ ժողովի մյուս հանդիպումներից պակաս կարևոր համարել։ Ինչպես ժողովի բոլոր հանդիպումները, այնպես էլ քարոզչական ծառայության հանդիպումները Եհովայի կողմից նախատեսված միջոցառում են, որոնք հնարավորություն են տալիս մեզ սիրո ու բարի գործերի մղելու միմյանց (Եբր. 10։24, 25)։ Հետևաբար, հանդիպումն անցկացնողը պետք է նախապես լավ պատրաստվի, որպեսզի քննարկումը պատիվ բերի Եհովային և օգուտ՝ ներկաներին։ Եթե չկա լուրջ խոչընդոտ, քարոզիչները պետք է հնարավորինս ջանքեր թափեն այդ հանդիպմանը ներկա լինելու համար։

5. ա) Ո՞րն է ծառայողական վերակացուի դերը քարոզչական ծառայության հանդիպումների հարցում։ բ) Ինչպե՞ս պետք է քույրը անցկացնի քարոզչական ծառայության հանդիպումը (տե՛ս «Երբ քույրն է անցկացնում» հոդվածը)։

⁵ Ինչպես կարող է նախապատրաստվել հանդիպումն անցկացնողը։ Որպեսզի եղբայրը լավ նախապատրաստվի քարոզչական ծառայության հանդիպմանը, նա պետք է այդ հանձնարարությունը նախապես ստանա, ինչպես որ ժողովի հանդիպումների հանձնարարություններն է ստանում։ Ինչ խոսք, երբ քարոզչական ծառայության խմբերը առանձին են հավաքվում, հանդիպումն անցկացնում են խմբի վերակացուները կամ նրանց օգնականները։ Սակայն եթե քարոզչական հանդիպումը նախատեսված է ամբողջ ժողովի համար, ծառայողական վերակացուն նախապես նշանակում է, թե ով է այն անցկացնելու։ Որոշ ծառայողական վերակացուներ գրաֆիկ են կազմում ու այն տալիս են բոլոր անցկացնողներին, իսկ պատճենը փակցնում են հայտարարությունների տախտակին։ Ծառայողական վերակացուն պետք է ողջամտություն դրսևորի անցկացնողներ նշանակելիս՝ ի մտի ունենալով, որ այս հանդիպումների արդյունավետությունը կախված է անցկացնողների ուսուցողական ու կազմակերպչական ունակություններից։ Եթե շաբաթվա որոշ օրերի քարոզչական ծառայության հանդիպումը չի կարող անցկացնել որևէ երեց, ծառայող օգնական կամ հմուտ մկրտված եղբայր, ապա ծառայողական վերակացուն պետք է նշանակի որևէ հմուտ մկրտված քրոջ (տե՛ս «Երբ քույրն է անցկացնում» հոդվածը)։

6. Ինչո՞ւ է կարևոր լավ նախապատրաստվել քարոզչական ծառայության հանդիպումն անցկացնելու համար։

⁶ Մենք լուրջ ենք վերաբերվում Աստվածապետական ծառայության դպրոցի կամ Ծառայողական հանդիպման մեր հանձնարարություններին և լավ նախապատրաստվում ենք։ Մենք չենք սկսում նախապատրաստվել ժողով գնալու ճանապարհին։ Նույն վերաբերմունքը պետք է ունենալ նաև քարոզչական ծառայության հանդիպումների հանդեպ։ Այժմ, երբ այդ հանդիպումներն ավելի կարճ են տևելու, առավել կարևոր է, որ անցկացնողը լավ նախապատրաստվի, որպեսզի քարոզչական հանդիպումը լինի բովանդակալից և ավարտվի ժամանակին։ Լավ նախապատրաստվել նաև նշանակում է նախապես հոգ տանել, որ քարոզիչները ունենան ծառայության տարածք։

7. Ի՞նչ կարող է անցկացնողը քննարկել։

⁷ Ինչ քննարկել։ Քանի որ տարածքից տարածք հանգամանքները տարբեր են, այդ պատճառով հավատարիմ և իմաստուն ծառան քարոզչական ծառայության հանդիպումների համար հատուկ ծրագիր չի կազմել։ «Քարոզչական ծառայության հանդիպման ժամանակ կարող ես քննարկել» շրջանակում կան առաջարկներ, թե ինչ կարելի է ընդգրկել։ Սովորաբար հանդիպումն անցկացվում է որպես քննարկում։ Թերևս կարելի է ընդգրկել լավ պատրաստած ցուցադրում կամ համապատասխան տեսանյութ jw.org վեբ կայքից։ Քարոզչական ծառայության հանդիպմանը նախապատրաստվելիս անցկացնողը պետք է մտածի, թե ինչը կքաջալերի և կօգնի նրանց, ովքեր գնալու են ծառայության։

8. Շաբաթ կամ կիրակի օրերին ի՞նչ կարելի է քննարկել քարոզչական ծառայության հանդիպումներին։

⁸ Սովորաբար շաբաթ օրերին քարոզիչները առաջարկում են «Դիտարան» և «Արթնացե՛ք» ամսագրերը։ Կան քարոզիչներ, ովքեր միայն շաբաթ օրերին են կարողանում մասնակցել ծառայությանը, ուստի գուցե դժվարանան հիշել իրենց ընտանեկան երկրպագության ժամանակ սովորած մատուցումները։ Հետևաբար, օգտակար կլինի, եթե անցկացնողը համառոտ քննարկի «Մեր թագավորական ծառայությունը» թերթիկի մատուցումները։ Կամ նա կարող է քննարկել, թե ինչպես ամսագրերի մատուցման մեջ ընդգրկել որևէ նորություն, իրադարձություն կամ տոն, կամ թե ինչպես վերայցելության հիմք նախապատրաստել, եթե բնակիչը վերցնում է ամսագիրը։ Եթե քարոզիչներից մեկը ծառայության ժամանակ առաջարկել է ամսագրերը, ապա անցկացնողը կարող է խնդրել նրան պատմել, թե ինչպես է նա դրանք առաջարկել, և ինչ քաջալերական դեպքեր են եղել։ Իսկ կիրակի օրերին կարելի է ներկայացնել, թե ինչպես առաջարկել ամսվա համար նախատեսված գրականությունը։ Ուսումնասիրության համար նախատեսված հրատարակությունները, օրինակ՝ «Բարի լուր» և «Լսիր Աստծուն» գրքույկները կամ «Աստվածաշունչը սովորեցնում է» գիրքը կարելի է առաջարկել շաբաթվա ցանկացած օր, ուստի անցկացնողը հակիրճ կարող է քննարկել, թե ինչպես առաջարկել այս հրատարակություններից որևէ մեկը։

9. Ի՞նչ կարելի է քննարկել շաբաթ-կիրակի օրերին, երբ ժողովը մասնակցում է քարոզարշավի։

⁹ Եթե շաբաթ-կիրակի օրերին ժողովը մասնակցում է հատուկ քարոզարշավի, անցկացնողը գուցե քննարկի, թե ինչպես կարելի է թերթիկի կամ հրավիրատոմսի հետ առաջարկել ընթացիկ ամսագրերը, կամ կարող է քննարկել, թե ինչ կարելի է անել, եթե անհատը հետաքրքրություն ցուցաբերի։ Կարելի է նաև պատմել այնպիսի դեպքեր, որոնք կընդգծեն նման քարոզարշավների կարևորությունը։

10, 11. Ի՞նչ կարող են անել քարոզիչները, որ քարոզչական ծառայության հանդիպումներն արդյունավետ անցնեն։

¹⁰ Ինչպես կարող են նախապատրաստվել քարոզիչները։ Քարոզիչները նույնպես մեծ դեր ունեն քարոզչական ծառայության հանդիպումների հարցում։ Եթե նրանք նախապես պատրաստվեն ծառայությանը, օրինակ, ընտանեկան երկրպագության ժամանակ, հետո կկարողանան հետաքրքիր մտքեր պատմել մյուսներին։ Նախապատրաստվել նշանակում է նաև համապատասխան գրականություն վերցնել նախքան քարոզչական ծառայության հանդիպման գալը և տարածք գնալ առանց անհարկի հետաձգման։

¹¹ Կարևոր է նաև ծրագրել մի քանի րոպե շուտ գալ հանդիպման։ Ինչ խոսք, մենք ջանք ենք թափում ժամանակին ներկա լինել բոլոր հանդիպումներին։ Սակայն եթե ուշացումով գանք քարոզչական ծառայության հանդիպման, ավելի շատ խնդիրներ կստեղծենք։ Ինչո՞ւ։ Առաջնորդություն վերցնող եղբայրը նախքան համագործակից նշանակելը մի շարք գործոններ է հաշվի առնում։ Եթե հանդիպմանը ներկա են քիչ թվով քարոզիչներ, ապա նա գուցե որոշի նրանց ուղարկել այնպիսի տարածք, որը մասամբ քարոզվել է։ Եթե քարոզիչներից ոմանք հանդիպման են եկել ոտքով, ծառայության տարածքն էլ հեռու է, ապա եղբայրը կարող է այս քարոզիչներին նշանակել նրանց հետ, ովքեր մեքենայով են եկել։ Եթե ծառայության տարածքը վտանգավոր թաղամասում է, ապա անցկացնողը եղբայրների կնշանակի ծառայելու քույրերի հետ կամ մոտակա տարածքում։ Առողջական խնդիրներ ունեցող քարոզիչներին թերևս նշանակի ծառայելու այնպիսի տարածքներում, որտեղ հիմնականում սեփական տներ են։ Նոր քարոզիչներին կնշանակի փորձառու քարոզիչների հետ։ Սակայն եթե քարոզիչներից որևէ մեկը ուշանա հանդիպումից, ապա անցկացնողը ստիպված կլինի վերանշանակելու քարոզիչներին։ Երբեմն գուցե հիմնավոր պատճառ ունենանք ուշանալու համար։ Բայց եթե ուշանալը սովորություն է դարձել, կարող ենք հարցնել ինքներս մեզ. «Արդյո՞ք նվազել է գնահատանքս քարոզչական ծառայության հանդիպումների հանդեպ, թե՞ ուշանում եմ իմ անկազմակերպվածության պատճառով»։

12. Եթե ինքդ ես կազմակերպում ծառայությունդ, ի՞նչ կարող ես հաշվի առնել։

¹² Նախքան քարոզչական հանդիպումը քարոզիչները գուցե իրենք պայմանավորվեն, թե ում հետ ծառայեն, կամ էլ որոշեն նախապես չպայմանավորվել։ Եթե ինքդ ես կազմակերպում ծառայությունդ, կարո՞ղ ես «ընդլայնել սիրտդ»՝ համագործակցելով տարբեր քարոզիչների հետ, որպեսզի ամեն անգամ չծառայես միևնույն անհատների հետ (2 Կորնթ. 6։11–13)։ Կարո՞ղ ես ժամանակ առ ժամանակ համագործակցել նոր քարոզիչների հետ՝ օգնելով նրանց բարելավելու իրենց ուսուցանելու հմտությունը (1 Կորնթ. 10։24; 1 Տիմոթ. 4։13, 15)։ Ուշադիր լսիր, թե ինչ հրահանգներ են տրվում քեզ, այդ թվում նաև, թե որտեղ պետք է քարոզես։ Հանդիպումն ավարտվելուց հետո մի՛ փոխիր նշանակումը և անմիջապես դուրս արի ծառայության։

13. Եթե բոլորը բարեխղճորեն համագործակցեն և անեն իրենցից պահանջվածը, ի՞նչ օգուտներ կստանան քարոզչական ծառայության հանդիպումներից։

¹³ Քարոզելուց հետո Հիսուսի 70 աշակերտները «ուրախությամբ վերադարձան» (Ղուկ. 10։17)։ Անկասկած, նախքան ծառայության գնալը Հիսուսի հետ հանդիպումը օգնեց նրանց հաջողության հասնելու։ Այսօր քարոզչական ծառայության հանդիպումները նույնպես կարող են մեծ օգուտներ տալ մեզ։ Եթե բարեխղճորեն համագործակցենք և անենք մեզանից պահանջվածը, քարոզչական ծառայության հանդիպումները կքաջալերեն, կպատրաստեն և կօգնեն մեզ կատարելու «բոլոր ազգերին վկայություն [տալու]» մեր հանձնարարությունը (Մատթ. 24։14)։