Լիարժեք օգուտներ քաղենք քարոզչական ծառայության հանդիպումներից

1. Ինչպե՞ս կարող են օգնել մեզ քարոզչական ծառայության հանդիպումները։

¹ Մենք մեծ քաջալերություն և գործնական խորհուրդներ ենք ստանում քարոզչական ծառայության հանդիպումների ժամանակ նախքան ծառայության գնալը։ Այդ հանդիպումները օգնում են մեզ մյուս քարոզիչների հետ մասնակցել վկայության գործին, որի արդյունքում մենք աջակցություն ենք ստանում և մարզվում ենք (Առակ. 27։17; Ժող. 4։9, 10)։ Ի՞նչ կարող ենք անել այդ հանդիպումներից լիարժեք օգուտներ քաղելու համար։

2. Որո՞նք են այն հարցերից մի քանիսը, որ հանդիպումն անցկացնողը կարող է քննարկել։

² Հանդիպումն անցկացնողը։ Սովորաբար հատուկ պատրաստված նյութ չի տրվում քարոզչական ծառայության հանդիպումների ժամանակ քննարկելու համար։ Հետևաբար, եթե քեզ հանձնարարված է այդպիսի հանդիպում անցկացնել, պետք է լավ նախապատրաստվես։ Հարկ չկա որպես կանոն քննարկել օրվա խոսքը, թեև կարող ես ընդգրկել այն քննարկման մեջ, եթե այնտեղ ուղղակիորեն խոսվում է ծառայության մասին։ Մտածիր, թե ինչ գործնական օգնություն կարող ես առաջարկել նրանց, ովքեր այդ օրը կմասնակցեն քարոզչությանը։ Օրինակ՝ դու կարող ես քննարկել կամ ցուցադրել մի մատուցում։ Գուցե նախընտրես ինչ–որ նյութ կրկնել «Ինչպես վարել Աստվածաշնչի թեմայով զրույցը» գրքույկից, «Ծառայության դպրոց» գրքից կամ մտքեր, որոնք ներկայացվել են վերջին Ծառայողական հանդիպումներից մեկի ժամանակ։ Որոշ հանդիպումների ժամանակ կարող ես քննարկել այն հարցը, թե ինչպես կարելի է հաղթահարել ձեր տարածքում ծառայության հետ կապված ինչ–որ խնդիր, կամ թե ինչպես կարելի է զարգացնել նկատված հետաքրքրությունը և Աստվածաշնչի ուսումնասիրություն սկսել, հատկապես այն դեպքում, երբ քարոզիչներից շատերն են պատրաստվում վերայցելություններ անել։ Անկախ նրանից, թե ինչ հարց կքննարկվի, ոգևորվածությամբ և դրականորեն արտահայտվիր։

3. Որքա՞ն պետք է տևի հանդիպումը, և ինչպե՞ս պետք է անցկացնել այն։

³ Հանդիպումը ժամանակին սկսիր, նույնիսկ եթե գիտես, որ ոմանք ավելի ուշ կգան։ Խորաթափանցություն դրսևորիր քարոզիչներին նշանակելիս և քարոզչական տարածքներ տուր նրանց, ովքեր ունեն դրա կարիքը։ Հանդիպումը պետք է տևի 10–15 րոպե և նույնիսկ ավելի կարճ, եթե այն անցկացվում է ժողովի հանդիպումից հետո։ Նախքան հանդիպման ավարտը բոլոր մասնակիցները պետք է տեղյակ լինեն, թե ում հետ են գնալու ծառայության։ Հանդիպումը պետք է ավարտել աղոթքով։

4. Ի՞նչը կօգնի բոլորին լիարժեք օգուտներ քաղել քարոզչական ծառայության հանդիպումներից։

⁴ Բոլորը կարող են օգնել։ Ինչպես ժողովի հանդիպումների պարագայում, մենք հարգանք ենք դրսևորում Եհովայի հանդեպ, ինչպես նաև մեր հոգատարությունն ենք ցույց տալիս մյուսների նկատմամբ, երբ ժամանակին ենք գալիս հանդիպմանը։ Մասնակցիր քննարկմանը։ Կարող ես թույլ տալ, որ հանդիպումն անցկացնողը նշանակի քեզ ինչ–որ մեկի հետ ծառայելու, կամ դու ինքդ կարող ես պայմանավորվել ինչ–որ մեկի հետ հանդիպումից առաջ։ Եթե նախընտրում ես անձամբ պայմանավորվել, ձգտիր «լայնա[նալ]»՝ ծառայելով տարբեր քարոզիչների հետ՝ ամեն անգամ մտերիմ ընկերներիդ հետ ծառայելու փոխարեն (Բ Կորնթ. 6։11–13)։ Հանդիպումն ավարտվելուց հետո մի փոխիր պլաններդ և անմիջապես գնա տարածք։

5. Ո՞րն է քարոզչական ծառայության հանդիպումների նպատակը։

⁵ Քարոզչական ծառայության հանդիպումներն անցկացվում են նույն նպատակով, ինչ որ ժողովի հանդիպումները։ Նրանք նախատեսված են այն բանի համար, որ մենք կարողանանք մղել միմյանց սիրո և բարի գործերի (Եբր. 10։24, 25)։ Եթե ձգտենք օգուտներ քաղել այս հանդիպումներից, դրանք մեծ օգնություն կլինեն մեզ համար մեր ծառայության մեջ, որն իսկապես «բարի գործ» է։