Վերայցելություններ կատարելով՝ Աստվածաշնչի ուսումնասիրություններ կսկսենք

1. Ինչո՞ւ է վերայցելություններ կատարելն այդքան կարևոր։

¹ Հիսուսն իր հետևորդներին պատվիրեց ոչ միայն քարոզել մարդկանց, այլ նաև նրանց ‘աշակերտ դարձնել.... ուսուցանել’ (Մատթ. 28։19, 20, ԷԹ)։ Քարոզիչը միայն քարոզում է, իսկ ուսուցիչը ավելին է անում։ Նա սովորեցնում է, բացատրում է և փաստեր է ներկայացնում։ Մարդկանց սովորեցնելու կերպերից մեկը հետաքրքրություն ցույց տվող անհատներին վերայցելելն է՝ Աստվածաշնչի ուսումնասիրություններ սկսելու նպատակ ունենալով։

2. Ո՞ւմ պետք է վերայցելել։

² Ո՞ւմ պետք է վերայցելել։ Պետք է վերայցելել բոլոր նրանց, ովքեր ընդունել են առաջարկված գրականությունը կամ նույնիսկ աննշան հետաքրքրություն են ցույց տվել բարի լուրի հանդեպ։ Երբ որևէ մեկը հետաքրքրություն է ցույց տալիս հասարակական վայրում, փորձիր իմանալ նրա հասցեն կամ հեռախոսահամարը, որպեսզի հնարավոր լինի զարգացնել նրա հետաքրքրությունը։ Լավատես եղիր ուսումնասիրություններ սկսելու հարցում։ Շարունակիր փնտրել այնպիսի մարդկանց, ովքեր կընդունեն Աստվածաշնչի ուսումնասիրություն սկսելու առաջարկդ։ Դու հավանաբար կգտնես այդպիսի անհատների (Մատթ. 10։11)։

3, 4. Ի՞նչ է մտնում արդյունավետ վերայցելություններ կատարելու մեջ։

³ Անհատական հետաքրքրություն ցույց տուր։ Արդյունավետ վերայցելություն կատարելու համար նախապատրաստվելը սկսվում է հենց առաջին այցելությունից։ Վերայցելություններ կատարելիս հաջողության է հասնում այն քարոզիչը, որը գրի է առնում, թե ինչ է հետաքրքրում տանտիրոջը և հետագա քննարկումների ժամանակ հիմնվում է դրանց վրա։ Ոմանք օգտավետ են համարում այցելության վերջում որևէ բաց հարց թողնելը, որպեսզի զրուցակցի մեջ հետաքրքրություն առաջացնեն հաջորդ այցելության նկատմամբ։ Մարդկանց հանդեպ մեր անկեղծ հետաքրքրությունը մղում է մեզ շարունակելու մտածել նրանց մասին, նույնիսկ երբ հեռանում ենք նրանցից, և առանց հետաձգելու կրկին այցելել նրանց։ Վերայցելությունները կատարիր հնարավորին չափ շուտ, քանի դեռ մարդկանց հետաքրքրությունը թարմ է։ Կարելի է այցելել նույնիսկ մեկ կամ երկու օրից։

⁴ Վերայցելություն կատարելիս փորձիր զրույցդ հիմնել նախորդ քննարկման վրա։ Նպատակ դիր ամեն այցելության ժամանակ առնվազն մեկ ոգևորիչ սուրբգրային միտք հաղորդել, նաև պատրաստ եղիր լսելու։ Փորձիր ավելի լավ ճանաչել տանտիրոջը։ Ապա հետագա այցելությունների ժամանակ պատմիր նրան Աստծո Խոսքում արձանագրված այն ճշմարտությունները, որոնք անմիջականորեն առնչվում են նրա մտահոգություններին։

5. Ի՞նչ պարզ մեթոդ կարող ենք կիրառել Աստվածաշնչի ուսումնասիրություն սկսելու համար։

⁵ Ուշադիր եղիր, որպեսզի օգտվես Աստվածաշնչի ուսումնասիրություն սկսելու հնարավորություններից։ Վերայցելություններ կատարելիս նպատակ դիր քո առջև Աստվածաշնչի ուսումնասիրություն սկսելու։ Ինչպե՞ս կարելի է անել դա։ Հայտնիր, որ ցանկանում ես մի հետաքրքիր միտք հաղորդել, և բաց արա «Գիտություն» գրքում կամ «Աստված պահանջում է» գրքույկում մի պարբերություն, որը, քո կարծիքով, կհետաքրքրի նրան։ Կարդա պարբերությունը, քննարկիր հարցը և մեկ կամ երկու սուրբգրային համար։ Դա կարելի է անել նույնիսկ դռան մոտ կանգնած հինգ–​տաս րոպեի ընթացքում։ Զրույցդ եզրափակիր հաջորդ հարցով և պայմանավորվիր մեկ այլ այցելության ժամանակ շարունակել քննարկումը։

6. Ինչպե՞ս կարող ենք ցույց տալ, որ գիտակցում ենք կրկնակի այցելություններ կատարելու կարևորությունը։

⁶ Ցույց տրված ցանկացած հետաքրքրություն զարգացնելը կարևոր մաս է մեր ծառայության մեջ։ Ուստի շաբաթական քո գրաֆիկում ժամանակ հատկացրու կրկնակի այցելություններին։ Դա կբարձրացնի ծառայությանդ որակը և իսկական ուրախություն կպարգևի քեզ։