Օգնենք նրանց, ովքեր ճիշտ տրամադրվածություն ունեն
1 Յուրաքանչյուր անհատ ունի տրամադրվածություն, որն արմատավորված է նրա փոխաբերական սրտում (Մատթ. 12։35)։ Աստվածաշնչում նշվում է այնպիսի անհատի մասին, որի ‘սրտում կռիվ կա’ (Սաղ. 55։21)։ Ոմանք էլ «ցասկոտ» անձնավորություն են (Առակ. 29։22)։ Բայց կան նաև մարդիկ, որոնք ճիշտ են տրամադրված «դէպի յաւիտենական կեանքը» (Գործք 13։48)։ Մեր օրերում Եհովան հավաքում է ճիշտ տրամադրվածություն ունեցող այդպիսի անհատների (Անգէ 2։7)։ Ինչպե՞ս կարող ենք օգնել նրանց դառնալ Եհովայի երկրպագուներ։
2 Բարեխղճորեն կատարիր վերայցելություններդ։ Կրկնակի այցելությունների նկատմամբ ճիշտ տեսակետ ունենալը կարևոր է աշակերտներ պատրաստելու մեր հանձնարարությունը կատարելու համար (Մատթ. 28։19, 20)։ Ջանո՞ւմ ենք արդյոք շուտով վերադառնալ, որպեսզի զարգացնենք մարդկանց ցույց տված հետաքրքրությունը։ Վերայցելո՞ւմ ենք բոլոր նրանց, ովքեր գրականություն են վերցնում կամ հետաքրքրություն են ցույց տալիս բարի լուրի հանդեպ։ Շարունակ ջանքեր գործադրո՞ւմ ենք, որպեսզի օգնենք նրանց աճել հոգևորապես։ Քանի որ մեր կատարած գործից մարդկանց կյանքն է կախված, մենք պետք է ձգտենք զարգացնել ցանկացած հետաքրքրություն, որ նկատում ենք նրանց մոտ։
3 Քանի դեռ հետաքրքրություն ցույց տված մարդկանց հետ ունեցած զրույցը թարմ է մտքումդ, գրի առ նրա անունն ու հասցեն։ Նշիր քննարկված թեման, այն սուրբգրային համարը, որ կարդացել ես, և տրված գրականությունը։ Ապա նպատակ դիր կրկին այցելել այդ անհատին հնարավորին չափ շուտ։
4 Ինչպես վերայցելություններ կատարել։ Արդյունավետ վերայցելություններին նպաստում են ջերմ ու բարյացակամ վերաբերմունքը, ինչպես նաև տանտիրոջ հանդեպ անկեղծ հետաքրքրություն ցույց տալը։ Խոսիր պարզ և Աստվածաշնչի վրա հիմնված թեմայի շուրջ։ Քննարկման համար Աստվածաշնչի մի հետաքրքիր թեմա պատրաստիր և այցելության վերջում առաջ քաշիր մի հարց, որին կարող ես պատասխանել հաջորդ անգամ։ Լավ կլինի խուսափել անհարկի վիճաբանություններից՝ կապված զրուցակցի հայացքների հետ, որոնք հակասում են Աստվածաշնչին։ Աշխատիր զրույցդ հիմնել այնպիսի հարցերի վրա, որոնց երկուսդ էլ համաձայն եք (Կող. 4։6)։
5 Կրկնակի այցելություններ կատարելու համար ջանքեր են հարկավոր, սակայն արդյունքները բավականություն են պատճառում։ Ճապոնիայում բնակվող մի ռահվիրա նպատակ դրեց ամեն ամիս ավելացնել կրկնակի այցելությունների քանակը։ Նա սկսեց գրառումներ անել տնետուն ծառայության ժամանակ հանդիպած յուրաքանչյուր անհատի վերաբերյալ, այնուհետև յոթ օրվա ընթացքում նորից այցելել նրանց։ Նա մանրակրկիտորեն պատրաստվում էր, թե ինչ պետք է ասեր, և ծառայության ժամանակ լիակատար վստահություն էր դրսևորում իր հաղորդած պատգամի հանդեպ։ Այցելություններից մեկի ժամանակ նրան հաջողվեց ուսումնասիրություն սկսել մի անձնավորության հետ, որն ասել էր. «Ես միշտ մերժել եմ ձեզ։ Առաջին անգամն է, որ լսում եմ ձեզ»։ Ռահվիրայի կողմից սիրով ցույց տրված հաստատակամությունը լավ արդյունքներ ունեցավ։ Ամսվա վերջում նա իր հաշվետվության մեջ Աստվածաշնչի տասը ուսումնասիրություն գրանցեց։
6 Մարդկանց հանգամանքները մշտապես փոխվում են (Ա Կորնթ. 7։31)։ Հաճախ անհատին իր տանը գտնելու համար պետք է մի քանի անգամ այցելել։ Բարեխղճորեն վերայցելություններ կատարելով՝ մենք կարող ենք օգնել այն անհատներին, ովքեր ճիշտ տրամադրվածություն ունեն, կանգնելու հավիտենական կյանքի առաջնորդող ուղու վրա (Մատթ. 7։13, 14)։
[Հարցեր ուսումնասիրության համար]
1. Ո՞ւմ է Եհովան հավաքում այսօր։
2. Ի՞նչն է կախված աշակերտներ պատրաստելու մեր հանձնարարությունից։
3. Ի՞նչ պետք է անենք ծառայության ժամանակ ինչ–որ մեկի հետ զրուցելուց հետո։
4. Ինչպե՞ս կարող ենք արդյունավետ վերայցելություններ կատարել։
5. Ինչպիսի՞ ջանքեր գործադրեց մի ռահվիրա և ի՞նչ արդյունքների հասավ։
6. Ինչո՞ւ պետք է հաստատակամորեն վերայցելություններ կատարենք։