Ռահվիրայական ծառայությունից ստացած օրհնությունները

¹ «Ես գիտեմ, որ ուրիշ ոչ մի գործ չի կարող ինձ բավականության այնպիսի զգացում պատճառել, ինչպես մարդկանց ճշմարտության մասին պատմելը»,— ասում է մի ռահվիրա։ Մեկ ուրիշն էլ ասում է. «Ամեն օրվա վերջում ես քաղցր քուն եմ մտնում, իսկ սիրտս լցված է լինում ուրախությամբ»։ Այս ռահվիրաները խոսում են ամենուրեք ծառայող եղբայրների ու քույրերի անունից, ովքեր ճաշակել են ռահվիրայական ծառայությունից ստացած օրհնությունները (Առակ. 10։22)։

² Աստծո Խոսքի՝ կյանքեր փրկող գիտությունն ընդունելու հարցում մարդկանց օգնելը իսկական բավարարվածություն է պատճառում (Գործք 20։35; Ա Թեսաղ. 2։19, 20)։ «Իսկապես ոգևորում և հավատն ամրացնում է տեսնելը, թե ինչպես է Աստծո զորավոր Խոսքը մղում մարդկանց փոխել իրենց կյանքը»,— գրում է երկար ժամանակ ռահվիրա ծառայած մի եղբայր։ Այո՛, մարդկանց օգնելու և Աստվածաշնչի ուսումնասիրություններ անցկացնելու գործին իրենց նվիրելով՝ ռահվիրաներն այդպիսի օրհնություններ են վայելում։

³ Ապավինենք Եհովային։ Ամեն օր ծառայության մեջ Եհովայի ոգուն ապավինելն օգնում է ռահվիրաներին «հոգու պտուղն» իրենց մեջ զարգացնել, նաև նրանց համար պաշտպանություն է լինում (Գաղ. 5։16, 22, 23)։ Բացի այդ, միշտ Աստծո Խոսքը ձեռքի տակ ունենալով՝ նրանք հաճախ հմտորեն գործածում են Գրությունները՝ ճշմարտությունը պաշտպանելու և ուրիշներին զորացնելու համար (Բ Տիմոթ. 2։15)։ Մի եղբայր, որը տասնյակ տարիներ ռահվիրայական ծառայության մեջ է եղել, ասում է. «Ռահվիրայությունն օգնել է ինձ Աստվածաշնչի խորը գիտելիքներ ձեռք բերել. գիտելիքներ, որ գործածել եմ օգնելու համար շատերին ճանաչել Եհովային ու նրա նպատակները»։ Ինչպիսի՜ բավականություն...

⁴ Ընդհանուր ռահվիրաները բազմաթիվ ուրիշ կերպերով էլ պետք է ապավինեն Եհովային։ Նրանց հավատն ամրանում է, երբ տեսնում են, թե ինչպես է Եհովան օրհնում իրենց նյութական կարիքները հոգալու համար գործադրված ջանքերը։ 72–ամյա մի եղբայր, որը 55 տարի ծառայել է որպես ընդհանուր ռահվիրա, ասում է. «Եհովան ինձ երբեք հուսախաբ չի արել»։ Դեռ ավելին, պարզ կյանք վարելով՝ ռահվիրաներն իրենց պաշտպանում են կյանքի շատ անհանգստություններից։ Արդյոք դա քեզ չի՞ գրավում (Մատթ. 6։22; Եբր. 13։5, 6)։

⁵ Մոտենանք Աստծուն։ Եհովայի հետ փոխհարաբերությունները մեր ամենաթանկարժեք ունեցվածքն է (Սաղ. 63։3)։ Երբ, Եհովայի հանդեպ սիրուց մղված, լիարժեքորեն մասնակցում ենք ծառայությանը, ավելի ենք մտերմանում նրա հետ (Յակ. 4։8)։ Մի եղբայր, որը 18 տարի ծառայել է որպես ռահվիրա, ասում է. «Ռահվիրայական ծառայությունը թույլ է տալիս մեզ ‘ճաշակել և տեսնել, որ Եհովան քաղցր է’, օր–​օրի ավելի ամրացնել մեր Արարչի հետ հարաբերությունները» (Սաղ. 34։8)։

⁶ Ռահվիրայության համար հարկ եղած հանգամանքներն ունենալուց բացի՝ ռահվիրաները պետք է ամուր հավատ ունենան, Աստծո և դրացու հանդեպ սեր, ինչպես նաև զոհողությունների գնալու պատրաստակամություն (Մատթ. 16։24; 17։19; 22։37–39)։ Սակայն, ինչպես երևում է ամենուրեք ծառայող ռահվիրաների փայլող դեմքերից, այդ ծառայության բերած օրհնությունները գերազանցում են նրանց կատարած զոհողությունները (Մաղ. 3։10)։ Այդ օրհնությունները միայն ռահվիրաները չէ, որ ստանում են. ռահվիրաների ցուցաբերած հիանալի ոգուց մեծ օգուտներ են քաղում նրանց ընտանիքները և ժողովը (Փիլիպ. 4։23)։

[Հարցեր ուսումնասիրության համար]

1, 2. Ի՞նչ օրհնություններ է բերում ռահվիրայական ծառայությունը և ինչո՞ւ։

3, 4. Ինչպե՞ս է ռահվիրայությունը սովորեցնում քարոզչին ապավինել Եհովային, և ինչպե՞ս է դա օգնում նրան աճել հոգևորապես։

5. Ինչպե՞ս է ռահվիրայությունն օգնում քարոզչին մոտենալ Եհովային։

6. Ի՞նչ պետք է ունենան ռահվիրաները, և իրենցից բացի՝ ուրիշ ովքե՞ր են օգուտներ քաղում։