Հատուկ քարոզարշավ նոր գրքույկը տարածելու համար
1 Շատերին այսօր մտահոգում են աշխարհում տիրող վիճակները, բայց քչերը գիտեն, թե ինչու են այդպիսի իրավիճակներ տիրում, ինչ է սպասում ապագայում և թե ինչ է հարկավոր անել գալիք դատաստանից վերապրելու համար (Եզեկ. 9։4)։ Որպեսզի օգնենք այդ մարդկանց «արթնանալ» և հասկանալ մեր օրերի նշանակությունը, «Արթո՛ւն կացեք» գրքույկի օգնությամբ հատուկ քարոզարշավ է անցկացվելու ամբողջ աշխարհով մեկ հոկտեմբերի 18–ից (երկուշաբթի) մինչև նոյեմբերի 14–ը (կիրակի)։
2 «Արթո՛ւն կացեք» գրքույկը կարելի է առաջարկել տնետուն ծառայության ժամանակ, վերայցելություններ կատարելիս, ոչ պաշտոնական վկայություն տալիս կամ հասարակական վայրերում քարոզելիս։ Սակայն գրքույկը չպետք է բաժանել անխտիր բոլորին, այլ այն պետք է տալ միայն նրանց, ում կհետաքրքրի այն հարցը, թե ինչ է հայտնում Աստվածաշունչը աշխարհում տեղի ունեցող իրադարձությունների մասին։ Իսկ նրանց, ովքեր քիչ հետաքրքրություն ցույց կտան, գրքույկի փոխարեն կարելի է թերթիկ առաջարկել։
3 Կարող ես անհատի ուշադրությունը գրավել՝ հարցնելով.
«Շատերին են մտահոգում այն լուրջ խնդիրները և ցնցող իրադարձությունները, որ սովորական բան են դարձել այսօր։ [Մի օրինակ բեր ձեր տեղանքից։] Գիտեի՞ք, որ Աստվածաշնչում դեռ վաղուց է նախագուշակվել, որ այդպիսի բաներ են տեղի ունենալու։ [Թույլ տուր պատասխանել։ Ապա կարդա բերված օրինակին համապատասխան սուրբգրային ինչ–որ համար, օրինակ՝ Մատթէոս 24։3, 7, 8, Ղուկաս 21։7, 10, 11 կամ Բ Տիմոթէոս 3։1–5 համարները։] Աստվածաշունչը բացատրում է, թե ինչու ենք այսպիսի ժամանակներում ապրում, ինչպես նաև հայտնում է, թե ինչ է սպասում մարդկությանը ապագայում։ Կցանկանայի՞ք ավելի շատ բան իմանալ այս մասին։ [Թույլ տուր պատասխանել։ Առաջարկիր գրքույկը, եթե անհատը անկեղծ հետաքրքրություն է ցույց տալիս։] Այս գրքույկը անվճար է, սակայն եթե ցանկանաք փոքրիկ նվիրատվություն անել մեր համաշխարհային գործի համար, մենք սիրով կընդունենք»։
4 Կամ գուցե այս մատուցումը արդյունավետ լինի քեզ համար.
«Շատերին այսօր ընկճում են աշխարհում տեղի ունեցող ցնցող իրադարձությունները կամ անձնական ողբերգությունները։ Ոմանք մտածում են, թե ինչո՛ւ Աստված չի միջամտում, որ այդպիսի բաներ տեղի չունենան։ Աստվածաշունչը հավաստիացնում է մեզ, որ Աստված շուտով գործի կանցնի, որպեսզի վերջ դնի մարդկանց տառապանքին։ Տեսեք, թե ինչ օրհնություններ է Աստված բերելու մարդկությանը։ [Կարդա՛ Սաղմոս 37։10, 11–ը։] Կցանկանայի՞ք ավելի շատ բան իմանալ այդ մասին»։ Զրույցդ եզրափակիր այնպես, ինչպես առաջարկվում է նախորդ մատուցման մեջ։
5 Ձգտիր իմանալ յուրաքանչյուր անհատի անունն ու հասցեն, ով վերցնում է գրքույկը, և միջոցներ ձեռնարկիր՝ զարգացնելու ցույց տրված հետաքրքրությունը։ «Մեր թագավորական ծառայությունը» թերթիկի 2004 թ. նոյեմբերի համարում կտպագրվեն խորհուրդներ, թե ինչպես կարելի է դա անել։ Եթե անհատը անկեղծ հետաքրքրություն է ցույց տալիս առաջին այցելության ժամանակ, կարող ես անմիջապես Աստվածաշնչի ուսումնասիրություն սկսել՝ գործածելով կա՛մ «Արթո՛ւն կացեք» գրքույկը, կա՛մ մեկ այլ հրատարակություն, ինչպես օրինակ՝ «Աստված պահանջում է» գրքույկը։
6 Նոր գրքույկի օրինակներ կարելի է վերցնել Ծառայողական հանդիպումից հետո՝ այն օրը, երբ քննարկվի այս հոդվածը։ Խորհուրդ է տրվում քարոզիչներին և ռահվիրաներին, որ առաջին անգամ այնքան գրքույկ վերցնեն, որքան անհրաժեշտ կլինի իրենց քարոզարշավի առաջին մի քանի օրերին։ Թող որ Եհովան օրհնի այս հատուկ գործունեությունը, որ այն փառք բերի իրեն և օգուտներ տա անկեղծ սիրտ ունեցող անհատներին ամենուրեք (Սաղ. 90։17)։