Ինչպես գործածել տրված մատուցումները
1. Ո՞րն է տպագրվող մատուցումների նպատակը։
1 «Մեր թագավորական ծառայությունը» թերթիկում կանոնավորաբար տպագրվում են մատուցումներ մեր պարբերագրերն ու մյուս հրատարակությունները առաջարկելու համար։ Ծառայության ժամանակ կարիք չկա այդ մատուցումները բառ առ բառ կրկնել։ Դրանք տրվում են, որպեսզի ընդհանուր պատկերացում կազմենք, թե ինչ կարող ենք ասել։ Մեր ծառայությունն ավելի արդյունավետ կկատարենք, եթե մատուցումները ներկայացնենք սեփական բառերով։ Բնական խոսելով՝ կօգնես զրուցակցիդ չլարվել, իսկ խոսքդ կհնչի անկեղծությամբ ու համոզվածությամբ (Բ Կորնթ. 2։17; Ա Թեսաղ. 1։5, ՆԱ)։
2. Մատուցումներ պատրաստելիս ինչո՞ւ պետք է հաշվի առնենք տեղի սովորությունները։
2 Փոփոխիր մատուցումդ։ Տեղի սովորությունները մեծ ազդեցություն ունեն այն բանի վրա, թե ինչպես ենք մատուցում բարի լուրը։ Կարո՞ղ ես տանտիրոջը նախ ողջույնի խոսքեր ուղղել և ապա մատուցումը ներկայացնել, թե՞ քո տարածքում ապրող մարդիկ ակնկալում են, որ ասելիքդ միանգամից հայտնես։ Դա կախված է վայրից, իսկ երբեմն նույնիսկ անձնավորությունից։ Խորաթափանցություն է հարկավոր նաև որոշելու համար, թե ինչ հարցեր տալ։ Միևնույն հարցը մի վայրում կարող է տեղին լինել, սակայն մեկ ուրիշում՝ անհարմար։ Ուստի անհրաժեշտ է խորաթափանցություն դրսևորել ու մատուցումները հարմարեցնել տվյալ վայրում ապրող մարդկանց։
3. Ինչո՞ւ է հարկավոր հաշվի առնել մարդկանց ծագումն ու մտածելակերպը։
3 Ծառայությանը նախապատրաստվելիս հարկավոր է հաշվի առնել նաև մեր քարոզչական տարածքում ապրող մարդկանց ծագումն ու մտածելակերպը։ Օրինակ՝ Մատթէոս 6։9, 10 համարները, որտեղ արձանագրված է «Հայր մեր» աղոթքը, կրոնասեր անհատի հետ հավանաբար կքննարկեիր ոչ այնպես, ինչպես այդ աղոթքին անծանոթ անհատի հետ։ Մի փոքր հեռատեսություն դրսևորելով՝ հաճախ կարող ենք մեր մատուցումները թեթևակի ձևափոխել՝ դրանք ավելի գրավիչ դարձնելով ծառայության ժամանակ հանդիպող մարդկանց համար (Ա Կորնթ. 9։20–23)։
4. Ինչո՞ւ է լավ նախապատրաստվելը կարևոր։
4 Նույնիսկ եթե ցանկանում ենք մատուցումները գործածել գրեթե այնպես, ինչպես գրված են, միևնույն է, լավ նախապատրաստվելուն ոչինչ չի փոխարինի։ Հարկավոր է ուշադրությամբ ընթերցել այն հոդվածը կամ գլուխը, որն ուզում ենք ներկայացնել անհատի ուշադրությանը, ու գտնել այն մտքերը, որոնք կշարժեն նրա հետաքրքրությունը։ Այնուհետև դրանք կարող ենք ընդգրկել մեր մատուցման մեջ։ Մեր սքանչելի հրատարակությունները կկարողանանք խանդավառությամբ առաջարկել միայն այն դեպքում, եթե քաջածանոթ լինենք դրանց։
5. Ինչո՞ւ գուցե հարկ լինի տարբեր մատուցումներ նախապատրաստել, և ինչպե՞ս կարող ենք դա անել։
5 Մատուցելու այլ ձևեր։ Արդյոք պե՞տք է սահմանափակվենք միայն տպագրված մատուցումներով։ Ոչ։ Եթե քեզ ավելի հարմար է մատուցման մեջ ինչ–որ բան փոխել կամ աստվածաշնչյան այլ համար գործածել, կարող ես այդպես վարվել։ Հատկապես պարբերագրերի դեպքում, եթե կան ոչ ներածական այնպիսի հոդվածներ, որոնք կարող են հետաքրքրել քո տարածքում ապրող մարդկանց, ձգտիր դրանք ներկայացնել։ Ծառայողական հանդիպումների ժամանակ ցուցադրվող մատուցումներում գուցե հարկ լինի փոփոխություններ մտցնել, որպեսզի դրանք գործնական լինեն ձեր բնակավայրում։ Դա բոլորին կօգնի բարի լուրը արդյունավետորեն ներկայացնել։