Օգնենք մարդկանց օգուտներ քաղել փրկանքից

Քրիստոսի մահվան Հիշատակի երեկոն կանցկացվի ապրիլի 12–ին

1. Ինչպե՞ս կարող են Աստծու ծառաները ցույց տալ իրենց երախտագիտությունը փրկանքի հանդեպ։

¹ «Շնորհակալութիւն Աստուծուն նորա անպատմելի պարգեւի համար» (Բ Կորնթ. 9։15)։ Այս խոսքերը հստակ ցույց են տալիս, թե ինչ զգացումներ է մեր մեջ արթնացնում այն սիրառատ բարությունը, որ Աստված ցուցաբերում է իր ծառաների նկատմամբ իր Որդու՝ Հիսուս Քրիստոսի փրկանքի միջոցով։ Մեր երախտագիտությունը հատկապես ակնհայտ կլինի ապրիլի 12–ին, երբ միասին ներկա լինենք Հիսուս Քրիստոսի մահվան Հիշատակի երեկոյին։

2. Եհովայի վկաների հետ միասին ովքե՞ր են ներկա գտնվում Հիշատակի երեկոյին, և ի՞նչ պետք է նրանք անեն փրկանքից օգուտներ քաղելու համար։

² Ամեն տարի Եհովայի վկաների հետ միասին մոտ տասը միլիոն անհատներ ներկա են լինում Հիշատակի երեկոյին։ Այսպես վարվելով՝ նրանք ցույց են տալիս իրենց երախտագիտությունը Հիսուսի զոհաբերության նկատմամբ։ Սակայն այդ զոհաբերությունից օգուտներ քաղելու համար նրանք պետք է հավատ դրսևորեն փրկանքի հանդեպ (Յովհ. 3։16, 36)։ Ինչպե՞ս կարող ենք օգնել նրանց այդպիսի հավատ զարգացնել։ Հիշատակի երեկոյին նախորդող և հաջորդող շրջանում մենք կարող ենք քաջալերել նրանց անձամբ ուսումնասիրել Աստվածաշունչը և հաճախել ժողովի հանդիպումներին։ Քննարկենք հետևյալ առաջարկները։    

3. Ինչպե՞ս կարող ենք Աստվածաշնչի ուսումնասիրություն սկսել նրանց հետ, ում հրավիրում ենք Հիշատակի երեկոյին։

³ Աստվածաշնչի ուսումնասիրություններ։ Երբ հետաքրքրվող անհատներին հրավիրում ես Հիշատակի երեկոյին, փորձիր նրանց հետ Աստվածաշնչի ուսումնասիրություն սկսել «Աստվածաշունչը սովորեցնում է» գրքի օգնությամբ։ Կարող ես բացատրել անհատին Հիշատակի երեկոյի արարողության նշանակությունը՝ օգտվելով «Տիրոջ ընթրիք. հիշարժան օր, որը պատիվ է բերում Աստծուն» թեմայից, որը գտնվում է 206–208-րդ էջերում։ Գուցե կարողանաս քննարկել այդ թեման մեկ–​երկու այցելությունների ընթացքում, հենց տան դռան առաջ, ինչպես կանցկացնեիր Աստվածաշնչի ուսումնասիրությունը։ Այդ նյութի քննարկումը ավարտելուց հետո անհատը գուցե ցանկանա ուսումնասիրել 5–րդ գլուխը՝ «Փրկանք. Աստծու մեծագույն նվերը»։ Երբ սկսում ես Աստվածաշնչի ուսումնասիրությունը կանոնավորաբար անցկացնել, այցելիր և քննարկիր գրքի առաջին չորս գլուխները։

4. Հիշատակի երեկոյին նախորդող և հաջորդող շրջանում ո՞ւմ հետ կարող ենք Աստվածաշնչի ուսումնասիրություն սկսել։

⁴ Ո՞ւմ հետ կարող ենք Աստվածաշնչի ուսումնասիրություն սկսել՝ օգտագործելով վերոհիշյալ մոտեցումը։ Հավանաբար քո գործընկերներից, դասընկերներից կամ հարևաններից ոմանք կհամաձայնվեն ուսումնասիրել։ Եղբայրները կարող են ուսումնասիրություն առաջարկել այն քույրերի ամուսիններին, որոնք չեն ընդունում նրանց հավատը։ Մի մոռացիր նաև ուսումնասիրություն առաջարկել քո այն հարազատներին, որոնք Վկաներ չեն։ Բացի այդ, մենք հատուկ ջանքեր կներդնենք, որպեսզի հրավիրենք Հիշատակի երեկոյին նրանց, ովքեր մի ժամանակ ակտիվորեն համագործակցել են ժողովի հետ (Ղուկ. 15։3–7)։ Եկեք ամեն ջանք գործադրենք օգնելու համար բոլոր այդ անհատներին օգուտներ քաղել փրկանքից։

5. Ինչպե՞ս կարող ենք հորդորել Աստվածաշունչ ուսումնասիրողներին և այլ հետաքրքրվող անհատների հաճախելու ժողովի հանդիպումներին։

⁵ Ժողովի հանդիպումները։ Առաջին հանդիպումը, որին ներկա են գտնվում Աստվածաշունչ ուսումնասիրող բազմաթիվ մարդիկ և ուրիշ հետաքրքրվող անհատներ, Հիշատակի երեկոն է։ Ուստի ինչպե՞ս կարող ենք հորդորել նրանց հաճախելու ժողովի մյուս հանդիպումներին։ «Մեր թագավորական ծառայությունը թերթիկի» 2005 թ. ապրիլի համարի 8–րդ էջում հետևյալ խորհուրդներն են տրվում. «Հիշատակիր հաջորդ հանրային ելույթի վերնագիրը։ Ցույց տուր, թե ինչ նյութեր են քննարկվելու «Դիտարանի» ուսումնասիրությանը և ժողովի Գրքի ուսումնասիրությանը։ Պատմիր, թե ինչպես է անցկացվում Աստվածապետական ծառայության դպրոցը և Ծառայողական հանդիպումը։ Երբ Դպրոցում հանձնարարություն ունենաս, կարող ես նրանց հետ կրկնել թեման։ Պատմիր ուշագրավ մտքեր, որ ներկայացվել են հանդիպումների ժամանակ։ Օգտըվելով մեր հրատարակություններում տեղ գտած նկարներից՝ օգնիր նրանց հասկանալ, թե հանդիպումներին ինչ է տեղի ունենում։ Առաջին իսկ ուսումնասիրությունից նրանց հրավիրիր ժողովի հանդիպումներին»։

6. Ո՞ր երկու կերպերով կարող ենք օգնել անկեղծ սրտով անհատներին օգուտներ քաղել փրկանքից։

⁶ Երբ անկեղծ սրտով անհատները կանոնավորաբար Աստվածաշունչ են ուսումնասիրում և հաճախում են ժողովի հանդիպումներին, նրանք ավելի արագ են հոգևորապես առաջադիմում։ Եկե՛ք հորդորենք մարդկանց օգուտներ քաղել այս հոգևոր միջոցառումներից, ինչպես նաև Աստծու մեծագույն պարգևից՝ փրկանքից։