Եկեք ցույց տանք մեր երախտագիտությունը Հիշատակի երեկոն անցկացվելու է ապրիլի 17-ին
1. Սաղմոսերգուի նման՝ ի՞նչ զգացումներ պետք է ունենանք Հիշատակի երեկոյի և դրան նախորդող ու հաջորդող ամիսների ընթացքում։
1 «Ինչո՞վ հատուցեմ Եհովային ինձ արած իր բոլոր բարիքների համար» (Սաղ. 116։12)։ Եհովայի գործերը, որոնք նա արել էր իր ծառային ազատելու և իր ողորմությունը ցույց տալու համար, մղեցին սաղմոսերգուին գրելու այս խոսքերը։ Այսօր Աստծու ծառաները երախտագետ լինելու ավելի մեծ պատճառ ունեն։ Աստվածաշնչյան այս խոսքերը գրի առնվելուց դարեր անց Եհովան մարդկանց տվեց ամենամեծ պարգևը՝ փրկանքը։ Ապրիլի 17-ին մենք լավ առիթ ունենք հայտնելու մեր երախտագիտությունը, քանի որ այդ օրը նշելու ենք Հիսուսի մահը (Կող. 3։15)։
2. Ի՞նչ պատճառներ ունենք երախտագետ լինելու փրկանքի համար։
2 Փրկանքի բերած օրհնությունները։ Փրկանքի շնորհիվ մենք ստանում ենք «մեղքերի ներում» (Կող. 1։13, 14)։ Սա հնարավորություն է տալիս մեզ Եհովային երկրպագելու մաքուր խղճով (Եբր. 9։13, 14)։ Մենք կարող ենք նաև խոսելու ազատություն ունենալ, երբ աղոթքով դիմում ենք Եհովային (Եբր. 4։14–16)։ Բացի այդ, նրանք, ովքեր հավատ են ընծայում փրկանքին, հավիտենական կյանքի հրաշալի հեռանկար ունեն (Հովհ. 3։16)։
3. Ինչպե՞ս կարող ենք Եհովային ցույց տալ մեր երախտագիտությունը փրկանքի համար։
3 Ցույց տուր երախտագիտությունդ։ Մեր երախտագիտությունը ցույց տալու կերպերից մեկը Հիշատակի երեկոյին նախորդող և հաջորդող օրերի համար նախատեսված աստվածաշնչյան համարները ամեն օր կարդալը և դրանց շուրջ խորհրդածելն է։ «Դիտարանի» 2011թ. փետրվարի 1-ի համարում տեղ գտած «Պատրաստվա՞ծ ես տարվա ամենակարևոր օրվան» վերնագրով հոդվածի նպատակն է օգնել մեզ այս հարցում։ Մենք կարող ենք նաև մեր սրտաբուխ աղոթքներում ասել Եհովային, թե որքան թանկ ենք գնահատում փրկանքը (1 Թեսաղ. 5։17, 18)։ Հնազանդվելով Հիսուսի պատվերին և ներկա լինելով Հիշատակի երեկոյին՝ ցույց կտանք մեր երախտագիտությունը (1 Կորնթ. 11։24, 25)։ Բացի այդ, մենք կարող ենք ընդօրինակել Եհովայի անսահման սերը՝ հրավիրելով որքան հնարավոր է շատ մարդկանց (Ես. 55։1–3)։
4. Ի՞նչ ենք վճռել անել։
4 Եհովայի երախտագետ ծառաները Հիշատակի երեկոն սովորական հանդիպում չեն համարում։ Չէ՞ որ դա տարվա ամենակարևոր հանդիպումն է։ Ուստի մինչ մոտենում է Հիշատակի երեկոն, եկեք սաղմոսերգուի նման՝ մենք էլ վճռականությամբ լցվենք։ Նա գրեց. «Օրհնի՛ր Եհովային, ո՛վ իմ հոգի, և մի՛ մոռացիր նրա բոլոր գործերը» (Սաղ. 103։2)։