Աստվածաշնչի անձնական և ընտանեկան ուսումնասիրությունները կարևոր են
1. Ի՞նչ մտահոգություն ունի այսօր Կառավարիչ մարմինը և ինչո՞ւ։
1 Ինչպես առաջին դարում, այնպես էլ այսօր, Կառավարիչ մարմինը, անչափ մտահոգված է Եհովայի ժողովրդի բարօրությամբ (Գործ. 15։6, 28)։ Քանի որ մեծ նեղությունը մոտենում է, կարևոր է, որ յուրաքանչյուր քարոզիչ ամուր փոխհարաբերություններ ունենա Եհովայի հետ։ Ինչպե՞ս կօգտագործես այն ժամանակը, որը նախկինում տրամադրում էիր ժողովի Գրքի ուսումնասիրությանը։ Բոլորիս քաջալերվում է օգտագործել այդ ժամանակը ընտանեկան երկրպագության համար, որի ընթացքում կարող ենք ավելի մանրամասնորեն ուսումնասիրել Աստծու խոսքը և մեծ օգուտներ քաղել աստվածաշնչային ճշմարտություններից (Սաղ. 1։1–3; Հռոմ. 11։33, 34)։
2. Ինչպե՞ս պետք է անցկացվի ընտանեկան երկրպագությունը։
2 Ընտանեկան երկրպագության երեկո։ Ընտանիքի գլուխների պարտականությունն է Աստվածաշնչի ընտանեկան ուսումնասիրությունը անցկացնել կանոնավոր և բովանդակալից (Բ Օրին. 6։6, 7)։ Ամուրի եղբայրներն ու քույրերը կարող են օգտագործել այս ժամանակը, որպեսզի Աստվածաշնչի անձնական ուսումնասիրություն անեն և փնտրտուքներ կատարեն։ Անչափ կարևոր է, որ «գնենք հարմար ժամանակը» ուսումնասիրելու և խորհրդածելու համար։ Դրա շնորհիվ այս չար օրերում կկարողանանք ամուր փոխհարաբերություններ պահպանել Եհովայի հետ (Եփես. 5։15, 16)։
3, 4. Ի՞նչ նյութերից կարող ենք օգտվել և ի՞նչ պիտի ի մտի ունենանք։
3 Ինչ ուսումնասիրել։ ««Դիտարանի» հրատարակությունների ցանկը» կամ ««Դիտարանի» գրադարանը» կոմպակտ սկավառակի վրա կարող են օգնել գտնելու այն անհրաժեշտ ինֆորմացիան, որի շնորհիվ Աստվածաշնչի ուսումնասիրությունը հաճելի կդառնա։ Ընտանիքները կարող են ուսումնասիրել «Դիտարան» պարբերագրից «Ընտանեկան երջանկության բանալին», «Սովորեցրեք ձեր երեխաներին» և «Մեր պատանի ընթերցողների համար» խորագրերի հոդվածները կամ «Արթնացեք»–ից «Երիտասարդները հարցնում են» խորագրի հոդվածները և ստեղծագործության վերաբերյալ հրաշալի թեմաները։
4 Եթե ընտանիքի անդամները միասին Աստվածաշունչ կարդան առանց շտապելու, ապա կվերհիշեն աստվածաշնչային սկզբունքները ու կկիրառեն դրանք (Եբր. 4։12)։ Երբեմն կարելի է դիտել ու քննարկել կազմակերպության կողմից թողարկված տեսաֆիլմերը։ Ընտանիքի գլուխը հնարավորություն ունի ընտրելու, թե ինչ են ուսումնասիրելու և ինչպես։ Նա նաև կարող է հարցնել ընտանիքի անդամներին, թե ինչ կցանկանային ուսումնասիրել։
5. Ինչո՞ւ է Աստվածաշնչի անձնական և ընտանեկան ուսումնասիրությունները այդքան կարևոր այսօր։
5 Ինչու է դա կարևոր։ Եհովայի հետ մեր փոխհարաբերություններն ամրացնելը կնախապատրաստի մեզ, որպեսզի «կանգնենք և տեսնենք Եհովայի փրկությունը» (Ելից 14։13)։ Այս «ծռված և ապականված սերնդի մեջ» ծնողները Աստծու առաջնորդության կարիքն ունեն իրենց երեխաներին դաստիարակելու համար (Փիլիպ. 2։15)։ Երեխաներին անհրաժեշտ է օգնել, որ չընդօրինակեն դպրոցներում տիրող այլասերված վարքը (Առակ. 22։3, 6)։ Ամուսնական զույգերը պետք է ամրացնեն իրենց «երեքպատիկ թելը» (Ժող. 4։12)։ Ուստի եկեք իմաստուն ձևով օգտագործենք մնացած ժամանակը՝ «մեր անձերը կառուցելով մեր սրբագույն հավատի վրա» (Հուդա 20)։