Պատրաստվիր թեմային, որ լավ ուսուցանես
1. Աստվածաշնչի ուսումնասիրություն անցկացնելիս ինչո՞ւ պետք է ձգտենք գնահատանք զարգացնել ուսումնասիրողի սրտում։
1 Եթե ուզում ենք մղել ուսումնասիրողին ծառայելու Եհովային, ապա Աստվածաշնչի ուսումնասիրություն անցկացնելիս պետք է լավ պատրաստված լինենք։ Մեր ջանքերը հաջողությամբ կպսակվեն, եթե օգնենք նրան գնահատանք զարգացնելու Աստծու Խոսքի հանդեպ։ Դա էլ իր հերթին կմղի գործնական քայլերի (Բ Օրին. 6։5; Առակ. 4։23; 1 Կորնթ. 9։26)։ Ուստի ինչպե՞ս կարող ենք օգնել ուսումնասիրողին։
2. Ինչպե՞ս կօգնի աղոթքը։
2 Նախապատրաստվելիս աղոթիր։ Քանի որ Եհովան է ուսումնասիրողի սրտում ճշմարտության սերմերը աճեցնում, տեղին է, որ ուսումնասիրությանը պատրաստվելուց առաջ աղոթենք այդ անհատի և նրա կարիքների մասին (1 Կորնթ. 3։6; Հակ. 1։5)։ Այսպիսի աղոթքների շնորհիվ կկարողանանք որոշել, թե ինչպես նրա սիրտը լցնենք Եհովայի կամքի «ճշգրիտ գիտությամբ» (Կող. 1։9, 10)։
3. Ինչպե՞ս կարող ենք պատրաստվելիս մտածել ուսումնասիրողի մասին։
3 Մտածիր ուսումնասիրողի մասին։ Հիսուսը գիտեր, որ արդյունավետորեն ուսուցանել նշանակում է նաև մտածել մարդկանց մասին։ Իր ծառայության ընթացքում տարբեր մարդիկ նույն հարցը տվեցին. «Ի՞նչ անեմ, որ հավիտենական կյանքը ժառանգեմ»։ Սակայն նրանցից յուրաքանչյուրին պատասխանելիս նա տարբեր մոտեցում ցուցաբերեց (Ղուկ. 10։25, 28; 18։18–20)։ Նմանապես, մենք էլ պետք է մտածենք ուսումնասիրողի մասին, երբ պատրաստվում ենք։ Կարող ես խորհել հետևյալի շուրջ. պարբերության մեջ նշված ո՞ր համարները պետք է կարդալ, ի՞նչ ծավալի նյութ պետք է անցնել, դասի ո՞ր մտքերը ուսումնասիրողը միգուցե չըմբռնի կամ ո՞ր մտքերին դժվարությամբ համաձայնվի։ Եթե նախապես մտածենք, թե ինչ հարցեր կարող է բարձրացնել ուսումնասիրողը, ավելի լավ կպատասխանենք նրա հարցերին։
4. Ի՞նչ է նշանակում լավ նախապատրաստվել։
4 Վերանայիր նյութը։ Նշանակություն չունի, թե անցյալում քանի անգամ ենք ուսումնասիրողների հետ քննարկել նույն նյութը. պետք է ամեն անգամ նախապատրաստվել այնպես, ասես առաջին անգամ ենք քննարկելու այդ թեման։ Շատ կարևոր է, որ ամեն անգամ լավ նախապատրաստվենք, եթե ուզում ենք հասնել ուսումնասիրողի սրտին։ Այսինքն՝ պետք է ինքներս անենք այն, ինչ քաջալերում ենք ուսումնասիրողին անել։ Նյութը վերանայելիս ուշադրություն դարձրու նշված սուրբգրային համարներին և ընդգծիր գլխավոր մտքերը (Հռոմ. 2։21, 22)։
5. Ինչպե՞ս կարող ենք ընդօրինակել Եհովային։
5 Եհովան խորապես հետաքրքրված է յուրաքանչյուր ուսումնասիրողի առաջադիմությամբ (2 Պետ. 3։9)։ Ուստի ամեն անգամ ժամանակ հատկացնելով ուսումնասիրությանը նախապատրաստվելուն՝ մենք նրանց հանդեպ կցուցաբերենք նույն սիրառատ հոգածությունը։