Շրջանային համաժողովները նպաստում են ծառայությանը
1. Ի՞նչ ծրագիր սկսեց գործել 1938թ.-ից սկսած և ի՞նչ նպատակով։
1 1938թ.-ին Եհովայի կազմակերպությունը գործի դրեց մի նոր ծրագիր։ Ժողովները խումբ-խումբ հրավիրվեցին համաժողովների, որոնք այսօր կոչվում են «շրջանային համաժողովներ» (նախկինում կոչվում էին «զոնալ համաժողովներ»)։ Իսկ ի՞նչ նպատակով։ 1939թ. հունվար ամսվա «Տեղեկատուում» (այժմ՝ «Մեր թագավորական ծառայությունը») գրվեց. «Այս համաժողովները Եհովայի աստվածապետական կազմակերպության մի մասն են համարվում և նպաստում են թագավորական ծառայությանը։ Այն, ինչ սովորում ենք այս համաժողովներում, կարևոր է բոլորիս համար։ Դրա շնորհիվ ամեն մեկս կարող է ինչպես հարկն է կատարել իրեն հանձնարարված աշխատանքը»։ 1938թ.-ին քարոզիչների թիվը ընդամենը 58000 էր, իսկ 2009թ.-ին՝ ավելի քան 7000000։ Այս վիթխարի աճը ակնհայտորեն ցույց է տալիս, որ շրջանային համաժողովները ծառայել են իրենց նպատակին, այն է՝ օգնել յուրաքանչյուր քարոզչի «կատարելու իրեն հանձնարարված աշխատանքը»։
2. Ի՞նչ ելույթներ կհնչեն նոր շրջանային համաժողովին։
2 Նոր շրջանային համաժողովը։ Մենք անհամբեր սպասում ենք նոր շրջանային համաժողովներին, որոնք տեղի կունենան՝ սկսած սեպտեմբեր ամսից։ Անշուշտ, դրանք մեծ քաջալերանքի աղբյուր կլինեն մեզ համար։ Համաժողովի թեման է՝ «Դուք աշխարհի մի մասը չեք», որը հիմնված է Հովհաննես 15։19 համարի վրա։ Անկասկած, համաժողովի ելույթները մեծ օգուտներ կբերեն մեզ։ Նշենք դրանցից մի քանիսը։ Առաջին օրը կլսենք «Ինչպե՞ս է լիաժամ ծառայությունը պաշտպանում մեզ» ելույթը։ Կլսենք նաև երեք մասանոց մի ելույթաշար, որը կոչվում է՝ «Մի պղծվեք .... «գազանից», «մեծ պոռնիկից» և «ճամփորդող վաճառականներից»»։ Երկրորդ օրը կլսենք «Սիրիր Եհովայի՛ն, ոչ թե աշխարհը» վերնագրով ելույթաշար։ Մյուս ելույթներից են՝ «Շարունակեք լինել «պանդուխտներ և ժամանակավոր բնակիչներ»», «Քա՛ջ եղեք։ Դուք կարող եք հաղթել աշխարհին»։
3. Ի՞նչ օգուտներ կարող ենք ստանալ՝ ներկա լինելով շրջանային համաժողովին։
3 Մի քույր, որ սկսել էր ավելի քիչ ծառայել, վերջերս ներկա եղավ շրջանային համաժողովի։ Նա գրեց, որ համաժողովն օգնեց իրեն վերանայելու իր հանգամանքները, և այժմ ինքը վճռել է «դուրս գալ ծառայության և դադարել պատրվակներ բերելուց»։ Անկասկած, նոր շրջանային համաժողովը կօգնի բոլորիս սիրելու Եհովային և ոչ թե աշխարհը (1 Հովհաննես 2։15–17)։ Ամեն ինչ արա, որ ներկա լինես համաժողովին և ուշադրությամբ լսես ելույթները։ Այդպես կկարողանաս լիարժեք օգուտներ քաղել այս հիանալի միջոցառումից, որի նպատակն է օգնել բարի լուրի քարոզիչներին։